Marko 15
15
A watwala Yesu kwe Pilato
(Mateyu 27:1-2, 11-14; Luka 23:1-5; Yohani 18:28-38)
1Akula kwacha mwepwi wasimapepo wakulu awasunkana nawasongo, nawasambilizya wamasundo, niwungwe lyonsi lino lyayile kweneko, awuma inkama. Awanyepa Yesu niminyololo, awamusenda, awamutwala kwe Pilato. 2Pilato amuwuzya ati Wuzye wemfumu yawa Yuda?
Yesu amutolelela ati, Wataka molimonye.
3Wasimapepo wakulu awavwanjila Yesu wuwi ivintu vivule, 4Achaleka anyoka amuwuzya swinyanye ati, Wuzye usinakutolelela chimwi! Silola ivintu ukuvula vino wakukuvwanjila uluwi!
5Swinya Yesu nanti kutolelela chimwi, achaleka Pilato azunguka.
Yesu apanzizwa imfwa
(Mateyu 27:15-26; Luka 23:13-25; Yohani 18:39—19:16)
6Penye pampindi yachakulya chakuyitopwa Pilato walinji numwata wakusapula uwavingololo wumwi wino iwumba lyalondanga. 7Pampindinye yoyo kwalinji umuntu wumwi wino witwanga ilyakwe Barabasi; walinji muvingololo apaliponga nawachisanguka wano wakomile wantu mumponzela. 8Achaleka lyalile iwumba lyawungana awawuzya e Pilato ukuti awachitile ndimuno wachitilanga, e Pilato awawuzya, 9ati, Wuzye mukulonda mbasapulile imfumu yawa Yuda? 10Wamanyilenye-nto kuno wasimapepo wakulu walemesile Yesu kweweliwe muno awuzuwa.
11Ukuwa wasimapepo wakulu awasonjelechezya iwumba ukuti, alele awasapulile Barabasi. 12Swinyanye Pilato avwanga kwiwumba ati, Ngafwandi mukulonda nchite wuli numuntu wino mukumwitanga mukuti amfumu yawa Yuda?
13Awapunda awati, Mupamantile pawuchingane! 14Pilato awuzya swinyanye ati, Nga watala mulandu-chi? Wonsinye awapongomoka apaliponga awati, Mupamantile pawuchingane!
15Pilato awalonda ukuti atimye iwumba, achaleka awasapulila Barabasi. Ngapano avyapula Yesu awalemeka ukuti wakamupamantile pawuchingane.
Awavita awakwalangania Yesu
(Mateyu 27:27-31; Yohani 19:2-3)
16Ngapano ivita avisenda Yesu awamutwala muluwanza (akuli kuti, mwisana lyamulasi) nga awita iwumba lyonsi. 17Awazwika Yesu umwinjilo wuwenzu, awaluka akamba kamyunga, awamuzwika kumutwe. 18Nga awamulamuka wakuti, Ndimfumu yawa Yuda ilandile iwe nuwulanzi wutali! 19Awamuponkola pamutwe ninsonzo, awamuswilila amati, awasokowala namakokola yawo, awamufukamila. 20Awala wamala ukumwalangania, awamuzula umwinjilo wuwenzu awamuzwika imyenda yakwe. Ngapano awamukolezya awaya kukumupamantila pawuchingane.
Yesu apamantilwa pawuchingane
(Mateyu 27:32-44; Luka 23:26-43; Yohani 19:17-27)
21Awala pano wakupita awasunkania umuntu wino witwanga ilyakwe Simoni, wafumile mulutala akuya mukaya, nga awamupatichizya ukuti asende uwuchingane wakwe Yesu. (Umuntunye wee walinji we Simoni wino wafumile ku Kureni, eyisi wakwe Alekizander nu Rufasi.) 22Awatwala Yesu kumasyo yano yakwitwanga Golgota, chino chikusula ukuti, Amasyo Yipanga. 23Paponye awamupa ipala sanzinkane numulembo ukuti ang'we, ukuwa Yesu akana ukung'wa. 24Achaleka wamupamantila pawuchingane nga awankana ivizwalo vyakwe, awapenda ukuti walole wino wandi asende. 25Lyatezile lyakwela pano wapamantizile Yesu pawuchingane. 26Pamutwe wakwe awawika ichimanyilo chino chawalisilwe penepo ukwambwa kwakwe ukwakuti, Mfumu yawa Yuda. 27Ngapano awapamantila apaliponga nu Yesu awang'o wawili pamawuchingane, wumwi kwikasa lyakwe ndilo numuwuye kwekamani. [ 28Mumwatanye woo amawaliko matele ayafiswa yano yati, Walinji apaliponga nawasimilandu.]
