Maleko 15
15
Tuku o Sesu kia Pilato
1I le usu ake fai, na fono loa le kau pule faisakilifisio, mo le kau matua fau, mo le kau sekelipa, ti mo le fono lasi katoa ki se tonu kia Sesu. Ti na lotou fakatotonu loa ke sai a ia, o ave kia Pilato.
2Ti na vesili loa Pilato kia Sesu : Pe ko le sau a koe o le kau Sutea ? Ti na tali loa Sesu kiate ia : Kua ke pati ki ai. 3Ti na tuku loa e le kau pule faisakilifisio kiate ia ni sala lasi. 4Na toe vesili loa Pilato kiate ia : Pe leaise ke tali ki se nea ? E ke tio ki le lasi o nea ala kua lotou tuku kiate koe. 5Ti na leaise toe tali fua Sesu kiate ia, ti na ofolele ai Pilato i le nea lena.
Sesu pe ko Palepasi
6I Pasikate fuli, na fakamauli e Pilato se tagata pilisoni e tasi, leia na kole ake e le kakai kiate ia. 7Na i ai i le fale pilisoni se tagata na igoa ko Palapasi ti mo lana kau tagata tukipo, o tupu ko se tukipo leia na lotou fai i le lolotoga o se maveuveu. 8Na pale loa le kakai ki le fale o Pilato o kole kiate ia le nea leia na fai masani e ia kia latou. 9Ti na pati loa Pilato kia latou : Pe kotou loto ke kau fakamauli le sau o le kau Sutea ? 10Talie na iloa e ia na tuku Sesu e le kau pule faisakilifisio o tupu ko lolatou finenonofo. 11Kae na soka loa le kakai e le kau pule o le kau tagata faisakilifisio, o tupu ke fakamauli e Pilato a Palapasi. 12Ti na masau loa Pilato, o pati kia latou : Kolea e kotou loto ke kau fai ki leia e kotou fakaigoa ko le sau o le kau Sutea ? 13Na lotou toe kalaga loa : Kulusifikoi a ia ! 14Na pati loa Pilato kia latou : Kolea le nea veli na fai e ia ? Ti na lotou toe kalaga loa o toe leo lasi ake : Kulusifikoi a ia ! 15Ko Pilato, i lona fia mata malie ki le kakai, na tuku ia loa Palapasi kia latou ; kae fakatotonu loa e ia ke sasa Sesu ki ni laakau, ti ke tutuki loa a ia ki se koluse.
Le pala talatala
16Na taki loa Sesu e le kau solia ki le malae ko le peletolio, ti na lotou fakatasii loa le fa solia katoa. 17Ti na lotou fakakofu loa a ia ki se taupulupulu kula malie, ti na lotou teki loa ki lona ulu se pala talatala leia na lotou fili. 18Ti na lotou fakaalofa loa kiate ia : Alofa atu, sau o le kau Sutea ! 19Ti na lotou sasa lona ulu ki se fa u, ti na lotou anuanu kiate ia, ti na lotou peluki olatou tuli o tulolo i ona mua. 20Ti na oki loa lalatou gologolo lena kiate ia, na lotou too loa iate ia le taupulupulu, kae na lotou toe fakatui loa kiate ia ona kofu, ti na lotou ave loa a ia ke tutuki ki se koluse.
Tutuki o Sesu ki le koluse
21Ti na lotou fakamakeke loa se tagata leia na ifo mei faisaga, ko Simone mei Silene, ko le tamana o Alesatelo mo Lufusi, ke amo ia le koluse o Sesu. 22Ti na lotou taki loa Sesu ki le ganea na igoa ko Kolokota, ko lona uiga ko le ganea o le ulupoko. 23Ti na lotou fakainu loa kiate ia se vinika kua sui ki le mila, kae na leaise inu loa e ia a ia.
24Na lotou tutuki loa a ia ki le koluse, ti na lotou vae loa ona kofu, o toso ke iloa le nea leia e maua e le tagata taki toka tasi. 25Ko le ola iva a ia o le usu leia na lotou tutuki ai Sesu ki se koluse.
