Matthew 12
12
Ahomgyeda ho Asɛmbisa bi
(Mark 2.23-28; Luke 6.1-5)
1 #
Deut 23.25
Na aber no mu Jesus koduaa eburow kwa mu ahomgyeda; na ɔkɔm dzee n’esuafo no, wɔhyɛɛ ase pempaan eburow mbɛtsem no wee. 2Na Farisiifo no hunii no, wɔsee no dɛ, Hwɛ, w’esuafo no reyɛ dza ɔmmfa mbra mu ahomgyeda. 3Na ɔsee hɔn dɛ, Ana hom nnkenkaan dza David yɛe aber a ɔkɔm dzee ɔno nye hɔn a wɔka no ho no? 4Mbrɛ ɔkɛhɛɛn Nyankopɔn fie na okedzii kyerɛpaanoo a ɔmmfa mbra mu dɛ odzi, anaa hɔn a wɔka no ho no, gyedɛ asɔfo no ara nko no? 5Anaaso hom nnkenkanee wɔ mbra no mu, mbrɛ ahomgyeda no mu asɔfo no wɔto ahomgyeda wɔ asɔrfi no mu, na wonndzi fɔ? 6Na mese hom dɛ nyia ɔkyɛn asɔrfi no wɔ ha. 7Na sɛ hom tsee kasa yi ase a, dɛ, Mepɛ ehumbɔbɔr na nnyɛ afɔrbɔ a, nkyɛ hom emmbu hɔn a wonndzi fɔ no fɔ. 8Na nyimpa Ba no yɛ ahomgyeda no so no wura.
Nyimpa bi a Ne Nsa Adwe
(Mark 3.1-6; Luke 6.6-11)
9Na ofii hɔ kɔree, na ɔkɔr hɔn nhyiamudan no mu; 10na hwɛ, nyimpa bi wɔ hɔ a ne nsa adwe. Na wobisaa no see dɛ, Ana ɔfa mbra mu dɛ wɔsa yarba ahomgyeda? Ama woeetum aatoa no. 11Na ɔsee hɔn dɛ, Hom mu nyimpa bɛn, na sɛ ɔwɔ oguan kor, na sɛ ɔkɔtɔ mona mu ahomgyeda a, onnkosuo no mu na ɔama no do? 12Ebɛnadze a? Ana nyimpa nsom bo nkyɛn oguan a? Dɛm ntsi ɔfa mbra mu dɛ wɔyɛ papa ahomgyeda. 13Nna ɔsee nyimpa no dɛ, Tsen wo nsa. Na ɔtsenee; na ɔsanee yɛɛ mu dɛ kor no. 14Na Farisiifo no puei, na wɔkɛfaa apam wɔ no ho, mbrɛ wɔbɛyɛ asɛɛ no.
Somfo a Nyankopɔn Asan mu Eyi no
15Na Jesus hunii no, ɔtwee noho fii hɔ, na dodowara kaa no do, na ɔsaa hɔn nyina yarba, 16na ɔbraa hɔn dɛ mma wonnyi no nnkyerɛ: 17ma dza nkɔnhyɛnyi Isaia kae no aaba mu dɛ,
18 #
Isa 42.1-4
Hwɛ, mo somfo a meyi no,
Mo dɔfo a me kra enyiwa sɔ no:
Medze mo Sunsum bogu no do,
Na ɔaka atsɛmbu akyerɛ amanaman.
19Ɔnnkɛper, eso ɔnnkɛtsea mu;
Eso obiara nnkɛtse ne ndze wɔ abɔntsen do.
20Ndzɛmbir a ɔakonkon no onnkobu,
Na asaaba a opun wusiw onnkodum no,
Dze ekesi dɛ ɔbɛma atsɛmbu akɔ konyim mu.
21Na ne dzin mu na amanaman dze hɔn werɛ bɛhyɛ.
Jesus na Beelzebul
(Mark 3.20-30; Luke 11.14-23)
22Nna wɔdze obi a abɔnsam afa no a ɔyɛ onyifurafo nye mmum brɛɛ no: na ɔsaa no yarba, na mmum no kasae na ohun adze. 23Na nyimpadodow no nyina ho boow hɔn, na wɔsee dɛ, Ana oyi nye David ba no? 24#Mat 9.34; 10.25 Na Farisiifo no tsee no, wɔsee dɛ, Oyi nntum nntu mbɔnsam gyedɛ ɔnam mbɔnsam panyin Beelzebul do. 25Na ohun hɔn adwen no, ɔsee hɔn dɛ, Ahenman biara nye noho dzi mpaapaamu a, ɔyɛ amamfo, na kurow anaa fi biara a ɔnye noho dzi mpaapaamu no orinngyina: 26na sɛ Satan tu Satan a, nna ɔnye noho edzi mpaapaamu: ɔbɛyɛ dɛn na n’ahenman egyina? 27Na sɛ emi menam Beelzebul do tu mbɔnsam a, woana do na hom mba nam tu hɔn? Dɛm ntsi hɔn na wɔbɛyɛ hom atsɛmbuafo. 28#1 Joh 3.8 Na sɛ menam Nyankopɔn Sunsum do tu mbɔnsam a, nna Nyankopɔn ahenman enya aba hom nkyɛn.
