Mateyu 15
15
Imisambilizizye yakwe watatakulu
(Marko 7:1-13)
1Apano awa Falisi wamwi nawasambilizya wamasundo awafuma kwe Yerusalemu awaya kwe Yesu awamuwuzya awati, 2Ngamuno chani chino awasambilizi wako wakukana ukutontela imisambilizizye yino watatakulu watupile? Wasisamba kumakasa ichete ndimuno chazipila pano wakulya!
3Yesu atolelela awanena ati, Ngamwenji amuno chani chino musinakutontela isundo lyakwe Leza ukuwa mukukonka imisambilizizye yinu? 4Amuno Leza wavwanga wati, Uwachindika eso nunyoko, nawensi wino akuvwanjila yisi nanti wenyina uluwi, wazipila imfwa. 5Ukuwa mwenji mukati wensi wino wanena yisi nanti wenyina wati ichintu choo chino ungalonda nkupe, napa Leza kali, 6umuntunye wee mwenji mukutanji chingatenga atapa umukwasi, asi numulandu. Wowonye avino mwakana ukupechela izwi lyakwe Leza mwakonka imisambilizizizye yinu. 7Mwewakachenjezyamwe! Ye-mwe vino Ayizeya watumilwe ichete ivinu, ati,
8Awantunye waa wakanchindika namazwi yawo matupu, wakuti Leza-Leza,
ukuwa imyezo yawo ili ukutali nani.
9Achavye-chavye ukumfukamila,
amuno wakusambilizyanga amasambilizyo yamasundo yawuntu ngati amasundo yakwe Leza.
ivintu vino vikakombezya umuntu
(Marko 7:14-23)
10Yesu ayita iwumba alinena ati, Teyelezyani, mwivwichisye! 11Chisi achino chikakwinjila mumulomo achino chikakombezya umuntu; ukuwa nkandi chino chikafuma mumulomo achino chikakombezya.
12Ngapano awasambilizi wakwe awaya kweweliwe awati, Wuzye umanyile kuno awa Falisi walumilwe mumyezo nkaninye pano wivwile wonye-woo?
13Atolelela ati, Umuti wonsi wuno asi a Monsi wane uwamwiyulu walembeka, wulinyunkulwa. 14Walekani! Awakakolelela ntonko; chino ndi intonko yakolelela intonko mbuye, wonsinye wowili wangaponela muchizinji.
15Peter asimpuka ati, Tunene chino umulumbenye woo wukusula.
16Yesu ati, Namwenye mutani muwe namano ukulusye wanji. 17Wuzye mutilusile? Chonsinye chino chikakwinjila mumulomo wamuntu chikuyanga munda achinyoka achifumila kulonde. 18Ukuwa vino vikafuma mumulomo vikafuma mumwezo; vyovyonye avino vikakombezya umuntu. 19Amuno mumwezo wakwenye amuno amelengania mawipe ayamukolelela awa wechikoma, amuzelele, nukuchita ivintu vinji iviwipe; ukupoka, ukuwipizya, nukunenia. 20Vyonye-vyoo avino vikakombezya umuntu. Ukuwa ukulya namakasa matifi ndimuno wakuwanenela ukuti muwasamba—vyeni visikombezya.
Isuwilo Jyamwanachi
(Marko 7:24-30)
21Yesu afuma kweneko aya munsi yino vyapalamine nutwaya twamwe Ture nu Sidoni. 22Umwanachi umu Kenani wino wikalanga muchipya chansinye yoyo aya kwe Yesu. Afika akuta inkuta ati, We Mwanakwe Davidi, mfwila inkumbu. Nazina! Umwanane umukazyana ali numuzimu wuwipe wuno wumuvulunginie mwalwe.
23Ukuwa Yesu nanti kumutolelela chimwi. Awasambilizi wakwe awaya awamulambilizya awati, Muwinge apite! Akutukonchelela nukuchita ichongo!
24Ukuwa Yesu atolelela ati, Ukuwa nenji ntatumilwa chinji nkandi kung'onzi nsowe izyawantu wakwe Israeli. 25Ala umwanachi wivwa wowonye apupuka aya apona pamanama yakwe Yesu. Ati, Tatakulu! Ntula.
26Nawe atolelela ati, Chisi achizima ukusenda ichakulya chawana usumbila imbwa.
27Atolelela ati, Molimonye, tatakulu; ukuwa nimbwanye zikalya imvongonyo zino zikupona pano wayisikulu wakulya.
28Achaleka Yesu amutolelela ati, Wemwanachi wisuwilo kulu wuli! Chino ukulonda chandi chichitwe. Pakapindinye kako umwanakwe apola nukupola.
Yesu apozya awantu wavule
29Yesu afuma mumasyonye yayo akonka mumbali yakwe sumbi wa Galileya. Akwela umwamba ayikala pansi. 30Amawumba makulu ayaya kweweliwe, wasenzile awalemale, nintonko, nawachikonta, nawawiwi, nawalwale wanji awavule, awaya awawalambalika pamanama yakwe Yesu; awapozya. 31Awantu awazunguka pano walola wiwi akuvwanga, wachikonta wapola, nawalemale wakupita, nintonko zikulola; awatumvya Leza wawa Israeli.
Yesu alela imyanda ikumi impindi zini (4,000)
(Marko 8:1-10)
32Yesu ayita awasambilizi wakwe awanena ati, Indi nichilanda kuwantu waa, amuno wikala nani kanonzi yawa amanda yatatu, wasi nichakulya. Nsinakulonda ukuwataya ukuti wapite nanti kulya chimwi, amuno nche pamwi wangafwa ulupwe munzila pano wakuya kumwawo.
33Awasambilizi awamumuzya awati, Ngafwandi monye-moo mulumpalang'ang'a twandi tuzane ichakulya chino chingalela iwumbanye lyoo kwi?
34Yesu awawuzya ati, Ngafwandi muli nimisumba yinga?
Awamutolelela awati, Tuli nimisumba munenulambali, ninswi ntichi.
35Achaleka Yesu anena iwumba ukuti likale pansi. 36Ngapano atola imisumba munenulambali ninswi, asalifya kwe Leza, amenyania apa awasambilizi wakwe, nawo awapa awantu. 37Wonsi awalya awikuta. Awasambilizi awasenda ichakulya chino chasyazile awalonga muvitundu munenulambali. 38Ukuvula kwawantu wano walile ichakulya walinji imyanda ikumi impindi zini (4,000), nanti kuwazizya apaliponga nawanachi nawana.
39Nagpano Yesu aleka amawumba ayapita, nawe ayinjila muwato, aya munsi ya Magadani.
Selectat acum:
Mateyu 15: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
