Marko 2
2
Yesu apozya umuntu wino walwile ichintendya
(Mateyu 9:1-8; Luka 5:17-26)
1Akula kwapita amanda matichi, Yesu anyochela ku Kapemahumi, amazwi ayakwila monsi kuno Yesu walinji mung'anda. 2Achaleka awantu wavule wawungine kweneko awizula mung'anda yonsi, namumulyangonye namasyo ayasowela kumwi. Yesu wawawizizyanga Ilandwe zima, 3pano awantu wano, wasenzile umuntu wino walwile ichintendya, wamutwalanga kwe Yesu. 4Ukuwa muno aliwumba, awapotwa ukufisya umulwalenye weyo kwe Yesu. Achaleka awasansula pamusonje papela wulunga napano Yesu walinji. Awala vino wasansula, awasolosezya uwachintendya pansi, nichitala chakwe pano walazile. 5Ala Yesu walola isuwilo lyawo, anena ichintendya ati, Mwanane, amawembuko yako yatetelwa.
6Awasambilizya wamasundo wamwi wano wisile paponye awelengania awati, 7Ngamuno chani chino akuvwanjila Leza umusamu wonye-woo? Pasi umuntu wumwi wino angatetela uluwembu; nkandi e Leza wenganye-nsu!
8Napaponapapo Yesu amanya amelengania yawo ayankama, awanena ati, Ngamuno chani chino mukwelengania ivintunye vyoo? 9Wuzye mukuti achintu chipepuke ukunena umuntu wachintendya weee ukuti, Amawembuko yako yatetelwa? nanti akuti, Katuka, senda ichitala chako, uwapita? 10Kanonzi nandi mbalanjizye, kuno uMwanamuntu ali namaka munsi ukutetela amawembuko. Achaleka anena echintendya ati, 11Nkukunena nkuti, Katuka, senda ichitala chako, uye kumwinu!
12Walile pano awantu wonsinye wakulola, chintendya akatuka, asenda ichitala chakwe, apita nanti kuzinguluka. Wonsinye awazunkuka awatumvya Leza awati, Tusitela tulole ichamwatanye woo!
Yesu ayita Levi
(Mateyu 9:9-13; Luka 5:27-32)
13Yesu anyochela mumbali yakwe sumbi wa Galileya swinya. Iwumba lyonsi aliya kweweliwe atalika ukuwasambilizya. 14Ala vino akupita alola kasonchezya wamusonko, e Levi umwanakwe Alifeyu, ayisile mung'anda yamusonko. Yesu amunena ati, Nkonka. Levi akatuka amukonka.
15Pansizi Yesu awalya ichakulya mung'anda yakwe Levi. Iwumba kulu ilyakwe wakasonchezya wamusonko nawawembu awakonka Yesu, nawamwi awikala apaliponga nawe nawasambilizi pachakulya. 16Awasambilizya wamasundo wamwi, awa Falisi, awalola kuno Yesu walyanga ichakulya nawawembu wawo nawakasonchezya wamusonko, achaleka awawuzya awasambilizi wakwe awati, Ngamuno chani chino akulya nawantunye wawo?
17Ala Yesu wivwa awatolelela ati, Awapuma wasifwa nukulonda ing'anga, nkandi awalwale. Ntatunjila ukwita awalungamane, nkandi awawembu.
Iwuzyo kuvyakukana ukulya umwenzo
(Mateyu 9:14-17; Luka 5:33-39)
18Impindi yimwi awasambilizi wakwe Yohani kabatizya nawa Falisi wakanile ukulya umwenzo. Awantu wamwi awaya kwe Yesu awamuwuzya awati, Ngamuno chani chino awasambilizi wakwe Yohani kabatizya nawasambilizi wawa Falisi wakukana ukulya umwenzo ukuwa awasambilizi wako pole?
19Yesu atolelela ati, Wuzye wano wayile kuwinga wangikala nanti kulya? Nanti katichitichi! Ponsinye pano wali nusiwinga watanga wakane ukulya. 20Ukuwa impindi iliyiza pano siwinga alisendwa afume kwewoliwo; pawandanye wowo apano walikana ukulya.
21Pasi wumwi wino akapatika impatikwa yamwenda wupya kuchizwalo chikali. Ndiwapatika, impatikwa yamwenda wupya inganyonkola umwenda wukali, nga itolo likule lilutilizye. 22Swinya pasi wino akuwikanga ipalapya mumyuwa mikali. Ndiwachita wowonye, ipala lingalepula umuwa, ngavyonsinye ipala nimyuwa vyononeke. Awe! Imyuwa mipya ayili yakuwichila ipala'pya!
Iwuzyo kuvyawanda wakusolezya
(Mateyu 12:1-8; Luka 6:1-5)
23Yesu wapisile muvyalo vimwi ivyankumba pawanda wakusolezya. Nga awasambilizi wakwe wano walinji nawe awatalika awafyanula imitwe yankumba. 24Achaleka awa Falisi awanena Yesu awati, Lola, awasambilizi wako wakonona isundo litu pano wakuchita wonye-woo pawanda wakusolezya!
25Yesu awatolelela ati, Wuzye mutawazya chino Davidi wachisile pano inzala yamulumile? Inzala yamulumile nawano walinji nawo, 26achaleka winjizile mung'anda yakwe Leza alya ichakulya chimichile kwe Leza. Chonyechoo chachisilwe pano Abiatara walinji wesimapepo mukulu. Isundo litu lyazumilizya wasimapepo watupu ukulya ichakulya chamwatanye woo—ukuwa Davidi walile, apa nawantu wakwe awalya.
27Yesu apelelechezya namazwi yakuti, uwanda wakusolezya wizizile umuntu; umuntu atizizile uwanda wakusolezya. 28Achaleka Umwanamuntu awili mwenisabata.
Selectat acum:
Marko 2: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
