Marko 9
9
1Alandalilaavwangaati, Yizukanji choo! Panye-paa pali wamwi wano watalifwa wasuke wize walole Uwufumu wakwe Leza wukwiza namaka yakwe.
Ukupilunkana
(Mateyu 17:1-13; Luka 9:28-36)
2Ayala amanda yasila yatatu Yesu asenda Peter, nu Jemusi, nu Yohani akwela nawo umwamba wutali nanti wantu wanji. Awala vino wakulolechesya, ukupilunkana akuloleka pakwe weliwe, 3ivizwalo vyakwe aviwazikimila aviswepa-mpe, vino nawumwi uwamunsi wino angaviswefya wowonye. 4Ngapano awasambilizi wotatu awalola Eliya nu Musa, wakuvwanzyania nu Yesu. 5Peter asimpuka anena Yesu ati, Musambilizya, chazipa wuli pano tuli konye-koo, Twandi tuzenge imitanda yitatu wonga wuwe awako, wumwi wuwe awakwe Musa nawunji wuwe awakwe Eliya. 6E Peter-nye nawawuye awatina nkaninye nga Peter asowa nichakuvwanga.
7Akwiza iwingo alifika aliwafumpi chizya, nizwi alifuma mwiwingo aliti, Wee a Mwanane umukundikwe—mwivwanji! 8Napaponapapo awatalangania ukuwa nanti kulola wumwi swinya; suka ndi we Yesu mutupu.
9Awala watantamuka umwamba Yesu awakomelezya ati, Mutize mukanene wumwi chino mwalola, suka pano Umwanamuntu wiza wazyulupuka.
10Awatontela chino Yesu wawanenile, ukuwa awavwanzyania wonga chochonye wakuti, Wuzye ukuzyulupuka kumfwa kukusula chani? 11Nga awawuzichisya Yesu awati, Ngamuno chani chino awasambilizya wamasundo wakutanji Eliya awino alitalichila ukwiza?
12Awatolelela ati, Nachawuzimanye Eliya awino akutalikanga ayiza kukuyania ivintu vyonsi. Ukuwa naponye nga amazwi matele yavwanjila chani ukuti Umwanamuntu aliyimba nkaninye akankamulwe? 13Ukuwa nenji nkuwanena nkuti, Eliya wiza kali, nawantu wamuchitila vino walondanga ukumuchitila, ndimuno amawaliko matele yavwanjila kuvyakwe.
Yesu apozya umulumendo wamuzimu wuwipe
(Mateyu 17:14-21; Luka 9:37-43a)
14Awala waya kuwasambilizi wano wasyazile, awalola iwumba kulu. Awasambilizya wamasundo wamwi wapanzyanianga nawasambilizi. 15Ukuwa awala awantu walola Yesu, awazunguka nkaninye awasamalila kweneko awaya awamulamuka. 16Yesu awuzya awasambilizi wakwe ati, Ngamukupanzyania nawawo chani?
17Wumwi uwamwiwumba atolelela ati, Musambilizya, Nalesile umwanane uwachonsi kwewewe, amuno ali numuzimu wuwipe atanga avwange nanti akuvwanga. 18Ponsinye pano umuzimu wamuvundumuchila, wukamuzangula, pasi, nitotofulu aliwafuma kumulomo, awasyekula namino, akalila-ndi. Nalambilizizye awasambilizi wako ukuti wawinge umuzimu, ukuwa waposilwe.
19Yesu awanena ati, Oko, mwenkulo ntasuwila-mwe! Nga indilanga nikala namwe ukufika-kwi? Nga indilanga nalandila namwe ukufika-kwi? Letani umulumendo kuno! 20Awatwala umulumendo kwe Yesu.
Napaponaponye awula umuzimu walola Yesu, ichifwafwa achizangula umulumendo, apona pansi awatantaia, nitotofulu aliwafuluka kumulomo. 21Yesu awuzichisya yisi wamulumendo ati, Wuzye pano walwalila wonye-woo kwapita impindi wuli?
Amutolelela ati, Ukufumilila uwutichi wakwe. 22Penye chikamusumba mumulilo namuminzi ukuti chimukome. Waninkumbu naswe ututule, ndachino ungatwavwa!
23Yesu ati, Mwati, ndachino ingawavwa! ivintu vyonsi vingachitwa kumuntu wino ali nisuwilo.
24Napaponapapo yisi wamwana apunda ati, Indi nisuwilo, ukuwa lisi alisuwilo lyenecho. Njavwa imbe nisuwilo kulu!
