2 Tésalônikà 2
2
Ngelaṅ mànjam
1Fèt #1 Tés. 4.15-17tshag, mbe se' mba ze nese' Tshùaben be Yésu Kristô mba nebumte be bag à bin bo là, bag le'te zine, 2kà bin nyi'te ndende ntùm nkwate zin, ke vôgte, ke num ntshob Ywèle, ke num mo' ntshobe, ke num mo' ṅwa'ni ze bo tshob ndù a fe à bag lo, mba lé'njù Tshùaben à se' là. 3Kà sàm mèn fùte zin num bwe. Là, a bwô ndù negha Nsi bwôgmbwe nse'e, ngabagte ntshù', mèn nebi tswite wul i; 4a #Dan. 11.36; Ez. 28.2b'a ngakeban, mèn z'a nsi ko'te wul i mbwe njoṅ tshu fa tse bo ke ntsiaṅ yub nsi ke tse bo ke ngamte yub lo là, a nsi te diaṅ ntùm Ndà Nsi, lo' tu wul i mba Nsi là. 5Bin ke' kwimte ndù me lo tshob tshen tshu là bin, ngelaṅ me na' mbe la' bin nà ké? 6Ndonni, bin lèn ju z'a tshùb i ndù a tswite wul i à num ze ngelaṅ nà. 7Nummbe a to' fa' num nu nebagte ntshù', nda' ndù a bwô mèn z'a tshùb i tà nkum ndonni là bi. 8Num #Es. 11.4yen ngelaṅ nà, nebagte ntshù' nsi tswite wul i, Tshùaben Yésu lo' Ywèt ntshu tse mbagt'é yi, ghù a tù' ju banban, ngelaṅ z'a nsi se'e, tswite wul i ntùm nkuni mi là. 9Ze #Mat. 24.24nese' ngabagte ntshù' nsi b'a njam fa' Satan ntùm njoṅ mfa' neta fa, ntùm ba nsa, ntùm ba nu netshàm tse tatte, 10mba ntùm fùte njoṅ nuketsin fa, num ben tse bo tshwèt mbi, nummbe bo ke' kwé nkôni nunenùn ndù a yôg yub là. 11A ndùlala, Nsi tum neta nefàn manze bo ndù bo bam tatte, 12ndùlala ndù a tsho'te njoṅ benntùn fa tse bo ke' bam nenùne, là njab ntù yub num nuketsin nà.
13Fèt tshag, bin tse Tshùaben kô zin nà, a bwô ndù bag ke ndabte Nsi num tu bin njoṅ ngelaṅ fa, nummbe Nsi lo tsho' zin fe neto'te num yôg ntùm nelàn Ywèle, mba ntùm bamntù nenùne. 14A num ndùlala, a lo tsiaṅ zin njam nkùn mebwô yag, ndù bin kwé nkuni Tshùaben be Yésu Kristô. 15Fèt tshag, ndùlala bin tshùb wut tsine, ngù tànntù num tshu tse bin zi'te bag, ke num ntshu, ke ntùm nekite lo là. 16A bwô ndù tu wut Tshùaben be Yésu Kristô mba Nsi Tà be, z'a kô yag ntùm kondèn i mfà nefitentù z'a tswe yoṅ ntshù', mba nenywinte ze mebwô bag là, 17fite ntù tsine, mfà tànntù bin ntùm njoṅ mfa' fa mba ntùm njoṅ ntshob mebwô fa.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.