Pomulanya 1
1
Sarita Mangkonong Palaong to Naika i mPue Allah ri Eo to Kaisa
1Wali tempo owi, tempo pomulanya semo, tempo etu i Pue Allah mampapowali yangi pasi lino. 2Wali tempo owi etu lino si’i tawa manasa ta’anya pasi taware bananginya. Ojo ue mayombu to mangabombong lino, pasi mawuri kiji rao. Pei tempo etu re’e i Nosa i mPue Allah Ia mayoko njo’u-ma’i njo’u-ma’i ri rao ri wawo nu ue etu.
3Wali yako etu i Pue Allah magombo, Ia manganto’o, “Powalimo reme!” Wali mansaka mawalimo reme etu. 4Ojo karoonya Ia mampapowali reme etu, i Pue Allah mangangkita reme etu matao, pasi roo see Ia mangaga’a reme pasi wuri kiji etu. 5Panewa ojo poga’aNya reme pasi wuri etu, i Pue Allah mangansangaka reme etu “Bae Eo”, pasi Ia mangansangaka wuri kiji etu “Raya mBuri”. Wali etu semo palaong to naika i mPue Allah ri eo to kaisa, mula yako yau wuro rata yau wengi panewa ojo karatanya wo’u yau wuro.
Sarita Mangkonong Palaong to Naika i mPue Allah ri Eo to Kadua
6-7Wali yako etu, ri eo to kadua i Pue Allah magombo wo’u, Ia manganto’o, “Powalimo anu to mangaga’a ue see re’e ue to ri aranya pasi re’e to ri wawonya.” Wali ojo panto’o i mPue Allah gombo etu, mansaka re’e to mangaga’a pei mangangompo ue to ri aranya etu yako ue to ri wawonya. 8Panewa roo see i Pue Allah mangansangakamo anu to mangangompo ue etu “Rao”. Wali etu semo palaong to naika i mPue Allah ri eo to kadua, mula yako yau wuro rata yau wengi panewa ojo karatanya wo’u yau wuro.
Sarita Mangkonong Palaong to Naika i mPue Allah ri Eo to Katogo
9Wali yako etu, ri eo to katogo, i Pue Allah magombo wo’u, Ia manganto’o, “Biakamo nakasiromu samparia ue to ri aranya mawali santolo danakayala tampa to mara.” Wali ojo panto’o i mPue Allah gombo etu, ue etu mansaka siromu ri santolo see miala tampa to mara. 10Panewa roo see i Pue Allah mangansangaka tampa to mara etu “Tana” pasi Ia mangansangaka ue to siromu etu “Tasi”. Wali samparia etu i Pue Allah mangkita paka matao.
11-12Panewa yako etu i Pue Allah magombo wo’u, Ia manganto’oka tana, “Powalimo samparia ngayanya anu to tuwu, matao to mawua makapa’i, pasi kaju
to mawua makapa’i ri rayanya, pasi samparia anu to tuwu to yusa. Wali samparia anu to tuwu etu, ponto-ponto ngayanya wungka yusa jayanya tidugang wo’u kalaginya yako to uyunya rapapowali.” Wali ojo panto’o i mPue Allah gombo etu, mansaka yako ri tana tuwumo samparia ngayanya anu to tuwu ri sambawo lino. Panewa i Pue Allah mangangkita samparia anu to tuwu etu paka matao. 13Wali etu semo palaong to naika i mPue Allah ri eo to katogo, mula yako yau wuro rata yau wengi panewa ojo karatanya wo’u yau wuro.
Sarita Mangkonong Palaong to Naika i mPue Allah ri Eo to Ka’opo
14-15Wali yako etu, ri eo to ka’opo, i Pue Allah magombo wo’u, Ia manganto’o, “Powalimo anu to mareme ndate yangi to damangansindo lino. Anu to mareme etu damampasisala bae eo pasi raya mburi. Pasi anu to mareme etu damawali tondong to damampakanasa mangkonong tempo pasi eo pasi to’u.” Wali ojo panto’o i mPue Allah gombo etu, mansaka re’emo anu to mareme etu. 16Wali anu to mareme to napapowali i mPue Allah etu, re’e dua to bose. Songu inikaNya mareme kojo, etu semo mata nu eo, wali to etu Ia mangika damampakareme bae eo. Panewa yununya inikaNya taa mareme kojo, etu semo wuya, wali to etu Ia mangika damampakareme raya mburi. Pasi Ia mampapowali seja songonya batu’e. 17Wali samparia anu to mareme etu paka naposaka i mPue Allah ndate yangi see damampakareme lino. 18Etu semo damampakareme bae eo pasi raya mburi, pei mampasisala reme pasi wuri etu. Wali ojo karoonya Ia mampapowali samparia anu to mareme ndate yangi etu, i Pue Allah mangangkita samparia etu paka matao. 19Wali etu semo palaong to naika i mPue Allah ri eo to ka’opo, mula yako yau wuro rata yau wengi panewa ojo karatanya wo’u yau wuro.