25Yesu alolechesya kuno iwumba lyasenjelelanga likupalamila kwewoliwo, achaleka akalipila umuzimu wuwipe ati, Muzimu wakwe—kutwi mbali ewiwi, fondomoka mumulumendo utize uyize uyelezye ukwiza mweweliwe swinya!
26Umuzimu awupunda, ichifwafwa achizangula umulumendo, awulompoka. Umulumendo awa ngati achala, achaleka awantu wonsi awati, Afwile! 27Ukuwa Yesu alema umulumendo ikasa amukatusya, ayimilila.
28Ala Yesu winjila mung'anda, awasambilizi wakwe awamuwuzichisya kumbali wakuti, Ngamuno chani chino swenji twaposilwe ukufumya umuzimu wuwipe?
29Yesu awatolelela ati, Pasi chimwi chino chingafumya umuzimu wamwata woo, nkandi amapepo matupu.
Yesu avwanga ivyamfwa yakwe swinya
(Mateyu 17:22-23; Luka 9:43b-45)
30Awafuma kokonye awaya awapita mwe Galileya. Yesu atalondanga ukuti wumwi amanye kuno walinji, 31amuno wasambilizyanga awasambilizi wakwe ivyakuti, Umwanamuntu alilemekwa kuwantu wize wamukome; ndikwapita amanda yatatu, ayize azyulupuke.
32Watamanyile chino ukusambilizyanye koo kwasulanga, ukuwa muno antete awatina ukumuwuzichisya.
Ngaweni wakula walusya?
(Mateyu 18:1-5; Luka 9:46-48)
33Awaya kwe Kapemahumi, ngapano winjila mung'anda Yesu awuzya awasambilizi wakwe ati, Nga munzila mwapanzyanianga chani?
34Ukuwa nanti kumutolelela chimwi, amuno munzila wapazyanianga ivyakuti ngaweni wakula walusya. 35Yesu ayikala pansi, ayita awasambilizi wakwe, awanena ati, Wensi wino akulonda ukuwa awakutalika wazipila ukuwa awakupelelechezya pewonsi awapyunjila wonsi. 36Atola umwanamutichi amwimilika pankolelo pakwe woliwo. Amufukatila awanena ati, 37Wensi wino wapochelela wenga uwawanawatichi ndivino wenye-wee mwizina lyane ye wampochelela nene; nawensinye wino wampochelela nene, atela asinakumpochelela nene nenga mutupu ukuwa nawino wantuma.
Wino asi nakasinza naswe awitu
(Luka 9:49-50)
38Yohani amunena ati, Musambilizya, twaweni umuntu wino wafumizyanga imizimu miwipe mwizina lyako, ukuwa twamulesizye muno atalinji awamwiwumba litu.
39Yesu awanena ati, Mutize muwamulesya, amuno pasi wumwi wino akuchitila ivizungusyo mwizina lyane wino alipiluka nanti kuzimba awamvwanjila uluwi. 40Amuno wensinye wino asi nuluwi naswe, ye awitu. 41Yizukanji choo! Wensinye wino akuwapa aminzi yakung'wa muno mwewakwe Klistu nachawuzimanye ali pochelela ichilambu.
Amelezyo yakuwembusya
(Mateyu 18:6-9; Luka 17:1-2)
42Wensi wino wiza waleka wumwi uwatwananye too wafumya isuwilo lyakwe kwenene, chingazipila umuntunye weyo ukunyepelelwa enyina wiwe munsingo asumbilwe mwesumbi. 43Achaleka ndi kasa lyako likukupunuzya, liputulenye! Achizima kwewewe ukwinjila wechilema muwumi ukulusye ukuwa namakasa yawili uyinjila mwilungu lyamulilo, mumulilo wape. [ 44Kuno ing'onyo zyawo zisifwa, numulilo wusitela wuzime.] 45Nanti ndi ichinama chako chikukupunuzya, chiputulenye! Achizima kwakwe wewe ukwinjila muwumi wechikonta, ukulusye ukuwa namanama yako yawili usumbilwa mwilungu lyamulilo. [ 46Kuno ing'onyo zyawo zisifwa, numulilo wusitela wuzime.] 47Nanti ndi alilinso lyako likukupunuzya, lifolowolenye! Achizima kwakwe wewe ukwinjila mu Wufumu wakwe Leza wechintongo, ukulusye ukuwa naminso yako yawili usumbilwa mwilungu lyamulilo. 48Kuno ing'onyo zyawo zisifwa, numulilo wusitela wuzime.
49Amuno awantu wonsi walilungwa numulilo. 50Umuchele wazipa; ukuwa ndiwasukuka, nga mungaleka wuwe amuchele swinya wuli? Muwe numuchele mwakwemwemwe, muwakwikala umutende mwensi.
Selectat acum:
Marko 9: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
