Marko 5
5
Yesu apozya umuntu wino walwile imizimu miwipe
(Mateyu 8:28-34; Luka 8:26-39)
1Awaya mumbalama yakwe sumbi wa Galileya, munsi ya waGerasa. 2Ala vino Yesu wafuma muwato umuntu wino wafumile kumalalo munkungwe amusunkania. 3Umuntunye weyo walinji numuzimu wuwipe, wikalanga muzyankungwe. Awantu wapotwanga ukumunyepa niminyololo awamuleka wowonye; 4wanyepwanga amanama namakasa impindi mvule, lelo impindi zyonsinye zino wanyepwanga waputulanianga iminyololo, avuninkania nivyela vino wamunyepelelanga kumanama. Walinji achinkula kukuwoma swinya patalinji wumwi wino angamulesya. 5Amanda yonsi uwusiku numusanya wapitapitanga muzyankungwe namumyamba, alanga akupunda nukuyilembania namawe.
6Pano waweni Yesu walinji akatalamuchila; achaleka asamala, aya apona pamanama yakwe, 7apunda nizwi kulu ati, Yesu, we Mwana wawamwilewelewe e Leza! Nga ukulonda nani chani? Muno ankumbu zyakwe Leza, nkukulambilizya, utize unsunde! 8(Wavwanzile wonye-woo muno Yesu wavwanganga nawe akuti, Wemuzimu wuwipe-we, fuma mumuntunye wee!)
9Achaleka Yesu amuwuzya ati, Ngizina lyako weweni?
Umuntu atolelela ati, Izina lyane ne Liwumba—swewavulenye! 10Alanga akulambilizya Yesu ukuti atize afumye imizimu miwipe munsinye yoyo.
11Kwalinji uwufyo wukulu wakwe wakapoli mumbali yamwamba, walyanga. 12Imizimu ilambilizya Yesu iti, Tutume mwakwe wakapoli, tukinjile mwakwe woliwo. 13Ayizumulizya. Imizimu miwipe ifuma mumuntu iyinjila mwakwe wakapoli. Uwufyo wonsinye—nche wakapoli imyanda ikumi impindi ziwili (2,OOO)—awafontomoka mumbali yakwe mfuzi awaya awapuwila mwesumbi awang'wela.
14Wano wachemanga wakapoli awasamala awaya awasasya amazwi mukaya namuzyampunda. Awantu awaya mukulola chino chaponile. 15Awaya kwe Yesu awalola umuntu wino walinji niwumba lyamizimu miwipe. Wisile paponye, azwite alinamano yakwe; wonsi awatina. 16Wano waweni chochonye awaya awanena awantu chino chachisilwe kumuntu wino walinji nimizimu miwipe, awawanena nivyakwe wakapoli. 17Achaleka awatalika ukulambilizya Yesu ukuti afume munsi yawo. 18Ala vino Yesu akwinjila muwato, umuntu wino wawanga nimizimu miwipe awamulambilizya akuti, Nzumilizya tupite swensi!
19Ukuwa Yesu nanti kumuzumilizya. Ukuwa amunena ati, Yanga kumwinu kunko zyako ukawanene vino Imfumu e Leza wakuchitila, ukawanene vino walinji ninkumbu kwewewe.
20Achaleka umuntu apita mutwaya ikumi monsi alanga akunena awantu chino Yesu wamuchitizile; nawonsi wano wivwile awazunguka.
Umwanamukazyana wakwe Jailosi nga numwanachi wino wakumvizye umwinjilo wakwe Yesu
(Mateyu 9:18-26; Luka 8:40-56)
21Swinyanye Yesu alamba sumbi aya kumbalama. Kokonye mumbali yakwe sumbi iwumba kulu aliwungana alimuliwilizya. 22E Jailosi, esongo wang'anda yakupepela iyakokonye, aya kweneko, ala walola Yesu apona pansi mumanama yakwe 23amulambilizya nkani ati, Akanane akachanachi akalwale nkaninye. Nazina tuyange ukawike amakasa yako pekoliko, alyakuti kapole kawe nuwumi!
24Ngapano Yesu apita nawe. Niwumba kulu alimukonka alimutitichizya mumbali pano wakupita.
25Kwalinji umwanachi wino wapitilizile ichilumelume kumyaka ikumi nayiwili, 26chingatenga ing'anga mvulenye zyamupanga imilembo. Wasumvile indalama zyakwe zyonsi-pyu, atatela awe ichete nindwala ilanga ikulandalila iwipisya ilusya. 27Umwanachinye weyo wivwile ivyakwe Yesu, achaleka aya mwiwumba kunsizi. Ayelengania ati, 28Ndinakumvya nanti amyinjilo yakwe mitupu, nandi mpole.
29Aya akumvya ichilundo chakwe Yesu apola paponye; awakwelengania mumwezo wakwe ati wapola kundwala yakwe. 30Nanti kuzimbanye Yesu ayimanya kuno amaka yamufumile. Apiluluka mwiwumba ati, Ngaweweni wino wakumvya ivizwalo vyane?
31Awasambilizi wakwe awatolelela awati, Napano ukulola iwumba likutitichizizye awoo; nguwati ngaweni wakukumvya?
32Ukuwa Yesu alanga akutalangania ukuti alole wino wamukumizye. 33Umwanachi amanya chino chachisilwe kweweliwe; achaleka aya kwe Yesu, mbali nukuzakaza nintete, aya apona pamanama yakwe, anena Yesu vyonsi nanti kufisa chimwi. 34Yesu amunena ati, Mwanane, isuwilo lyako lyakupozya. Pita ulumi, upole indwala yako.
35Ala pano Yesu achili akuvwanga vyovyonye, intumi zimwi azifuma kung'anda yakwe Jailosi azimunena aziti, Umwanako wafwa. Ngachani chino uchili ukutamya Umusambilizya?
36Yesu weni nanti kupechela chino intuminye zyozyo zyatasile, ukuwa anena Jailosi ati, Utatina, ukuwa suwila.
37Nanti apakuti azumilizye umuntu wumwi amukonke suka ndi we Peter nu Jemusi nga nu Yohani umunyina. 38Awafika pang'anda yakwe songonye weyo, Yesu alola ukuluwaluwa ayivwa nukulosya kukulu mbali nukusinsimuchila. 39Ayinjila mung'anda afika ati, Nga ukuluwaluwanye koo akwachani? Ngamukulila chani? Umwana atafwile—aponechile wowo!
40Awatalika ukumusoweka, achaleka awinga wonsi awafumila palonde, asenda yisi wamwana nunyina, apaliponga nawasambilizi wakwe wotatu, awinjila mung'anda muno umwana walazile. 41Amulema ikasa amunena ati, Talita, kumi, chino chikusula ukuti, Mukazyana mutichi! Nkukunena nkuti, Katuka!
42Napaponapapo akatuka awapitapita. (Walinji awamyaka ikumi nayiwili.) Achila chonye-choo chachitwa awazunguka nkaninye! 43Ukuwa Yesu weni awakomelezya nkaninye ukuti watize wanena wumwi, ati, Mupani chimwi alye.
Selectat acum:
Marko 5: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
