Yoshua 2
2
Yoshua tum ntom bàa Yériko
1Yoshua #Héb. 11.31; Yako. 2.25nshum Nun tsin tà Sittim, nànte ntum ntom bàa njam tsham, ntshob bo ndù: Bin nèn ntsha' ngô, mebwô mebwô, Yériko. Bo nèn, ntsho ndà mo' kàttù mènnzwi, lén se Rahab, nzi bwe. 2Bo nèn ntshob mfen Yériko ndù: Ba Israél se' nsen ni yen tèttswe' li nelôte ngô.
3Mfen tum bo nèn ntshob Rahab ndù: Sô bandum tse bo se' ntsho la' o, ntùm ndà o là; bo se' tom à ngô. 4Là mènnzwi là lem tshen bandum bàa li, mbùnte ndù: A b'a nenùn ndù bandum bàa ntsho la' àm, nda' ndù me lo ke lèn ngô ze bo be bon bwe là. 5A lo mbe mfetnjù, ndùse nze ngô lo nke mfùn nà, bo tum nène. Me ke' lèn dù' bo nèn nà. Bin nànte njoṅ yube, be mo' ndù bin kote yube. 6Mènnzwi là lo ghù bo ko' ndem mum tu ba', bam nkô ndeb ts'a tse'te bwe là. 7Bo yoṅ yube, nèn nze bag Yordan, nze mfube, nzendà ngô fùn ndùse ntshu ntsho tum nèn nà.
8Bo lo be zi, ndù mènnzwi ko' num tuba' nèn mbaṅ bo ntshob bo ndù: 9Me lèn ndù Tshùaben swèn yen ngô li bin. Fétwut ze bin be yi là ghom yage. A tshùa num tu bin sàm mèn ke bèn ngù fènntù ntùm ngô. 10Nummbe #Netu. 14.21; Nes. 21.21-35bag ju' mba Tshùaben na' ngù dibantse meba jumte mbwe bin ndùse bin na' ntum mà Egipto là. Bag ju' ju ze bin na' ngù yoṅ Yordan num fenfen Amor bàa Sion bo Og là. Bin lo zwite yub fa mba Tshùaben na' mbètte zin nà. 11Bag lo ju'u, nju' fènntù mi ntù bag. Wut yag be mfi ndùse bag kwate zin nà; nummb'a b'a Tshùaben Nsi zin, bèn mbe Nsi mfe kamànyam mba tà mànsi. 12Ndonni, me le'te zine, a bwô bin nu ngu me num lén Tshùaben ndù bin nsi ghù lèn bwôntù ze me ghù num bin nà num tunndà tàa. 13Bin tshob m'a be ze bin nsi faṅ tàa, màa, fèt tshàm tse bandum boa tse bènnzwi, ben tshobe, ntùn nà. Bin soṅ àm, a be ze bin nsi sô yag ntshu vùkob là.
14Tshen bandum ni bùnte yi ndù: Bag fà tu yag ke b'a yu, a be z'o ke' tote yag là. Bag nsi be ben nenùn num yag nka'ni, ghù bwôntù num o ndùse Tshùaben nsi swèn yen ngô li bag là. 15Ndùlala, a lo' ntàn nkù ntshag yub yi tôndà nte nsi, nummbe ba' i na' mb'a mbaṅ kàbngô; a ke ntswe à njam ntùm ngô ndù ba' i nèn tù ntshùa kàbngô.
16Mènnzwi là tshob bo ndù: Bin nèn mfe num mbale, ntum ntshu ben tse bo tshwèt njoṅ zin nà. Bin lem bwe mum lé'njù tat, mbéb kà bo bèn njam, kà bin yôg ntam manze mbèn njam. 17Tshen bandum ni tshob mènnzwi là ndù: Tshù mba bag nsi zwiagte nka'ni mi o ghù bag nu ngu bwe là li: 18Ndùse bag nsi lo' ngô là, mb'o nsi taṅte yen nkù meba li tôndà, dù' z'o na' ntshag yag bwe là; yen ngelaṅ nà o tse'te tàan, màan, fèt tsho bo njoṅ tunndà fa mbaṅ o. 19A be ze mo' mèn netèt bwe dut nkù'ndà ntume, nu tsho ngù i là, mba vù se lôt'a be ze tu wut tù' i, bag be mbu' ntùm yen nu là. A bèn mbe ze bo yab bu num mènntùn ze bin yi be ndà o là, mba yen nu là nsi tsho a tu bag. 20Là, a be z'o soṅte yag nu bo lèn nà, mba bag b'a mbu nelàn num ngu z'o ghù bag nu là.
21Mènnzwi bùnte ndù a bam ndùlala, ndé'te yube, bo nèn. A taṅte nkù meba tôndà. 22Ba ntom ko' nèn num mbale, ntswe bwe lé'njù tat, tà nkum ndùse ghayoṅ yub bèn njam nà. Bo lo diag ba ntom njoṅ dù' fa, nda' ndù ke fon yube, ndiag yub à banban. 23Tshen bandum bàa li swe' mfe num mbale, ndut Yordan. Bo bèn njam ntèt Yoshua nshum Nun, nsoṅ i njoṅ nu fa ts'a tum num bo là, 24ntshob ndù: Kua' nenùn Tshùaben fà njoṅ ngô fa be; njoṅ benntùn fa ntùm ngô tshwèt mvètte mbwe be.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.