Matio 21
21
Mba Yésu tsho Yérusalém nà
(Mark. 11.1-11; Luk. 19.28-40; Yoha. 12.12-19)
1Ngelaṅ bo ke ngebte Yérusalém, nkum Bètfagé num mbat nten nà, Yésu tum ghazi'te nu i bàa, ntshob bo ndù: 2Bin nèn ntùm yen ngô là z'a mbwe bin nà, bin nsi yoṅ be tsho bwe, yen kekwèn ndù bo taṅ i, mba mén i bo yi. Bin ké' i, ndo' nse' yi, mfà me. 3A be ze mèn tshob nu bin nà, bin tshob ndù: Tshùaben diag yube, a nsi ba' yub wù be kua' ndende. 4Yen nà tshwèt ngù ndù men ntshob li mi ngatshob ntshob Nsi na' ntshob là bumte ndù: 5Bin #Sak. 9.9tshob ngon Sion ndù: Mfen o tshwèt nse' wù, a b'a fite mèn, a ko' num kekwène, a ko' num mén kekwène, mén nyàm z'a be nket lèt là.
6Ghazi'te nu i nèn, ngù mba Yésu tshob bo là, 7bo lo' kekwèn mba mén i, nse' yi, njab nzwe tshob num bo, Yésu tswe num bwe. 8Benntùn yàm netèt bwoṅ benntùn nyit nzwe tshob num manze, tsemo' keb ntshùantù, nsate num manze. 9Bwoṅ #Yobk. 118.25-26benntùn tse bo be mbwe mba tse bo be njam nà kua' ntshob ndù: Hôsanna Mén David, mbotni be mèn z'a tshwèt nse' num lén Tshùaben nà. Hôsanna tà mfe tù.
10Ngelaṅ a tsho Yérusalém nà, njoṅ ngô Yérusalém fa nyi'te, bo tshob ndù: Yen mèn ni b'a we? 11Bwoṅ benntùn nke ntshob ndù: Yen ni b'a Yésu ngantum Nsi ze Nazarèt mà Galiléa.
Nelànte Ndà Nsi
(Mark. 11.15-19; Luk. 19.45-48; Yoha. 2.13-22)
12Yésu tsho Ndà Nsi, nta' njoṅ benntùn fa tse bo ke nswèn tshu, mba tse bo ke njun tshu ntùm Ndà Nsi là, ntèn téblé ghabate nkàb mba ndiaṅ ghaswèn mbwoṅsaṅe, ntamte nsi. 13A #Es. 56.7; Yer. 7.11tshob bo ndù: Bo lo kite ndù: Bo nsi tsiaṅ ndà àm ndà le'te Nsi. Là bin ghù a kaṅ ntù' ngab ba tshô. 14Tsemo' mfùmiag mba tsemo' kekat se' mbaṅ i ntùm ndà Nsi, a yate yube. 15Là ghale'te Nsi tse ndùbndùb mba ghalèn ṅwa'ni Nsi be yen nsà ts'a ghù là, mba mba bônke' tshwèt nkua' ntùm Ndà Nsi là, nke ntshob ndù: Hôsanna be Mén David là, nja ntù, 16ntshob #Yobk. 8.3yi ndù: O ju' ju ze bo tshwèt ntshob là ké? Là Yésu tshob bo ndù: Ṅ, bin ke' yoṅ nsiaṅ ndù: O yab yobkwi se bo nsi ghamt'o yi là num ntshu bônke' mba bonfi ké? 17A faṅ yub ntum ntùm ngô, nèn Bètania dù' z'a zi là.
Tù mbatsi ke ntàme
(Mark. 11.12-14,20-24)
18Nkebnjù, ngelaṅ a ke mbèn njam ntùm ngô Yérusalém nà, nziku' ya i. 19A yen tù mbatsi kaṅ manze, nèn mbaṅ i ke fon sàm ju num i k'a ke nda' mfu mi; a tshob yi ndù: O ke bèn njam sàm tàm mba ntshù'! Be ndùse, tù mbatsi jum. 20Ghazi'te nu i be yen nu là ntshàm ntshob ndù: Sen tù mbatsi li jum be ndùse à ndùke? 21Là #Mat. 17.20; 1 Korin. 13.2Yésu bùnte ntshob bo ndù: Kua' nenùne, me tshob bin ndù: A be ze bin ghù bamntù ke ke magte là, mba bin ku'ni neghù ju ze me ghù num tù mbatsi là, ke b'a nda' yi, là a be ze bin tshob mba yen mbat li ndù: Tsho' nsen nà ngwù ntùm dibantse là, mb'a nsi ghù be ndaṅndaṅ. 22Njoṅ tshu fa tse bin num ndon ntùm nele'te Nsi ntùm bamntù là, bin nsi kwé.
