Luka 8
8
Fafine ala na muli ia Sesu
1Ti na sili a ia, na ano loa Sesu ki kolo lalasi mo kolo liliki, o akonaki le folafola ti mo fakasa le logo malie o le Puleaga o le Atua. 2Ti na ano mo ia le tino agafulu tupu lua ti mo ni fafine ala na fakamauli mei ni laumalie veli mo ni masaki : Ko Malia, na fakaigoa ko Malia mei Maketala, leia na mavae mei ai ni temonio e fitu, 3mo Soana, avaga o Kusa ko le pule koloa a Elote, mo Susana, ti mo ni iki ake fafine e toka api, ti na lotou tausi a ia ki olatou koloa.
Le tagata muluki fakaili mo kele
4Ti na fakatasi ake loa se kakai toka api kiate ia, leia na au mei kolo lalasi kesekese, ti na fai loa e ia le folafola fakatata leinei :
5Na ano loa se tagata muluki fakaili o muluki lana fakaili. I lana muluki, na maluku loa se koga o le fakaili i tafatafa o le ala ; ti na takatakafi loa a ia, ti na kai loa a ia e manu lele o le lagi. 6Na maluku loa se tasi a koga ki se ganea fatufatua ; i lana mafiti ake, na malo loa a ia, talie na leaise maua e ia se vai mokomoko. 7Na maluku loa se tasi a koga ki loto malie o ni vao talatala ; na sosomo ake loa a vao talatala mo le fakaili, o taotao a ia o mate. 8Na maluku loa se tasi a koga ki le kele malie ; i lana somo ake, na fua loa a ia o liuga kau lelau. I le oki o lana masau, na kalaga loa Sesu o leo lasi : Ko leia e i ai ni ona taliga ke fakalogo, ke logo.
9Na vesili loa ana tisipulo kiate ia pe kolea le uiga o le folafola fakatata lena. 10Na tali loa Sesu : Kua tuku atu kia koutou ke kotou iloa a misitelio o le Puleaga o le Atua ; kae kia latou ake ala, kua fakasa a ia i ni folafola fakatata, o tupu ke lotou tio mata kae aua na lotou tio fua, ti ke lotou logo taliga kae aua na lotou matala fua.
11Ko leinei le uiga o le folafola fakatata lena : Ko le fakaili, ko le folafola a le Atua. 12Ko latou ala i tafatafa o le ala, ko latou ala e logo, ti au le Tiapolo o too le folafola i olatou loto, o tupu ke aua na lotou tui ti ke fakamauli latou. 13Ko latou ala na maluku i le ganea fatufatua, ko latou ala, i lalatou logo ki le folafola, na tali ia a ia i le fiafia ; kae e leaise lotou maua ia se aka, ti e lotou tui fua i se ga temi, ti e lotou siga i le lakaga o le fakasala. 14Ko leia e vilo ki loto o le vao talatala, ko latou ala, i le logo ki le folafola, na ano, o tuku a ia ke taotao e tuania, mo koloa, mo fiafia o le mauli, ti e leaise lotou maua se fua leia e kaku o matua. 15Ko leia e maluku ki le kele malie, ko latou ala e logo ki le folafola i se loto agatonu mo malie, ti e taofi ia a ia, ti e fua o tupu ko le kataki fualoa.
Le fa malama i le tekiaga malama
16E leaise tutu e se tasi se malama ke fakapulou ki se kisi, pe ke velo i lalo o se palepale ; kae e teki e ia a ia ki aluga o le tekiaga malama, o tupu ke tio ki ai latou ala e ulu mai ki loto fale. 17Talie e leaise nea munia, e leaise fakasa loa ; ti e leaise nea fufu, e leaise iloa loa ti e leaise tuku loa ki le malama. 18Kotou tokaga ki lakoutou fakalogo ; talie e soli loa ki leia e maua, kae ki leia e nofo noa e toe too loa mo le nea foki leia e pati a ia e maua e ia.