Sarita Mangkonong Palaong to Naika i mPue Allah ri Eo to Kalima
20Wali yako etu, ri eo to kalima, i Pue Allah magombo wo’u, Ia manganto’o, “Powalimo anu to tuwu kangguyu-ngguyu ri raya nue, pasi tonsi to damayoko njo’u-ma’i, njo’u-ma’i njo’u rao.” 21Wali ojo panto’o i mPue Allah gombo etu, mansaka re’emo bau pasi binatang to tuwu ri raya nue pasi re’e seja tonsi to mayoko njo’u rao. Bau pasi binatang to napapowali i mPue Allah ri raya nue etu, re’e to bose kojo, pasi re’e seja songo nu ngayanya to kangguyu-ngguyu ri raya ntasi. Wali samparia to tuwu ri raya nue etu, ananya dasewaju ngayanya pei indonya sangaya pei sangaya. Pasi tonsi to napapowali i mPue Allah etu, etu semo songo nu ngaya ntonsi anu mayoko ri rao. Pasi ana ntonsi etu dasewaju seja ngayanya pei indonya sangaya pei sangaya. Wali ojo karoonya Ia mampapowali samparia anu to tuwu ri raya nue pasi to mayoko njo’u rao etu, i Pue Allah mangkita samparianya etu paka matao. 22Yako etu Ia mampogomboka samparia anu to tuwu ri raya nue etu. Ia mampakasanang katuwu nsira, to’oNya, “Pobijamo pei kasimesemo see danakatidugang kaborosi ngkomi to tuwu ri raya nu ue.” Pasi Ia manganto’oka seja tonsi, to’oNya, “Pobijamo seja pei kasimesemo see danakatidugang kaborosi ngkomi to mayoko ri rao.” 23Wali etu semo palaong to naika i mPue Allah ri eo to kalima, mula yako yau wuro rata yau wengi panewa ojo karatanya wo’u yau wuro.
Sarita Mangkonong Palaong to Naika i mPue Allah ri Eo to Kaono
24-25Wali yako etu, ri eo to kaono, i Pue Allah magombo wo’u, Ia manganto’o, “Powalimo anu to tuwu manosa to mpangaya-ngaya to tuwu ri wawo ntana.” Wali ojo panto’o i mPue Allah gombo etu, mansaka re’emo anu to tuwu manosa mpangaya-ngaya etu. Anu to tuwu to napapowali i mPue Allah etu, re’e binatang to yole pasi binatang to maila pasi samparia anu to tuwu to mandonggo pasi to manjoyo ri wawo ntana. Pasi samparia ngayanya anu to tuwu to ipapowali etu Ia mangika see ananya dasewaju ngayanya pei indonya sangaya pei sangaya. Wali ojo karoonya Ia mampapowali samparia anu to tuwu etu, i Pue Allah mangkita samparianya etu paka matao.
26Roo see i Pue Allah magombo wo’u, Ia manganto’o, “Anu Kita mangika tau sewaju ta’anya ewa lengke ngKita. Tau etu Kita damangawaika damampasilonga samparia to re’e ri lino si’i, etu semo samparia bau ri raya ntasi, pasi tonsi njo’u rao, pasi binatang to yole pasi to maila ri sambawo lino, pasi songonya anu to tuwu to mandonggo pasi to manjoyo ri wawo ntana.” 27Wali i Pue Allah mampapowali tau see sewaju ewa Ia. Monso pu’u tau to ipapowaliNya etu sewaju kojo ta’anya ewa lengke i mPue Allah. Pasi tau etu Ia mampapowali samba’a to langkai pasi samba’a to we’a.
28Wali ojo pangampapowali i mPue Allah tau dua etu Ia mampakasanang katuwu nsira, Ia manganto’o, “Karianamo pasi kasimesemo danakaboros see wiyaa ngkomi damaroo ri sambawo lino pei mampasilonga banang nu lino si’i. Wali pasilonga samparia to re’e ri lino, etu semo bau ri raya ntasi, pasi tonsi njo’u rao, pasi samparia binatang to tuwu ri wawo ntana.”
29Wali yako etu i Pue Allah mampogomboka wo’u tau dua etu mangkonong anu to danakoni nsira, Ia manganto’oka sira, “Padongeka! Ane mangkonong pangkonimu, Aku mangawaika komi samparia ngayanya anu to mawua makapa’i, pasi samparia ngayanya kaju to mawua makapa’i ri rayanya pasi samparia ngayanya anu to tuwu to yusa. Wali samparia to etu semo to damawali pangkonimu. 30Pasi ane mangkonong pangkoni nu binatang to tuwu ri wawo ntana, pasi tonsi njo’u rao, pasi anu to tuwu to mandonggo pasi manjoyo ri wawo ntana, samparia to re’e nosanya etu Kuwaika mangkoni samparia ngayanya anu to tuwu to mawua.” Etu semo to nato’oka i mPue Allah tau dua etu. Wali mansaka mawalimo samparia to to’oNya etu. 31Wali i Pue Allah mangangkita samparia to inikaNya etu paka matao kojo. Wali etu semo palaong to naika i mPue Allah ri eo to kaono, mula yako yau wuro rata yau wengi panewa ojo karatanya wo’u yau wuro.
Selectat acum:
Pomulanya 1: WNT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2018 New Tribes Mission, Sanford, FL 32771-1487, USA.
Printed in the United States of America