Kakpiʔiligele 28

Pɔli wi sɛ́nì lɛ̀lɛ láà kúɔ Maliti tiʔɛ nī

1Bà we kɛ́nì paʔa nɛ̀ suɔ nɛ̀ kúɔ wè, a we nɛ́ peli nɛ̀ ki dàala ni tiʔɛ ki míʔɛ cɛ́n gè: pe 'puu nɛ ki ye Maliti, luʔɔ sunʔɔmɔ nī ki 'puu. 2A ki tiʔɛ siɛnnɛ pe 'weli cò cɛ̀ngɛ. Ki 'nyaa pe cé kàsun kpíʔile nɛ́ weli yeri we- sa waʔa, bɛ̀ kàsaʔa ki 'puu nɛ báan gè á wiire ní de nɛ kúru dè.

3A Pɔli wi 'kásɛnbiire fàa nìʔɛrɛ bè sa le kàsun nī gè. A ki 'nyaa wɔmɔri 'puu baa, bà kàsun sífalimɛ pi 'ki taa wè, a ki 'tári Pɔli kɔli nɛ̄ gè nɛ wi nɔgi. 4Bà Maliti tiʔɛ siɛnnɛ pe 'wɔ̀bugɔ nyaa gè fàandarigɛ Pɔli kɔli nɛ̄ gè, a pe 'yɛ̀ nɛ nyu níɛ pìye wéli, nɛ́ jo: «Cí, siɛnkpuuwo wī nàguɔ ŋáà wè, wi 'gbɛ̀ nɛ̀ suɔ luʔɔ mɛ́ gè; weli tiʔɛ lògo kiì sí yéri ki nɛ̄ wi- kò sìi nɛ̄ʔ.»

5A Pɔli wi 'kɔli yàʔara gè, a wɔ̀bugɔ ki láʔa nɛ̀ tuu kàsun nī gè; yafiɛn sì Pɔli taa wèʔ. 6Nɛ̀ sí ki taa Maliti tiʔɛ siɛnnɛ bálì pe 'puu nɛ ki sɔ̀ngí suɔnrɔ ti bé Pɔli fiɛ wè, wi- tuu bè kùu tiɛnugo nī gè. A pe kɛ́nì wéli nɛ̀ fùrɔ nɛ̀ ki 'nyaa yafiɛn sì wi taaʔ. A pe ń'nɛ̀ yiʔɛ nɛ nyu nɛ wáa dí kulocɛliɛ wáà wī.

7Baa we táanni bèle, dàala láà 'puu baa, pe 'puu nɛ ni kàfɔli ye wè Pobiliwusi, wire wi 'puu ki tiʔɛ siɛnkpuɔwɔ wè. A weli 'cɛnyɛ taanri kúɔ baa wi kpáa mɛ́ gè, a wi 'weli cò cɛ̀ngɛ nabɔnrɔ nɛ̄. 8A ki 'nyaa ki nàguɔ ŋáà wi tuu wi 'puu yaazinɛwɛ; céri ti yé fúugo wi nɛ̄, a cesinʔɛ 'wi cò. A Pɔli wi 'kɛ́ nɛ̀ sɛ́nì wi síɛri, nɛ́ kiyɛ taʔa yè wi nɛ̄ nɛ̀ náari wi mɛ́, a wi 'puʔɔ. 9Kire kàduʔumɛ gè, bìli pe mìɛni pe 'puu yaala ki kùlo náà nī lè, a pe 'kɛ́ Pɔli kúrugu wè, a wi 'náari pe mɛ́ a pe 'puʔɔ. 10Pe cé tɔ̀ni nɛ̀ kpuʔɔrɔ taʔa weli nɛ̄, nɛ̀ pínɛ bà weli cé ń'nɛ̀ kɛ́nì jíin kɔ́rikpuʔɔ káà nī nɛ waa wè, a pe 'weli kɛn yɛrɛ ní dìi ti cî gbɛ̀ weli màakuu nyuɔ wè.

