Tànkùt 3
3
Zenu mba nebwôg Tshùaben
1Nshum àm, kà lag tshu tse me na' nzi't'o yi là,
a bwô ndù o tshùb ntag màm.
2Nummbe bo nsi tènte lé'njù boa ngu'njù
yôg so,
mbèn nkwi'te yu fite.
3Kà bwôntù bo nunenùn kag
ku o.
Taṅ yub tô o,
kite yub ntùm ntù o.
4A #Luk. 2.52nsi tshùa ndùlala o ghù fen
bo lén ntùn
num miag Tshùaben Nsi boa benntùn.
5Yé'te num Tshùaben ngô ntù o fa,
ntshùa neyé'te num ko' yu zenu.
6A bwô ndù o zi'te nelèn Nsi num njoṅ
tsho manze fa,
ndùlala ndù a zwiagte tsho manz'a dune.
7Kà #Rom. 12.16be nzenu à num ko' mu miag,
bwôg Tshùaben, ndo' mvèn o ntam
nukebwô yi.
8Yen nà nsi be ntswe mebwô num ngawut tsho,
be ju nefite num mvôg mu.
9Lo' tshu tsho ngamte Nsi yi,
lo' mbwe tshu tsho ngamt'é yi,
10a nsi tshùa ndùlala nkandà mu dun fu',
ndu' dun ntùm mu ntshaṅ ndùb fa
kà nswe.
11Nshum #Yob 5.17àm, kà wag ndùse Tshùaben
tswit nkùn #Héb. 12.5-6num o là,
kà bwôg ndùs'a so ntsha tu o là.
12Nummbe #Apok. 3.19Tshùaben ke nso ntsha à tu mèn
z'a be nkô i là,
mba tà be ngù num mén z'a nkô i là.
Zenu tanjoṅ ntshùa gol
13Mènfen b'a mèn z'a fon zenu là,
bo z'a ghù nesiaṅte là.
14Nummbe bin ntàn z'a be mfà là bwô
ntshùa silba,
fu' se mèn be nsô bwe là tanjoṅ ntshùa gol.
15Zenu tanjoṅ ntshùa ntôgtse,
a tanjoṅ ntshùa njoṅ tshu fa ts'a ghù
ntshu ntàn nà.
16Zenu tshùb lé'njù yàm ntùm bu i ze zwim,
ntshùb nkàb bo ghamte mum bu i ze kwéb.
17Tse manze zenu b'a tse mebwô,
tse ntshagnze be tse fite.
18Zenu ghù tù yôg
num ben tse bo tshùb i là,
ben tse bo taṅ num zenu là b'a ghafen.
19Tshùaben tshùa njam zenu kà nte
tsha' nsi,
ntshùa njam nesiaṅte kà ntaṅ kamànyam tù.
20A tshùa njam ze nesiaṅte kà ngù
nta'ntse nke nswe'e,
kà ba ndot nke mfà mbaṅ.
Tshùaben num ntomte nzenu
21Nshum àm, kà tshen tshu nezi'te li
lo num miag mu,
tshùb zenu bo nesiaṅte.
22Zenu bo nesiaṅte nsi be yôg ntù o,
be ju kwiwut num ntô mu.
23A be ndùlala mb'o nsi zin num manz'o à ntùm
nzin ke tsham ku o.
24A be z'o nô nsi là, mb'o ke nsi bwôg sàm ju;
miaglo mu nsi botte ndùs'o nsi nô nsi là,
25Kà bwôg mo' fétwut z'a ghù neṅwag num o ndende là,
ke ndù ghatshùagntù
nsi kam o lo.
26Nummbe Tshùaben nsi b'a yu dù' neyé'te,
a nsi ke béb ku o ndù k'a tsho ntùm ko'.
Mba we lo kô mèn z'a ghebte mbaṅ i là
27Kà gha neghù mebwô mèn z'a ku'ni
ndù o ghù yi là,
a be z'a b'a wù bèn nku'ni neghù yi là.
28Kà tshob mfèl o ndù a nèn
kà ntshag nse'e,
a be z'o ghù ju nefà yi là, fà yi ndùse
ntshùa netshag mfà yi a ndamnjù.
29Kà kwa kebwô num mfèl o,
ndùs'a tswe mbaṅ o ntùm
mbétni là.
30Kà ghù ntanta bin mènntùn
ndùs'a ke' ghù nukebwô wù là.
31Kà ghù ghe'te num ze nze nga ntanta,
ke bèn mbét sàm ze manze mba ntshù.
32Nummbe nu ghaghù nukebwô be mbag Tshùaben.
Là, a ke mb'a shun ben
ndaṅndaṅ.
33Nsi be nso ndon ntùm tunndà
ngatshùagntù.
Là, a be ntam ntse ntùm ndà ben netsine.
34A #Yako. 4.6; 1 Pét. 5.5be ntshabte ghatshabte,
Là, nke nko ndèn ghafà wut nsi.
35Mi ntsi' ghazenu b'a nku'ni,
Mi ntsi' kagni be tuswe.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.