26Ti na lotou tosi loa le tupuaga o lona tua : ko le Sau o le kau Sutea.
27Na lotou tutuki loa i ni koluse, o fakatasi mo ia, ni tagata agaveveli e toka lua, ko le tasi i lona fetuu atamai, ti ko le tasi i lona fetuu sema.
28Ti na fakasoko ai le nea leia e fakasa e le Tosi : Na lau a ia mo le kau agaveli.
29Na nukinuki loa kiate ia latou ala na fakalaka i ai, mo kalokalo olatou ulu, o pati : A koe leia e maumaui ia le fale tapu, ti toe fakatuu ia a ia i aso e tolu, 30saofaki a koe totonu, o ifo mei le koluse ! 31Na toe nukinuki foki kiate ia le kau pule faisakilifisio mo le kau sekelipa, o pati : Na saofaki e ia le kakai, kae e leaise mafai ke saofaki e ia a ia totonu !
32Ke ifo mai nei Kilisito, ko le sau o Iselaele, mei le koluse, o tupu ke motou tio ti ke motou tui ! Na lauveli foki kiate ia laua ala na kulusifiko fakatasi mo ia.
33I le ola kau agafulu tupu lua lalatea, na fakapouli loa le malama nei katoa, o kaku ki le ola tolu sili lalatea. 34I le ola tolu sili lalatea, na kalaga loa Sesu o leo lasi : Eloi, Eloi, lama sapakatani ? Ko lona uiga : Ei loku Atua, ei loku Atua, kolea kua ke tiaki ai au ? 35Ko ni iki ia latou na nonofo i ai, i lalatou logo kiate ia, na pati loa : Ko leinei, e kalaga a ia kia Elia. 36Ti na makape loa se tasi o latou, o fakasusu se fa unu ki le vinika, o fakapiki ki se fa u, o fakaali kia Sesu ke inu, o pati : Tuku mua, kae tou tio pe au loa Elia o fakaifo a ia mei le koluse.
37Kae na kalaga leo lasi loa Sesu, ti na mate loa a ia.
38Na masae lua loa le kie o le fale tapu, mei aluga o kaku ki lalo.
39Ko le setulio leia na tuu i mua o Sesu, i lana tio ki lona mate fenaaki, na pati loa : E maoki ai, ko le tagata leinei ko le Alo o le Atua.
40Na i ai foki ni fafine ala na tio mei mamao. Ti na kau ia latou a Malia mei Maketala, mo Malia tinana o Sakopo le mulimuli, mo Sosefo, ti mo Salome. 41Na lotou mulimuli ia Sesu i le temi leia na nofo ai a ia i Kalilea, o tausi kiate ia. Na i ai foki ni iki ake fafine toka api ala na pale mo ia ki Selusalemi.
Tanu o Sesu
42Ti kua afiafi ai, ti tupu ko le aso lena o le teuteu, ko lona uiga, ko le aso tokonaki o le sapato, 43na kaku mai loa Sosefo mei Alimatea, ko se tagata fono mauiga, leia na talitali foki ki le puleaga o le Atua. Na toa loa a ia o ano kia Pilato, o kole le tino o Sesu. 44Ti na ofolele loa Pilato ki le mate vave o Sesu ; ti na kalagai loa e ia le setulio, o vesili kiate ia : Pe kua fualoa lona mate. 45I lana iloa papau a ia mei le setulio, na soli loa e ia le tino kia Sosefo. 46Ti na totogi loa e Sosefo se kie tea, ti na sau loa e ia le tino o Sesu mei le koluse, o kofu ki le kie, ti na tuku loa e ia a ia ki se tanuma kua kenu i le utu. Ti na tekai loa e ia se fa fatu lasi ki le matapa o le tanuma. 47Ko Malia mei Maketala, mo Malia, tinana o Sosefo, na tio ki le ganea leia na tuku ki ai le tino o Sesu.
Selectat acum:
Maleko 15: FB2000
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© Société Biblique de Genève, 2000-2020