29Awantu wano wapitanga penepo awapunzya imitwe yawo nukufondomola intusi wakutuka Yesu wakuti, Aha! Wenji ungamongola ing'anda yakwe Leza unyoke uyizenge swinya mumanda yatatu! 30Ale, si-fwandi yika pawuchingane uyitule!
31Awuliwonganye nawasimapepo wakulu nawasambilizya wamasundo awakwalangania Yesu wakuti, Watulanga wanji, ukuwa atanga ayitule umwenecho! 32Katutele tulole vino Mesaya, imfumu yawa Israeli, akwika pawuchingane kanonzi, apano twamusuwila!
Ngapano nawawilinye wawo wano wasayisilwe apaliponga nu Yesu, awamutuka.
Imfwa yakwe Yesu
(Mateyu 27:45-56; Luka 23:44-49; Yohani 19:28-30)
33Alila ilanzi lyafika papela pamutwe imfinzi ikoma munsi yonsi, ilanga ikomile mpaka amaora yatatu. 34Alila ilanzi lyasenuka Yesu apunda nizwi kulu ati, Eloyi, Eloyi, lemasabaktani? Kuno akuli kuti, Leza wane, Leza wane, ngawansila chani?
35Awantu wamwi wano walinji paponye awivwa awati, Si-yivwani, akwita Eliya! 36Wumwi uwakwe woliwo asamalila kweneko nupamba, atimpika mwipala, awika kunsonzo kunsongo. Asombechezya kumulomo wakwe Yesu ati, Techelani, tulole ndi Eliya wandi ayize amwisye pawuchingane!
37Yesu alila nizwi kulu nkaninye, aputuka afwa.
38Ngapano ichimwenda chakuchinga chino chachinzilwe mung'anda yakupepela achilepuka pawili, ukufumilila papela mpaka pansi. 39E musika wavita, wino wimilile pankolelo pawuchingane, waweni vino Yesu walizile afwa. Ati, Nachawuzimanye: umuntunye wee walinji a Mwanakwe Leza.
40Awanachi wamwi walinji paponye, walolanga lwapatali. Pawanachinye wawo palinji e Mariya wa ku Magadala, nu Mariya enyina wakwe Jemusi mutichi nu Josesi, nu Salome. 41Wakonkanga Yesu pano walinji mu Galileya wamwavwanga. Nawanachi wanjinye awavule walinji paponye, wano wayile nu Yesu kwe Yerusalemu.
Ukuzikwa kwakwe Yesu
(Mateyu 27:57-61; Luka 23:50-56; Yohani 19:38-42)
42-43Lyatezile lyatemba pano e Jozefu wa ku Arimatiya watezile wafika. Walinji wesongo wiwungwe, wino walolelanga ukwiza kwa Wufumu wakwe Leza. Walinji awanda wakuyiyania (kuno akuli kuti, uwacha wuwe awanda wakusolezya); achaleka Jozefu aya kwe Pilato asinime afika amulenga
ichala chamuwili wakwe Yesu. 44Pilato azunguka nkaninye pakwivwa kuno Yesu wafwile nanti kuzimba. Ayita musika wavita amuwuzichisya ndipano Yesu wafwizile patezile pazimba. 45Ala Pilato wivwa ukulongola kwakwe musika, anena Jozefu ukuti akasende ichala. 46Jozefu wayile numwenda wutelepe, ayisya ichala, achivwimba mumwenda, aya azika munkungwe yino yatezile yafolonkontwa mwemfuzi. Nga akunkulusizya iwe kulu pankungwe. 47E Mariya wa ku Magadala nu Mariya enyina wakwe Josesi walolanga, awalolechesya pano Yesu walambalisilwe.
Selectat acum:
Marko 15: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
