Matiu 15
15
Nl m'ertu iani ti m'ertu istu
(Mak 7:1-23)
1Naran lera, artisa na v'nen hua m'er arvarisi kinkin avandan a Serusalem kavrama asn a Iesu kavvr ti a, 2“?Inap'i hin arm'ertuam avluvn a p'klr elta tituei, sena ti ahavsila lm'ar naran avhan p'ret?”
3V'eti hin ivrpranr kavr ti a, “Inap'i ml hin kam'i kvluvn a v'nen huan Atua arna p'klm'i? 4#Avruh 20:12; TVH 5:16; Avruh 21:17; Livai 20:9.Sena ti Atua ittu sera v'nenan kavr ti a, ‘Pani ti nahar a tetiam m'ei a uniam ipav'a eia’, kavri ml kavr ti a, ‘M'ertu ipasip'len a tetian v'aha a unian, aparpep'ni sanan pr.’ 5V'eti kam'i kvvr ti a, ‘Ipavr ti m'ertu kinkin ivr an a tetian v'aha a unian kavr ti a, “Sei nrn p'etau anh, nttu sarei an a Mlin Eia”, 6hin ikahani ti nahar a tetian m'ei a unian ipav'a eia sanan.’ Arna si lera, kam'i kvani ti v'nen huan Atua ima kav'i si kaka uaki, sena p'klm'i. 7Kam'i kvp'ip'en lamuru. Aisaia ivrdaui tituei kavrur kam'i kavr ti a, 8#Aisaia 29:13.‘M'ertu laha avmima asnk arna v'nenar, kavpata nahak arna pnr, v'eti arna nlr avlak v'iv'a au a Kana. 9V'eti naran avpata Kana iv'i si kaka uaki, sena ti avv'iv'en v'nenar uaki kavvr ti iv'i v'nenan Atua.’ ”
10Laha, iv'ara a nelnal udlani avrama asnn kavr anr kavr ti a, “Pavrn v'nenak kavrndaui. 11Iav'i sei m'ertu ihani iani ti istu arna nahn Atua, v'eti sei idan al pnn, ki lera iani istu arna nahn Atua.”
12Laha, arm'ertuan avrama kavvr ani kavvr ti a, “?Nakm krndu ti arvarisi avrn istu istudau naran avrn v'nen lera?”
13V'eti ivrpranr kavr ti a, “Si udlani a Tetiak ilak eia ialaui, apahslei. 14#Luk 6:39.Pavlnr, hir avv'i m'etapis kavv'ev'a m'etapis. V'eti naran m'etapis iv'ev'a m'etapis, aparru karrs al tah.”
15Laha, a P'ita ivr ani, kavr ti a, “Pavrp'ep'ei a kam'em' v'nen la ksrani hara.”
16V'eti a Iesu ivr ti a, “?Inap'i hin kam'i kdavrndaui? 17?Kdavrndu ti si udlani iv'a al nava m'ertu iv'a al v'atn dav'a kadama ml aut? 18#Mat 12:34.V'eti si udlani idan al nava m'ertu idan a nln. Si lera iani ti m'ertu istu arna nahn Atua. 19Sena ti v'ahien stu idan a nl m'ertu, iv'i ti apavrp m'ertu, kavv'nah tav'et, kavan si stu m'a vitar, kavv'nah sei, kavhap'il arna tv'alr kavrur si stuan, kavsip'len m'ertu. 20Si udlani lera iani ti m'ertu istu arna nahn Atua, v'eti naran m'ertu ahavsila lm'ar kavhan sei, iahani m'ertu istu arna nahn Atua.”
V'anudl iamk iv'iv'en v'ahien p'asan
(Mak 7:24-30)
21Sarei, a Iesu iln nut lera karuh kadav'a arna v'anu itertalu a nut a Taia m'ei a Saitun. 22Laha, pavrni, tav'et iamk a Kenan idan arna v'anu lera kav'ara ani, kavr ti a, “Parn istu a kana, Mlin, kv'i a Natn a Divt. M'im'iln stu kinkin iutakm an a natk tav'et istudau.”
23V'eti iavrpren si kinkin ani. Laha, arm'ertuan avrama kavmiman ani kavvr ti a, “Patap'ei iparuh, sena ti hin isapa nakd kav'ara eia.”
24V'eti a Iesu ivrprani, kavr ti a, “Atua itep'a Kana asn nl nam'el a Isrel uaki, la avnep'a sivsiv avmln ha.”
25V'eti ima kasisihpu kaiaul asnn, kavr ti a, “Mlin, pasr lm'ak.”
26V'eti ivrprani, kavr ti a, “Iaviviln a ti apalev' tim'ah nar mardel kasrani asnr lip'ah.”
27V'eti tav'et ivr ti a, “Mlin, kvrdaui, v'eti lip'ah avhan tk tim'ah irs a nv' tiv'a m'ertuar.”
28Laha, a Iesu ivrprani, kavr ti a, “U tav'et, v'ahienam ilil. Sei krni, nrn ti ipatu hin ipanap'i lera asnm.” Laha, a natn tav'et ima kap'as ml arna naran nen.
A Iesu ien mamh m'ertu inelnal
29A Iesu iln nut lera kadama kasapa pak naui lil a Kalili, kav'el kam'i arna ptha kalak atlera. 30Laha, nelnal avstudau avrama asnn kavuirma m'ertu akavv'eldau, m'etapis, napt, sparasp m'er m'ertu uraur istudau, kavtaur asn tln a Iesu, laha imhmah anr. 31Kani ti nelnal udlani avtah ani istudau naran avla ti napt iv'ana, sparasp ima kap'as, m'ertu iav'eldau ima kav'el, m'etapis iledu sei. Laha, avpatei Atuar arm'ertu a Isrel.
A Iesu imsnen m'ertu avv'i tausen iv'a (4,000)
(Mak 8:1-10)
32V'eti a Iesu iv'ara anr m'ertuan avrama asnn kavr ti a, “Kana nrn istu sena nelnal udlani, sena ti atvlak sarei asnk napn itatl, suadar ihei ml. Narn ti p'etap'er apavrahau naran adavhatat, imahei ti apavm'em'a arna navanel.”
33Arm'ertuan avvr ani kavvr ti a, “?Nakd p'vlev' p'ret istudau ip'i arna nut kaka laha a ti nelnal apavhani kavrapd?”
34A Iesu ivr anr kavr ti a, “?Kam'i kvua p'ret iv'a?” Avvr ti a, “Isaru, m'a tilau papa kinkin.”
35Sarei, itu v'nen anr nelnal udlani a ti apavlak a nadep'. 36Kalev' p'ret isaru m'a tilau lahara, kavr ip'as an Atua sanan, kakausi, katau anr m'ertuan. Sarei, arm'ertuan avtutau a nelnal. 37Hir udlani avhani kavrapd, sarei avlev' tk tim'ah avlni kavnani ilin naten isaru. 38Dui udlani avhani avier tausen iv'a (4,000), ahavspan tav'et m'er mardel. 39Sarei, itap'er nelnal udlani avrahau, kalev' nauak kadav'a arna p'ak nut a Maktala.
© 2023 Presbyterian Reformed Church of Australia