Pɔli wi sɛ́nì nɔ̀ Wurɔmi kàʔa nɛ̄ gè

11Yeye taanri kire kàduʔumɛ gè, a weli 'jíin kɔ́rikpuʔɔ káà nī; ki cé yéri nɛ̀ wiire lɛ̀lɛ kúɔ lè baa Maliti tiʔɛ nī gè, gàa ki 'puu luʔɔ sunʔɔmɔ nī bè. Alɛgizandiri kàʔa wuulo wuʔu ki 'puu ki kɔ́rikpuʔɔ gè, pe cé míʔɛ le ki nɛ̄ nɛ ki ye «Nyìʔɛnɛ Pìŋɔrɔ#28.11 Nyìʔɛnɛ Pìŋɔrɔ: Ki 'nyaa pe cé ki yasunyɔ siin tɛn yè nɛ̀ tɛ́rigɛ kɔ́rikpuʔɔ ki fínaana yiʔɛ mɛ́ gè, pe 'puu nɛ pe ye Kasitɔri nɛ́ Polukisi. Peli mɛ́ bèle ki kulocɛlɛlɛ bálì peli bīɛlɛ pe nɛ kɔ́rikpuʔɔ baakuɔlɔ wéli bèle..» 12A we sɛ́nì nɔ̀ Siirakuzi kàʔa nɛ̄, a we 'tìgi nɛ̀ cɛnyɛ taanri kúɔ baa kire tiʔɛ nī gè. 13Bà we 'yiri baa kire tiʔɛ nī gè, a we 'kɔ́rikpuʔɔ fɛ̀ gè luʔɔ gògogo sɔ́ligimɔ nī bè nɛ̀ sɛ́nì nɔ̀ Eregiyo kàʔa nɛ̄. Ki kpìɛnduu gè a káfaligɛ káà 'yɛ̀ nɛ wáari cɛngɛnyɛnifolimɛ kàliige kɔli mɛ́ gè, a kire 'ki kɛn a we 'wári nɛ̀ jíin Puzɔli kàʔa nī gè cɛnyɛ siin larigɛ nī. 14A we 'weli tɛ́ngɛfɔnyɛninɛ pálì nyaa baa ki kàʔa nī gè, a pe 'we fiɛn a we 'cégboli kúɔ baa nɛ́ pe ní. Weli tánʔana ni tórigɛnmɛ pire pi 'puu mmɛ gè, fúɔ nɛ̀ taa a weli sɛ́nì jíin Wurɔmi kàʔa nī gè. 15Bà ki tiʔɛ tɛ́ngɛfɔlilɔ pe 'weli pɛn wori lúʔu dè, a pe 'pɛn nɛ̀ pɛ́nì weli kpàli fúɔ nɛ̀ sɛ́nì nɔ̀ Apiwusi kàʔa cɛ́ni nɛ̄ gè, nɛ́ Nabɔnminɔ Tìrigediɛyɛ Taanri tiʔɛ nī gè. Bà Pɔli wi 'pe nyaa bèle, a wi 'Kulocɛliɛ síɛri wè; wi cé ŋɔri taa.

16Bà we sɛ́nì jíin Wurɔmi kàʔa nī gè, a pe 'Pɔli yaʔa wè wi- puu wìimɛ, nɛ́ sí tí a kapiɛngbuɔnwɔ wáà 'kò baa nɛ́ wi ní nɛ wi wéli.

Pɔli wi 'juu nɛ́ Wurɔmi kàʔa Zuufulo pe yiɛgininɛ ní bèle

17Cɛnyɛ taanri 'tóri kire kàduʔumɛ gè, a Pɔli 'wi 'Wurɔmi kàʔa Zuufulo pe yiɛgininɛ yeri bèle pe- pɛn náʔa wire mɛ́. A pe pɛ́nì pìye pínɛ, a wi 'pe yɛ: «Mi siinyɛninɛ, bɛ̀ mi yē ŋɔ̀ wè, kasuulewe mi yē, nɛ̀ sí ki taa mi sì kolimɔ yafiɛn kpíʔileʔ weli kùlo ni kele nī gèleʔ, bé nɛ́ ga jo mi 'tánʔa nɛ̀ tuu weli tuuliɛlɛ pe kaliʔɛlɛ nī gèle wīʔ, á pe sí mi cò nɛ̀ le Wurɔmiyé pe kiyɛ nī yè bà ki 'líɛ baa Zerizalɛmi kàʔa mɛ́ gè. 18Bà pe sí yé kɛ́nì mi siʔɛ nɛ̀ wéli nɛ́ mi yúgo wè, piyè tuudiɛlɛ nyaa mi nɛ̄ʔ nàa ni 'yɛli nɛ́ mi kpúulo ní lèʔ, a pe sí puu nɛ caa bè mi yaʔa. 19Nɛ̀ sí ki taa bà Zuufulo pe yé cíi nɛ́ jo kire sǐ gbɛ̀ʔ kpíʔile gè, a ki 'jáa, a mi sí jo fúɔ kùlofɔgbuɔwɔ Sezari wi 'yɛli bè juu mi kàyuʔu nī gè; kiì sí kò majo mi 'ti taʔa mi kùlo wuulo nɛ̄ bèle wīʔ. 20Kire kɛnmɛ nɛ̄ mi sí nyɛ́nì yeli yeri we- pa wìye nyaa, bé sí juu nɛ́ yeli ní. Nɛ̀gɛjɔliyɔ nyáà yī mi nɛ̄ puɔyɔ nyàa yè, siɛn ŋíì nɛ̄ Isirayɛli wuulo pe 'pe sɔ̀ngirɔ taʔa dè, wire kɛnmɛ nɛ̄ tiī mi nɛ̄ puɔrɔ.»

