Roomaxituse 7
7
Muse woga garafa shahutte
1Nuundo nayshito! Woga ere hinusuko ta zeere. Wogay axi gara adeto e keengesi axi yese aallowo e maaqenike erako hi ere. 2Ade gella indoy adey yese aallo wolko wogana tufuttiko i yese yeydi hiyoko. I adey baado geedema esaara wolko tutti gaddecha woga garafa birchuttiko i yese. 3Ha e gisha i adey yesune fede ade handi i gellako laggetako i laggetto yeydi hiyoko. I adey baado geedema esaara wolko be tufuttecho woga garafa attiko i yese. Fede ade gellako laggetto baanniko. 4Nuundo nayshito! Hinuni ye esuke Kristosay axe maaddhi e haydhoniyaka hinunini esaara wolko haydhi Muse woga garafa shahutti fedase yeydi hiyoni haybowafa dendasuse maaddhiko hi yese. Yoonase Wontose hanti aafe nu kaxhoronikeko e maaddhese. 5Ye esini nu acho maxoke nu yechoniyaka wogay en'usicho iita maxoy haybose aandi elluse aafe nu kaxhoronike nu axetowaka hantiyako e yecha. 6Hattema numba tuttecha woga garafa haydhi hade shahuttonike nu shahuttese gisha nu tufuttecho woga garafa birchuttiko nu yese. Ha e gisha ha e geede maala maaddhi esuse nu hantesi Ayaanay oto kille ogena baaka diizutti yecha olo wogay ohenike maaquwasso.
Muse woga gishaara cubbo gishaara
7Yoonase abaydiwu nu hiye? Wogay beese cubbowa? Oo'o, cubbo maaquwasso! Cubboy aba maaqenike wogay ohe dheeddako eruwadiko ta yecha. Ye esini wogay <<Col'ofuna>> yeydi hiye e dheeddako col'ay aba maaqesa eruwadiko ta yecha. 8Cubboy wogay ohesa goyndi be bishana bishana yese iita col'ay taaka meddhuttoronike e mato. Wogay otosi dheeddakoma cubboy haydhese abakoko. 9Buro tani wogay woosesa siido badi yesine ta eetonikeko ta yecha. Wogay yoodo geedema cubboy addaa kessi en'a maaddhineko tani Wonto garafa shahutti haydhesesa maaddho. 10Yeso ingese wogana ohuttecha woossoy ta gara haybo e oodonike ta gaxxho. 11Ye esini cubboy wogana ohuttecha woosso goyndiko tamba e qaarusso. Ye woossona tamba e woddho.
12Yoonase wogay haylako, e woossoni haylako, gizowara modhiyarako. 13Hine ye modhe maaqe abakoy ta gara haybo e oodo hidi hiyowa? Oo'o! Haybo oodasimay cubboko. Cubboy beese cubbo be maaqenike eruttesuko modhe maaqe abako goyndi haybo ta gara e oodo. Ha e gisha cubboy keddaydese iita maaqenike e addeynesi wogay woosso badenako.
Axi be muxhurowanna kardutte kardo
14Wogay Wontokofa maaqenike erako nu ere. Tanimay cubbaxe maaqe axuko, cubbose hade maalake zal'uttiko ta yese. 15Ta hante abakoy taase geluwasso. Ye esini ta eehe modhe abako hante dhaddiko ta inxha'e iita abako ta hante. 16Yebo, ta hantesi ta eehuwa iita abako e maaddho geede <<Wogay modheko>> hidiko ta hine. 17Hinne hantese ta worguwa abako taa hantusesi taaka yese cubboko baaka tamba maaquwasso. 18Taakaaka yeydi hiyoni meddhona cubbaxe maaqe ta oonuntiyaka abani modhe abakoy baannike erako ta ere. Modhe abako hantese col'ako ta col'e. Col'uwamba baaka modhe hantese danda'uwasso. 19Modhe hanta hantese worgisine ye esa hantuwasso, ta hantesimay hantese ta wordo baa iita abakoko. 20Hantese ta wordo baa abako hantesa ta maaddho geede ye esa taa hantusesi tamba e maaddho baane taaka yese cubboko.
21Yoonase uddi wogga taaka hantuttesako ta beene. Modhe hantese ta worgusune iitawoko ta hante. 22Ta gawwaana Wonto wogana maggako ta magge. 23Magguwamba baaka fede wogako be sunxuna sunxuna yese ta gara giddaaka e hantusune ta beene. Esini ta axeto giddaaka hantiyaka yese cubbo wogana tamba tufaxe mati ta maxowaka Wontoy gaddese wogaara wolko darguttiyako e yese. 24Aba waydese maddha giddaa gellese axuna tani? Hayboko tamba etti aamiyaka yese ha ta axetowafa oonewa tamba maaresa? 25Nu Laaxi Yesuusi Kristosana Wontose galatay elluwaye. Yoonase bidzi badena Wontoy taaka gaddese wogase ta maxona e maala maaddhiko ta woosutte, assi fede badena cubbaxe maaqe ta oonuntena cubbo wogase e maala maaddhiko ta woosutte.