Le tinana mo fetaina o Sesu
19Na au loa kiate ia lona tinana mo ona fetaina ; kae na leaise mafai ke lotou masau kiate ia o tupu ko le kakai. 20Na pati loa se tasi kiate ia : Ko lou tinana mo ou fetaina e tutuu i fafo, ti e lotou fia felavei mo koe. 21Kae na tali loa a ia : Ko loku tinana mo oku fetaina, ko latou ala e fakalogo ki le folafola a le Atua ti mo fai a ia.
Taofi e Sesu o le afaa
22I se aso, na eke loa Sesu ki se vaka mo ana tisipulo. Na pati loa a ia kia latou : Tou fakalaka ki leia ake kauvai. Ti na lotou ano loa. 23I le lolotoga o le folau, na moe mate loa Sesu. Na to loa se sasataki ki le tai, ti kua apele le vaka i le vai, ti kua lotou teiteiki ai. 24Na lotou soso ake loa kia Sesu, o fafagu a ia o pati : Pule, pule, ka tou mamate ! I lana ala ake, na valoki loa e ia le matagi mo le galu, ti na la malu loa, ti na toe au loa le tokamalie. 25Ti na pati loa Sesu kia latou : Kofea lakotou tui ? Kae na lotou i lasi ai mo ofolele, o pati : Ko ai le tagata leinei, e lagiaki foki a ia ki le matagi mo le vai, ti e la fakalogo kiate ia ?
Kapu e Sesu o temonio i Katala
26Na lotou kaku loa ki le fenua o le kau Katala, leia e agaaga ki Kalilea. 27I le sopo a Sesu ki uta, na au loa ki ona mua se tagata o le kolo lena, leia na ulu tino ai se kau temonio. Talu mei fualoa na leai se toe tui e ia se kofu, ti na leaise nofo a ia i se fale, kae i ni tanuma. 28I lana tio kia Sesu, na kalaga loa a ia, ti na fakapulou loa a ia ki ona vae, o tagi leo lasi : Sesu, Alo o le Atua Taualuga, kolea iate au mo koe ? E kau kole atu kiate koe ke aua na ke fakamamae au. 29Talie kua fakatotonu e Sesu ki le laumalie veli ke mavae mei le tagata lena, leia kua fualoa lona too e le laumalie veli : Ti kua tua lasi le saisai o ona lima ki ni tini, mo ona vae ki ni kaui ukamea, kae na motumotusi e ia a sai, ti na ave a ia e le laumalie veli ki ganea lavaki. 30Na vesili loa Sesu kiate ia : Ko ai lou igoa ? Na tali loa a ia : Ko Lesio. Talie na toka api ai le kau temonio leia kua ulu tino iate ia. 31Ti na lotou kolekole loa kia Sesu ke aua na fakatotonu ake e ia ke lotou ano ki le vanu. 32Na i ai i le ganea lena se kau puaka lasi ai leia na fagai i le mauga. Ti na kolekole loa le kau temonio kia Sesu ke fakataga ake ke lotou ulu ki puaka ana, ti na fakataga loa e ia kia latou. 33Na mavae loa le kau temonio mei le tagata o ulu ki puaka, ti na maluluku loa le kau puaka i ni fakamakilakila ki le tai, o malemo i ai. 34Ko latou ala na fagai ia le kau puaka, i lalatou tio ki le nea leia na soko, na fesolaki loa o fakamafola le logo i le kolo lasi mo kolo uta. 35Ti na ano loa a kakai o tio ki le nea leia na soko. Na lotou kaku loa kia Sesu, ti na lotou maua loa le tagata leia na mavae ai le kau temonio, kua tonatona i ona vae, kua kofu, ti kua toe malama foki lona fakakaukau. Ti na lotou i lasi loa. 36Ko latou ala na tio mata ki le nea katoa na soko, na fakamatala ia loa ki le kakai le fakamauli o le tagata avagaia. 37Ti na kole loa e le kakai katoa o le fenua o le kau Katala kia Sesu ke fakamamao a ia meia latou, talie na lasi ai lolatou i. Ti na sopo loa Sesu ki le vaka, o toe liliu. 38Ko le tagata leia na mavae ai le kau temonio, na kole ake loa kia Sesu ke fakataga ake ke nofo a ia mo ia. Kae na kakau loa a ia e Sesu, o pati : 39Toe liliu ki lou fale, o fakamatala a nea fuli ala na fai e le Atua kiate koe. Ti na ano loa le tagata o fakasa i le kolo katoa a nea fuli ala na fai e Sesu kiate ia.