29 Anaadɛ, ɔbɛyɛ dɛn na obi botum akɔ ɔkatakyi bi ne fie akɔfow n’efidze, gyedɛ odzi kan kyekyer ɔkatakyi no, ansaana ɔafow ne fie.
30 #
Mar 9.40
Nyia ɔnnka mo ho no, na ɔnye me enya; nyia ɔnye me mmboaboa ano no, ɔhotse gu.
31 Dɛm ntsi mese hom dɛ, Bɔn biara, ɔnye ebususɛm biara, wɔdze bɛkyɛ nyimpa, na ebususɛm a otsia Sunsum no dze, wɔnnkɛfa akyɛ nyimpa.
32 #
Luk 12.10
Na obiara a ɔbɛka asɛm etsia nyimpa Ba no, wɔdze bɛkyɛ no, na obiara a ɔbɛka asɛm etsia Sunsum Krɔnkrɔn no, wɔnnkɛfa akyɛ no wɔ wiadze ha, nye wiadze a ɔreba no mu.
Dua Biara na N’aba
(Luke 6.43-45)
33 Hom mma dua no nyɛ yie, na n’aba so nyɛ yie; anaadɛ hom mma dua no mprɔw, na n’aba so mprɔw: osiandɛ dua wɔdze n’aba hu no.
34 Nhurutsia mba, ɔbɛyɛ dɛn na hom muo yi, hom bɛka nsɛm pa? Na dza ebu do wɔ akoma mu no na ano ka.
35 Nyimpa pa fi ne ndzepa korabea na oyi ndzepa fi ba; na nyimpa bɔn fi ne ndzɛmba bɔn korabea na oyi dza omuo fi ba.
36 Na mese hom dɛ nsɛngyan biara a nyimpa bɛka no wobobu ho nkontaa wɔ atsɛmbu da mu.
37 Osiandɛ wo nsɛm do na wɔnam bobu wo bem; na wo nsɛm do na wɔnam bobu wo fɔ.
Wɔrohwehwɛ Nsɛnkyerɛdze
(Mark 8.11-12; Luke 11.29-32)
38Nna Akyerɛwfo no nye Farisiifo no mu binom buae see dɛ, Kyerɛkyerɛfo, yɛpɛ dɛ yehu wo hɔ asɛnkyerɛdze.
39Na obuae see hɔn dɛ, Ɔsantsen bɔn nye awartofo rohwehwɛ asɛnkyerɛdze, na wɔremma hɔn asɛnkyerɛdze biara dɛ nkɔnhyɛnyi Jona asɛnkyerɛdze no: 40na dɛ mbrɛ Jona dzii ndaansa adzekyee nye adzesaa wɔ bonso yamu no, dɛmara na nyimpa Ba no bedzi ndaansa adzekyee nye adzesaa wɔ asaase tsirmu.
41 Ninive mbarimba nye ɔsantsen yi bɔsoɛr wɔ atsɛmbu no mu, na woebu hɔn fɔ; osiandɛ wonuu hɔnho wɔ Jona n’asɛnka ase, na hwɛ, nyia ɔsen Jona wɔ ha.
42 Pomu afamu ɔhembaa nye ɔsantsen yi bɔsoɛr wɔ atsɛmbu no mu, na oebu hɔn fɔ: osiandɛ ofii asaase ano noho bae betsiee Solomon ne nyansaa, na hwɛ, nyia ɔsen Solomon wɔ ha.
Sunsum fi San kɔ ne Fie Dadaw mu
(Luke 11.24-26)
43 Na sunsum fi, sɛ ofi nyimpa mu fir a, okekyin wewew do hwehwɛ ahomgye na onnya bi.
44 Nna ɔse dɛ, Mebɛsan akɔ me fie a mifii mu bae no mu, na ɔba a, ɔto no pan, wɔaprapra mu na wɔahyehyɛ mu.
45 Nna ɔkɔ kɛfa esunsum esuon fofor a womuo sen nankasa ka no ho, na wɔbɛhɛn mu tsena hɔ: na nyimpa no n’ekyir asetsena yɛ bɔn sen nkan no dze; dɛmara na ɔbɛyɛ ama ɔsantsen bɔn yi.
Jesus ne Na nye no Nuanom
(Mark 3.31-35; Luke 8.19-21)
46Na ɔda do rekasa kyerɛ nyimpadodow no, hwɛ, ne na nye no nuanom begyinaa abow enyim hwehwɛɛ dɛ wɔnye no kasa.
47Na obi see no dɛ, Hwɛ, wo na ɔnye wo nuanom gyina abow enyim rohwehwɛ nye wo akasa.
48Na obuae see nyia ɔkaa kyerɛɛ no no dɛ, Woana nye me na, na woananom nye mo nuanom?
49Na ɔtseen ne nsa wɔ n’esuafo no do see dɛ, Hwɛ, me na nye mo nuanom.
50 Na obiara a ɔbɛyɛ m’Egya a ɔwɔ sor no ne pɛ no, ɔno nye mo nua, nye m’akyerɛbaa, nye me na.
Mfantse Bible © Bible Society of Ghana, 2011.