रोमि 5
5
सान्ति कालाउ आनान्द
1ओदोङ भाअ्सिङ खाङधुरि पाहासो धर्मि बानाइका हिनाहि, कालाउ प्रभु येसु ख्रिस्ट केलाइको भाअ्सिङ पाका काम पाहासो परमेस्वर दोफा केलाइ मिलिका हिनाहि। 2केलाइको खाङधुरिको कारनहोइ येसु ख्रिस्ट केलाइहेङ इदोइ आनुग्रहता चुमाका हि, जेता केलाइ एला जाअ्का हिनाहि, कालाउ परमेस्वरको महिमाता सहभागि जेङका आसता लेङचान्हाखे। 3इदोइ झोको खिनिङ माको, कालाउ केलाइ ताइको सङकटता बुङ हाउसाइनाखे, इदोइ गितेङ कि सङकटहोइ सहनसिलता उब्जाइपाखे, 4परमेस्वर केलाइहेङ ग्रहन पाखे, हाइपालिपानु केलाइ सहिलि बुङ धिर्का हिनाहि, हाइपालिपानु वा केलाइहेङ ग्रहन पाखे, केलाइहेङ आस हि। 5आसहोइ केलाइहेङ हेलाउ बुङ निरास मापा पाखे, हाइपालिपानु परमेस्वर केलाइहेङ पिका पबित्तरो आत्मासो परमेस्वरको प्रेम केलाइको ह्रदयता भरिका हि।
6हाइपालिपानु केलाइ हुइका हिलाउ दोङ ख्रिस्ट आधर्मि द्याङगेलाइको भाअ्सिङ दोअ्का सोमोइता सिपिहि। 7धार्मिक द्याङको भाअ्सिङ सिलि मुसकिल हि, कालाउ आसल द्याङको भाअ्सिङ हासु बुङ सिलि आट बुङ पाङ। 8कालाउ परमेस्वर केलाइको भाअ्सिङ वाको प्रेम इदोइताङ तिङपाखे, कि केलाइ पापि हिलाउ दोङ ख्रिस्ट केलाइको भाअ्सिङ सिपिहि।
9केलाइ परमेस्वरको आगाता एसापा धर्मि बानाइका हिनाहि, हाइपालिपानु ख्रिस्ट केलाइको भाअ्सिङ सिहि, कालाउ केलाइको पापको भाअ्सिङ ताइको हिति होपाहि। कालाउ ख्रिस्ट जातिङकोङ परमेस्वरको चेरचुङसो केलाइहेङ बान्चिपाङ। 10हाइपालिपानु केलाइ परमेस्वरको सतरु हिलाउ दोङ वाको चानको सिका पाहासो परमेस्वर दोफा केलाइको मिलाप जेङका हिघाहि, ओदोङ भाअ्सिङ केलाइ निसित हिनाहि कि एला केलाइ वाको दोफा मिलिकानाङ, वा दोङ केलाइहेङ बान्चि पावा, हाइपालिपानु ख्रिस्ट सिन्हुका हि। 11इदोइ झोको खिनिङ माको, कालाउ एला केलाइको प्रभु येसु ख्रिस्ट पाहासो परमेस्वर दोफा केलाइको मिलाप जेङलि दोहोइ, ओदोङ भाअ्सिङ केलाइ परमेस्वरता आनान्दित हिनाहि।
आदमसो सिका, ख्रिस्टसो जिबन
12परमेस्वर सिरजाइका लाङ द्याङ आदमसो इदोइ सुमिङता पाप लोहि, कालाउ आदम पाप पानाङ वा सिहि। एसापा आदमको पापहोइ गोताङ द्याङगेलाइ पापि जेङहि कालाउ गोताङ द्याङगेलाइता सिका लोहि। 13परमेस्वर मोसाहेङ व्यवस्था पिलि खान्तेङ लाम्फा दोङ सुमिङता पाप हिघाहि, कालाउ इङको पाप गान्दिनाका मान्थुघाखे, हाइपालिपानु इङको बेलाता हिदोइ बुङ नियम मान्थुघाखे। 14आदमसो चुमातेङ मोसा थेकापा गोताङ द्याङगेलाइ पाप पाहि कालाउ झाराङ सिहि, जेलाउ कि इम्बालाइ आदम भाइपा आग्या माकेम्तेङ पाप पाका मान्थुघाहि। उङको आदम चाहि एमि लोलि तोम्काको नमुना हिघाहि।
15कालाउ आदमको पाप परमेस्वर ताइको आनुग्रहता केलाइहेङ पिका उपाहार भाइका माको, हाइपालिपानु एमि द्याङको पापहोइ हेन्जा द्याङगेलाइता सिका चुमाहि। कालाउ परमेस्वरको आनुग्रह कालाउ धार्मिकताको उपाहार जाइ वा केलाइहेङ पिका हि, इङको हेन्जा मुल्यवान हि कालाउ हेन्जा द्याङ याको आनुभब पाका हि। कालाउ येसु ख्रिस्ट वाको आनुग्रहता एमि द्याङको रुपता जेदोङ पाहि, ओदोङसो इङको जेङहि। 16परमेस्वर केलाइहेङ पिका दान आदमको पाप भाइका माको। हाइपालिपानु एनोङ पापहोइ दन्ड चुमाहि, कालाउ केलाइ हेन्जा पाप पालाउ बुङ, परमेस्वर केलाइहेङ इङको उपाहार पिहि, जाइसो केलाइ वाको आगाता धर्मि जेङन्हाहि। 17हाइपालिपानु एमि खिनिङ द्याङको पापहोइ गोताङ द्याङगेलाइ ह्रुता सिका लोहि, कालाउ जाइ आनुग्रह कालाउ धार्मिकताको उपाहार ताका माकोसिङ निङसुन्हा, इम्बालाइ एमि खिनिङ द्याङ येसु ख्रिस्ट पाहासो आनान्त जिबन निनावा कालाउ वाकोङ दोफा सासन पावा हाइपालिपानु इम्बालाइ येसुता खाङधुरि पाहि।
18ओदोङ भाअ्सिङ जेसाङ एमि खिनिङ द्याङको पापहोइ गोताङ द्याङगेलाइता दन्ड चुमाहि, एसापा दोङ एमि खिनिङ द्याङको धार्मिकताको कामहोइ गोताङ द्याङगेलाइ परमेस्वरको आगाता धर्मि जेङतेङ जिबन निङका जेङहि। 19हाइपालिपानु जेसाङ एमि खिनिङ द्याङको आनाग्याकारिताहोइ हेन्जाङ झानाहेङ पापि बानाइहि, एन्साङ पातेङ एमि द्याङको खिनिङ आग्याकारितासो हेन्जा झानाहेङ धर्मि बानाइयावा।
20मोसा व्यवस्था पिहि, कालाउकि झाराङ द्याङगेलाइ ताइमि हेथे पापि हिघा दोअ्तेङ जाचिलि द्वाको, कालाउ जेलाउ द्याङगेलाइ झन हेन्जा पाप पाहि, कालाउ परमेस्वरको आनुग्रह झन हेन्जा बाढेहि, 21जेलाउ गोताङ द्याङगेलाइ पाप पाहि कालाउ उङको गोताङ सिहि, एन्साङ पातेङ येसु ख्रिस्ट केलाइको प्रभुसो परमेस्वरको आनुग्रहहोइ इम्बालाइहेङ धर्मि बानाइतेङ आनान्त जिबन प्याङ।
Selectat acum:
रोमि 5: DHINT
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Dhimal New Testament, by The Love Fellowship is licensed under Creative Commons Attribution-ShareAlike 4.0 License.