Le taine o Sailusi mo le fafine pupuke
40I lana toe liliu mai, na fakatalitali loa Sesu e le kakai, talie na talitali le kakai katoa kiate ia. 41Ti ko leinei, na kaku ake loa kiate ia se tagata na igoa ko Sailusi. Ko le pule a ia o le sinakoka. Na punou loa a ia ki vae o Sesu o kolekole kiate ia ke ulu ake mua ki lona fale, 42talie ko lona taine fuatasi, leia na fetuu kau agafulu tupu lua, kua vave mate fua. Na lolotoga ano loa Sesu ki ai, ti na fetekeaki a ia e le kakai.
43Kae na i ai se fafine leia na pupuke talu mei ni fetuu e kau agafulu tupu lua, ti kua oki ona koloa ki le totogi o le kau toketa, kae na leaise fakamauli a ia e se tasi o latou. 44Na fakafeofi ake loa le fafine i muli o Sesu, o fafa ki le tapatapa o lona taupulupulu. I le lakaga fai lena na gato loa lona pupuke. 45Ti na pati loa Sesu : Ko ai leia na fafa mai kiate au ? I le fakafitifiti fuli a le kakai, na pati loa Petelo mo latou ala na tuu mo ia : Pule, e takatakai a koe ti mo fetekeaki a koe e le kakai, kae e ke pati : pe ko ai leia na fafa mai kiate au ? 46Kae na tali loa Sesu : Na i ai se tasi leia na fafa mai kiate au, talie na kau logoi kua mavae atu se makeke iate au. 47Ko le fafine, i lana tio kua iloa a ia, na au loa kua lulu o punou ki vae o Sesu, ti na fakasa loa e ia i mua o le kakai katoa le tupuaga o lana fafa kia Sesu, ti mo le nea leia kua soko kiate ia o tupu ai lona mauli fakapunamauli. 48Na pati loa Sesu kiate ia : Ei loku taine, kua fakamauli a koe e lau tui ; ano i le tokamalie.
49Koi lolotoga lana masau, kae oso mai loa se tasi mei le fale o le pule o le sinakoka, o pati : Kua mate lou taine ; aua na ke toe fakapakia ki le pule. 50Kae i le logo a Sesu ki le nea lena, na pati loa a ia ki le pule o le sinakoka : Aua na ke tuania, tui fua ti e mauli loa a ia. 51I le kaku a Sesu ki le fale, na leaise fakataga loa e ia ke ulu se tasi mo ia, gato kia Petelo, mo Soane, mo Sakopo, ti mo le tamana mo le tinana o le toe. 52Na fetagisi fuli le kakai mo lauga ki le taine. Na pati loa Sesu : Aua na kotou fetagisi ; e leaise mate a ia, kae e moe a ia. 53Ti na lotou gologolo loa kia Sesu, talie kua lotou iloa kua mate le taine. 54Kae na too loa e Sesu le lima o le taine, o pati leo lasi kiate ia : Fanau, tuu ki aluga. 55Ti na toe au loa lona laumalie kiate ia, ti na tuu loa a ia ki aluga i le lakaga fai lena ; ti na fakatotonu loa e Sesu ke soli kiate ia se nea ke kai. 56Na punamauli ai a matua o le taine, kae na fakatotonu loa e Sesu kia laua ke aua na la masau fua ki se tasi ki le nea leia kua soko.
Selectat acum:
Luka 8: FB2000
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© Société Biblique de Genève, 2000-2020