Dù' ze ngù' Yésu fe là
(Mark. 11.27-33; Luk. 20.1-8; 7.29-35)
23Ngelaṅ z'a tsho Ndà Nsi, nke ntswite là, ghale'te Nsi tse ndùbndùb mba ghakwé mbwe ntùm ngô se' mbaṅ i, ntshob ndù: O ke ngù tshen nu li à ntùm zit ngù' à? We bèn mfà yen ngù' là wù à? 24Là Yésu bùnte, ntshob bo ndù: Mba me nsi bètte zin ta' nu ntshù'. A be ze bin tshob me là, mba mba m'a' soṅ zin ngù' z'a be ngù me ghù tshen tshu là là. 25Kwéntse Yohané fe à yà, kamànyam ke benntùn à? Là bo kwate, ntshob netèt bo ndù: A be ze be tshob ndù a fe à kamànyam nà, mb'a' tshob be ndù: Bin na' mbe ke bam i numke? 26Là, a be ze be bèn netshob ndù: A fe à benntùn nà, bag bin bwôg bwoṅ benntùn, nummbe njoṅ benntùn fa ke ndo' Yohané à mba ngatshob ntshob Nsi là. 27Bo bùnte Yésu, ntshob ndù: Bag ke' lèn. A tshob bo ndù: Mba mba me yàm ke nsi tshob ngù' ze me be ngù tshen tshu là yi là bin.
Tànkùt bon bàa
28Bin kwate ndùke? Mo' mèn lo ghù bon bàa. A se' mbaṅ mbwe i, ntshob ndù: Mén àm, nèn mfa' ntùm nà sènni. 29Yen ni bùnte, ntshob ndù: Me gha; a be ghubte, nkaṅ ntù i, nène. 30A bèn nèn mbaṅ mo', mbèn ntshob be ju ntshù' yi. Yen ni bùnte, ntshob ndù: Tshùaben, m'a' nèn, là ke nèn. 31Netèt bo bàa, we z'a ghù ze nekô tàab à? Bo tshob ndù: Mbwe i. Yésu tshob bo ndù: Kua' nenùne, me tshob bin ndù: Ghakwéfé' mba ba kattù bènnzwi nsi kwé mbwe bin ntùm nufen Nsi. 32Nummbe #Luk. 3.12; 7.29-30Yohané lo se' bin manze nunetsine, là bin ke bam i. Là bin, bin lo yen yen nu là, a ghubte bin ke kaṅ ntù tsine, num nebam i.
Tànkùt ghadiaṅ nkùa
(Mark. 12.1-12; Luk. 20.9-19)
33Bin #Es. 5.1-2bèn nju' mo' tànkùt li: Mo' tàndà lo bwe nkùa, nkut kàb ndiaṅ i mbume, nabte njoṅ tshu fa ntùm bwe, nkut ndà nebéb dù', njab ghadiaṅ nkùa bwe, nèn katte. 34Ngelaṅ nekwé tshu nkùa lo be ghebte, a tum tshe' tse ghadiaṅ nkùa ndù bo kwé tshu nkùa. 35Ghadiaṅ nkùa ghom tshen tshe' tse là, ndab mo', nzwi mo', mbèn ntamte mo' ndoṅ. 36A bèn ntum tsemo' tshe' tse tse yàme, ntshùa mbwe tse, ghadiaṅ nkùa bèn ngù be ndaṅndaṅ num bo. 37Yen nà be tshùa, a tum mén i bo, ntshob ndù: Bo a' bwôg mén àm. 38Là tshen ghadiaṅ nkùa là yen mén i, ntshob bo bo ndù: Yen ni b'a njùndà. Bin se' be nèn nzwi i, ndo' ntsi' mi. 39Bo tshùb i, ma' njam nkùa, nzwi i.
40Ngelaṅ tshùaben ngaghù nkùa se' là, a nsi ghù à ke tshen ghadiaṅ nkùa l'à? 41Bo tshob yi ndù: A nsi biagte tshen tshùagkèt ben nà kua' kebwô, bèn fà nkùa tsemo' ghadiaṅ nkùa, tse bo nsi ke fà tshu nkùa yi ngelaṅ i là.
42Yésu #Yobk. 118.22-23tshob bo ndù:
Bin ke' siaṅ ju ze bo na' nkite là ndù:
Loṅ se ghabom ndà na' ngua' là,
kaṅ ntù' loṅ tôgndà.
A b'a fa' Tshùaben,
mbèn mbe ju netshàm num miag mage.
43A ndùlala me tshob bin ndù bo nsi kwé nufen Nsi bin, mfà ngô z'a yam ntàm mi là. [ 44Mèn z'a nsi vù num sen loṅ nà nsi be'te wul i bwe; a be ze sen loṅ nà bèn ngwù num mèn nà, mb'a' nywi't'é.] 45Ghale'te Nsi tse ndùbndùb mba ba Férésia be ju' tshen tànkùt li, ndèn ndù Yésu ke ntshob à num bo. 46Bo nke ndiag neghom i, mbwôg bwoṅ benntùn, nummbe bo lo ke ndo' i mba ngatshob ntshob Nsi là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.