Luka 6
6
Sesu, pule o le sapato
1I se aso sapato, leia na igoa ko le lua-uluaki, na fakalaka loa Sesu i ni faisaga fulumeto. Ti na futi loa e ana tisipulo ni kaui fulumeto o kai, i le oki o lalatou milisi latou i olatou lima. 2Na pati loa ni kau faliseo kia latou : Kolea e kotou fai ai a nea ala e leaise taga ke fai i le aso o le sapato ? 3Na tali loa Sesu kia latou : Pe na leaise kotou lau le nea leia na fai e Tavite, i le temi na fia kai ai, a ia mo latou ala na nonofo mo ia ; 4pe na feaki lana ulu ki le fale o le Atua, o too a pane o moliga o kai, ti na toe soli foki e ia kia latou ala na nonofo mo ia ; kae na taga fai ki le kau tagata faisakilifisio ke kai ki ai ? 5Ti na pati loa Sesu kia latou : E pule le Vosa o le tagata ki le sapato.
Fakamauli o se tagata i le sapato
6I se tasi sapato, na ulu loa Sesu ki le sinakoka, o akonaki i ai. Ti na nofo i ai se tagata leia na mate lona lima atamai. 7Ti na lama loa Sesu e le kau sekelipa mo le kau faliseo, pe fai loa e ia se fakamauli i le aso o le sapato, o tupu ke lotou maua se nea ke fakalakasala ai a ia. 8Kae i lana iloa alatou manatu, na pati loa a ia ki le tagata lima mate : Tuu ki aluga, ti ke tuu i leia i lotomalie. Na tuu ake loa a ia ki aluga, o tuu i lotomalie. 9Na pati loa Sesu kia latou : E kau vesili atu kia koutou pe fakataga e le lao ke fai i le aso o le sapato se nea malie pe ko se nea veli, ke saofaki ai le mauli o se tagata pe ke tamate a ia ? 10Ti na tio saele loa Sesu kia latou fuli, ti na pati loa a ia ki le tagata : Falo mai lou lima. Ti na fai loa e ia, ti na mauli loa lona lima.
11Kae na lotou apele loa i le ita, ti na lotou fakakaukau loa pe kolea ke lotou fai kia Sesu.
Filifili e Sesu o ana tisipulo
12I le temi a ia, na ano loa Sesu ki le mauga o faikole, ti na nofo loa a ia i le po katoa o faikole ki le Atua. 13I le mafoa ake o le ao, na kalagai loa e ia ana tisipulo, ti na filifili loa e ia se tino agafulu tupu lua ia latou, ala na tuku loa e ia ki ai le igoa ko apositolo :
14Ko Simone, leia na fakaigoa e ia ko Petelo ; mo Atelea, lona taina ; mo Sakopo ; mo Soane ; mo Filipo ; mo Patolomeo ; 15mo Mateo ; mo Toma ; mo Sakopo, vosa o Alefeo ; mo Simone, le Selote, 16mo Suta, vosa o Sakopo ; ti mo Sutasi Isekaliote, leia na liliu loa ko le tagata fakataga.
Akonaki i le mauga
17Na ifo loa Sesu mo latou, ti na tuu loa a ia i se ganea laumalie, leia na nofo ai ana tisipulo, ti mo se kakai toka api mei Sutea, mo Selusalemi, ti mo le mata tai o Tile mo Sitone. Na lotou au o fakalogologo kiate ia, ti ke fakamauli olatou masaki. 18Ko latou ala na fakamamae e laumalie veli, na mauli. 19Ti na afa e le kakai katoa ke fafa kiate ia, talie na au meiate ia se makeke o fakamauli latou fuli.
Tapuakina o le kau tisipulo
20Ti na tagaki loa Sesu ki ana tisipulo, o pati :
Manuia koutou ala e mativa, talie a koutou le Puleaga o le Atua !