21A pe sí Pɔli yɛ wè: «Tunduro fìɛ yɛ̀ baa Zude tɛ́nimɛ nī bèʔ nɛ̀ pɛn náʔa weli mɛ́ muɔ wori nɛ̄ dèʔ. Nɛ̀ pínɛ weli siinyɛni wáà fìɛ pɛn náʔaʔ nɛ̀ pɛ́nì muɔ sìpiimɛ wori juuʔ. 22Weli sí yē ki mɛ́ muɔ tíimɛ wè ma ga muɔ funzɔngirɔ juu dè weli lúʔu. Á kire 'laa wè, kowaligɛ#28.22 Kulocɛliɛ caagoligo káà gī kìiyɛ. gàa nī muɔ yē gè, weli nyɛ́nì ki cɛ́n siɛnnɛ piyē nɛ túngu nɛ́ ki koligo ní gè tiɛrɛ ti mìɛni nī.»

23A pe 'cɛngɛ káà tɛ́ngɛ bàga pìye nyaa. Bà ki cɛngɛ ki kɛ́nì nɔ̀ gè, a pe 'kɛ́ nìʔɛnɛ baa Pɔli wi kòridiʔɛ mɛ́ gè. A wi 'siɛnrɛ líɛ dè nɛ Kulocɛliɛ Kùlofɔligɔ ki wori nyu dè nɛ tìí pe nɛ̄. Nɛ̀ ki líɛ sínbinimɛ táanni bè nɛ̀ sɛ́nì nɔ̀ cɛnguʔɔ gè, wi 'puu nɛ ti nyu nɛ láʔala pe nɛ̄, níɛ Misa Fànʔa Siɛnrɛ nyu dè nɛ́ dàa Kulocɛliɛ siɛnjuuliɛlɛ pe 'sɛbɛ dè, nɛ ki tìí dí káaliyɛ wè Zezi wori nī dèʔ. 24Pàli cé yéri Pɔli siɛnjuuro nɛ̄ dè, a pàli 'ti cíi. 25Bà piyè cé bìɛʔ bèle, a pe kɛ́nì láʔala nɛ̀ kɛ́ gbɛ̀yɛgbɛyɛ. A Pɔli wi sí siɛnkɛnigɛ nigbe juu pe mɛ́ nɛ́ jo: «Ti 'yɛli baa círɛ! Siɛnrɛ dáà Kulocɛliɛ Pìle ni cé tí a Kulocɛliɛ siɛnjuuliɛwɛ Ezayi 'wi 'juu yeli tuuliɛlɛ mɛ́ bèle wè, 26wi cé jo:

Te waa ma sa juu nɛ́ kùlo náà ni siɛnnɛ ní bèle,

ma pe yɛ: Yeli béri lúru, yeli sǐ sí de ti kɔri cɛ́ngi wèʔ;

yeli béri wéli, yeli sǐ sí de nyaʔaʔ.

27 Kùlo náà siɛnnɛ pe funyɔ yi 'gbɛ̀n,

a pe ngbúʔulo ke 'lúʔu mabiɛn;

nɛ̀ pínɛ pe 'pe nyapigele tɔ́n gèle,

peli fǎri nyaʔa ke nīʔ;

peli ngbúʔulo ke fǎri lúruʔ;

peli funyɔ yi fǎri siɛnrɛ ti kɔri cɛ́ngi wèʔ;

peli fǎga peli funyɔ yiʔɛ yèʔ, dí mi sí pe puʔɔʔ # 28.26-27 Eza 6.9-10 tire ti 'juu náʔa gè nɛ̀ yɛli nɛ́ girɛki siɛnliɛrɛ ní dè. .»

28A Pɔli wi sí pe yɛ: «Ye- sí ki cɛ́n sî: Kulocɛliɛ wi 'siɛn suɔlɔ wori dáà tórigo dè kùlogolo kálì wuulo mɛ́. Peli bèle, pe bé ti lúʔu.»

29[Bà Pɔli wi 'siɛnrɛ dáà juu dè nɛ̀ kúɔ dè, a pe 'láʔala nɛ̀ kɛ́, a kàkiɛrɛ 'yɛ̀ pe sunʔɔmɔ nī bè kpuʔɔ.]

30A Pɔli wi 'kò baa wi kòridiʔɛ nī gè nɛ̀ taa yiɛbogolo siin, níɛ saʔa sàrí gè wire tíimɛ wè. Siɛnnɛ bílì pe mìɛni pe 'puu nɛ waa baa wi mɛ́ bèle, wi nɛ̂ cé pe cò nabɔnrɔ nɛ̄. 31Wi 'puu nɛ Kulocɛliɛ Kùlofɔligɔ wori nyu dè nɛ mári, níɛ siɛnnɛ tɛnmɛ bèle Kàfɔli Zezi Kirisi koligo nɛ̄ gè nɛ́ tɛ́ngɛlɛ ní. Wiì puu nɛ fìʔɛ́ yafiɛn nɛ̄ʔ.

Selectat acum:

Kakpiʔiligele 28: sev

Evidențiere

Copiază

Compară

Împărtășește