Osé 2
2
Lé'njù ndùb Yesréel
1Mba #Rom. 9.26ndùlala, bon Israél nsi yàm mba nkwango' mi a dibantse là, be mèn ke ku'ni nefi'i, ke bèn nsiaṅ i; bo nsi tsiaṅ yub ndù bon Nsi z'a be ntùn nà, ntùm dù' ze bo tshwèt ntshob bo ndù: Bin ke' b'a yàm nzwit mèn nà:
2Bon Yuda mba bon Israél nsi kùmte,
tamte ghom yub mfen.
Bo nsi tô ngô.
Nummbe se lé'njù Yesréel nsi b'a se ndùb.
3Bin tsiaṅ fèt tsin tse bandum ndù: Ammi
nzwil àm,
ntsiaṅ fèt tsin tse bènnzwi ndù: Ruhama,
mènnzwi ze bo ko ndèn mi là.
4Bin bote mà zin,
Israél bin bot'é,
nummb'a ke' b'a nzwi àm,
me ke bèn mbe ndu i,
ndùlala ndù a kag ntshù kat
z'a num miag mi là nsi,
nkag tshu kwiwut mènnzwi ts'a be
num i là nsi,
5mbwôg ndù kà me sô nzwe num i,
nte i tù mba lé'njù s'a tum bam màab là;
mbwôg ndù kà me ghù a tù' mba kônkwa,
ngù a tswe mba tsha' njum nà,
ngù a kwù nzi ntse.
6Me ke nsi ko ndèn bon tse,
nummbe bo b'a bon kat,
7nummbe mà yub kat;
mènnzwi z'a jùm yub là bagte
wul i ze tu.
Nummb'a tshob ndù:
A bwô ndù me tam njam màndà tshàm,
tse bo be mfà yàm bàn mba ntse,
mfà tshàm nzwe, mfà màm mfèt mba màm ndu' là.
8A ndùlala m'a' te njô num manz'o,
nkut kàb bwe,
ndù k'o bèn njen manze tsho.
9A nsi kù nde njam màndà tse
ke kote yube,
a nsi diag yube,
là ke fon yube.
A nsi tshob yen ngelaṅ nà ndù:
A bwô me bèn njam mbaṅ mbwe
ndu àm,
nummbe me lo be mebwô
ntshùa ndonni.
10A lo ke lèn ndù me na' mbèn nke mfà
nsa, ngefele, mba mfèt nswe yi,
ke lèn ndù me na' mbèn nke mfà nkàb yi mba gol.
Bo lo lo' nkàb là mba gol nabte Baal yi!
11A ndùlala me nsi se'e,
bèn lo' nsa màm num ngelaṅ i,
lo' ngefel àm num ngelaṅ i;
lo' ndu' màm num ngelaṅ i;
me nsi kwé nzwe tse me fà bo,
nzwe ts'a bwô ndù a bomte wul i yi, ke be tunntôg là.
12Ndonni m'a' ghù ntam tuswe tu i,
num miag màndà tse,
sàm mèn ke nsi tshu' i mum mbu màm.
13M'a' ghù ze tsiaṅte,
tse jùa, tse jùa ṅwù, tse jùa ngabnjù
mba njoṅ tse mbumte fafa ke bèn mbe.
14M'a' sate nkùa i, nsate nten mi,
tshu ts'a be ntshob num bwe ndù:
A b'a tshu tshàm, mbe nda' ze màndà tshàm
fà me là.
M'a' lo' njoṅ i fa nkaṅ fèn yi,
nyàm tshwèt sate njoṅ i fa.
15Me nsi naṅ ntsha tu i
mum lé'njù ts'a ke nton labinda Baal
mb'a ke nso kwa, nso mba'ntoṅ,
ntam njam màndà tse,
ndagt'àm nà.
Tshùaben bèn ntshobe.
Lé'njù nekom kàn
16A ndùlala, m'a' yo't'é
nèn yi kônkwa,
ntshob nu ntù i;
17me #Yosh. 7.24-26nsi fà nkùa tse yi,
m'a' kaṅ tômbo' Akor
a tù' nzendà ywimte yi.
A bwe là z'a nsi bùnte nu, ndaṅndaṅ mb'a na' mbe
ntùm tse lé'njù ngon,
mba mum lé'njù ts'a ke nko'
mà Egipto là.
18Tshùaben tshob ndù:
O nsi tsiaṅ àm ndu o mum sen lé'njù là,
ke bèn netsiaṅ ndù tàbu' àm.
19M'a' sô ndèn Baal ntshu i,
bo ke nsi bèn tsiaṅ yub
lén sobe.
20M'a' wat kàn num yub tu
ntùm sen lé'njù là,
bag à nyàm tshwèt, nsaṅ mfe
kamànyam, nyàm tse bo be nsoṅ bam sob
nsi num nsitsha' là;
me nsi biagte ngoṅkét, ṅwi mba ntsho ntùm ngô,
ndù benntùn tswe ntùm ngô fite,
ke ke mbwôge.
21M'a' ka o num yàm tu matmat,
nka o num yàm tu
ntùm nenùn mba nu ndaṅndaṅ,
nka o ntùm kondèn bo tshàmndèn.
22M'a' ka o ntùm ntshu ntshù'
ndù o lèn Tshùaben.
23Tshùaben tshob ndù:
Me nsi bùnte bo mum sen lé'njù là.
Tshùaben tshob ndù:
A nsi be mum sen lé'njù là
me bùnte nu num ju z'a tshwèt ntoṅ ben tshàm
ba Israél là.
24Tsha' nsi bùnte nsa, ngefele, mfèt nswe,
bo bùnte yub Yesréel.
25Me #Rom. 9.25; 1 Pét. 2.10nsi ywile, te mén bo ke' kô i là
ntùm ngô num yàm tu,
me nsi ko ndèn mi.
Me nsi tshob ghua' mén ndù: O b'a yàm nzwit mèn,
tu wul i tshob ze ndù: O b'a yàm Nsi.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.