Habakuku 3
3
Ipepo lyakwe Habakuku
1Ipepo lyamutumwa e Habakuku. 2We Mfumu Leza, nivwa chino wachita,
nawa nintete.
Ale, chita swinya kanonzi mumpindi zitu
uchite ivikalambane vino wachitanga.
Waninkumbu, chingatenga wavitwa.
3Leza akwiza swinya ukufuma ku Edomu;
e Leza mutele akwiza akufuma kumyamba yakwe Parani.
Uwukankala wakwe wakwila mwiyulu;
insi yonsi ikamutumvya.
4Akwizanga nukumekuka kwankuwa;
ukumesya kukafuma mwikasa lyakwe,
momonye amuno amaka yakwe yavwama.
5Akakolezya indwala;
nga atuma imfwa ikonka.
6Ndi wimilila, insi iwatenta;
ndi walola imyiko iwazakaza.
Imyamba yamuyayaya yalepunkana;
imyamba yamuyayaya yasiwila pansi,
imyamba yino wapisile mwenemo mumpindi nkali.
7Nalola awantu wa ku Kushani wali nintete;
nawantu wa ku Midiani wakuzakaza.
8Wuzye anduzi azino zyakuvitisisye, Mfumu Leza?
Wuzye wesumbi awino wakukalazizye?
Wakwelezile pamawingo;
ichipunga chamawingo achino lyalinji aligereta lyako,
pano wapanga awantu wako amaka yakuchimvizya.
9Wayisenginie uwulapwa,
imivwi yizwile muchisengulilo.
Ukupanta kwako kwalepunkinie insi.
10Imyamba yalanga yakulola izakaza;
aminzi ayitika ukufuma mumawingo
Aminzi yamuzizimya pansi ayatantala,
namang’wimbi yaminzi ayakatuka ayaya mupela.
11Pakumekuka kwamivwi yako iyaluwilo
nukumekuka kwakuzikimila kwisumo lyako,
ilanzi numwezi avyimil ila-mya,
12Wapisile uchilingania insi nichipyu;
ulyatanjila imyiko nukukalala.
13Wafumile uya utula awantu wako,
kukuyatula imfumu yako insolwe.
Uyuma enankolelo wawawipe umusumba napansi
ulovya wane wamukonkanga awalowelela.
14Imivwi yako ilasa emusika wavita vyakwe,
pano vyizile ngati a chipunga kukwiza ’tusalangania, vyalinji ni chilumba ngati awano wakakalalila awalanda munkama.
15Walyatanjizile sumbi nawakavwalo wako,
naminzi yamaka ayatutumuka itotofulu.
16Nivwa vyoo vyonsi, nawa nintete;
imilomo yane ikuzakaza kuntete.
Inkusintuchila,
namatamba yane yakumpunuzya.
Nandi ndalindilila impindi yino iliyiza chimyamya
pano Leza alisunda wane wakatulwisya.
17Chingatenga imikunyu isi namaku,
swinya nivikomwa vyakusuta ipala visikula muvyalo;
chingatenga nanti kusiwa ivikomwa vya mafuta,
namuvyalo musiwa amalezi;
chingatenga ning’onzi zyonsi zikafwa,
na munduwa mulanga musi ivikwato;
18ndilanga indi nichimwemwe nukuzewela,
amuno Imfumu e Leza wekatula wane.
19Imfumu e Leza akumpanga amaka,
akumpanga uluwilo ngati aluwilo lwakwe mpombo,
akulekanga nkupita umutende, mupela-pela.
Selectat acum:
Habakuku 3: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.