21Manuia koutou ala e fia kai i le lakaga nei, talie e kotou makokona loa ! Manuia koutou ala e tagi i le lakaga nei, talie e kotou fiafia loa ! 22Manuia loa koutou mo ka e vesia loa a tagata kia koutou, mo ka e kapu loa koutou, mo ka e lauveli loa kia koutou, ti mo tiaki loa okoutou igoa, o tupu ko le Vosa o le tagata ! 23Kotou fiafia i le aso lena ti kotou soposopo i le fiafia, talie e lasi loa lokoutou fakapale i le lagi ; talie na fai fenaaki e le kau polofeta ki olatou tamana.
24Kae, malaia kia koutou, kau mou koloa, talie kua kotou maua lokoutou fimalie !
25Malaia kia koutou ala e makona i le temi nei, talie e kotou fia kai loa ! Malaia kia koutou ala e kata i le temi nei, talie e kotou mamae loa mo tagi laulau loa !
26Malaia koutou mo ka e masau malie loa a tagata fuli kia koutou, talie na fai fenaaki olatou tamana ki le kau polofeta loi !
Alofa ki fili
27Kae e kau pati atu kia koutou, kia koutou ala e fakalogo mai kiate au : Kotou alofa ki okoutou fili, kotou fai le malie kia latou ala e vesia mai kia koutou, 28Kotou tapuaki kia latou ala e tutuku ia koutou, kotou ulufaki latou ala e fakaveliveli mai kia koutou. 29Kapau e paai a koe e se tasi i se kalaafau, toe fakaali foki kiate ia mo leia ake. Kapau e too e se tasi lou taupulupulu, aua na ke taofi ke toe too foki mo lou kofu loto. 30Soli ki leia e kole atu kiate koe, ti aua na ke fakaala lou koloa ki leia na too ia. 31Ko le nea leia e kotou loto ke fai e tagata kia koutou, kotou fai a ia kia latou. 32Kapau e kotou alofa fuai kia latou ala e alofa atu kia koutou, kolea loa lona uiga ? E alofa foki le kau agasala kia latou ala e alofa ake kia latou. 33Kapau e kotou agamalie fuai kia latou ala e agamalie atu kia koutou, kolea e fakafetai ai loa kia koutou ? E fai fenaaki foki le kau agasala. 34Ti kapau e kotou soli fuai kia latou ala e kotou talitali ke maua mei ai se nea, kolea e fakafetai ai loa kia koutou ? E soli foki e le kau agasala ki le kau agasala, o tupu ke toe fakaliliu ake kia latou. 35Kae kotou alofa ki okoutou fili, kotou fai le malie, ti kotou soli sala talitali ke fakaliliu atu. Ti e lasi loa lokotou fakapale, ti e kotou liliu loa ko vosa o le Taualuga, talie e agamalie a ia ki le kau mauli galo mo le kau agaveli. 36Koia kotou manavaalofa, ofaipe lokoutou Tamana e apele i le manavaalofa.
Aua na kotou fakamaaui
37Aua na kotou fakamaaui, ti e leaise fakamaaui loa koutou ; aua na kotou fakatuaa se tasi, ti e leaise fakatuaa loa koutou ; kotou fakamolemole, ti e fakamolemole atu loa kia koutou. 38Kotou soli, ti e soli atu loa kia koutou : E liligi loa ki okoutou fatafata se fua lasi, kua lomi, kua tutui, kua apelepipi ; talie e fua loa kia koutou ki le fua leia na kotou fakaaoga.
39Na toe fai foki e ia kia latou le folafola fakatata leinei : Pe mafai ke taki e se kivi se tasi a kivi ? Pe leaise la vivilo loa toka lua ki se popoko ?
40E leaise lasi ake le tisipulo i lona pule ; kae ko tisipulo fuli kua katoa e fai loa pe lona pule.
41Kolea e ke tio ai ki le ga penu i le mata o lou taina, kae e leaise ke iloa le fa alaga i lou mata ? 42Pe mafai feaki lau pati ki lou taina : Taina, tuku mai kiate au ke kau too ia le ga penu i lou mata, a koe leia e leaise tio ki le fa alaga i lou mata ? Malualoi, too mua le fa alaga i lou mata, ti o ke tio loa pe feaki le too o le ga penu leia i le mata o lou taina.
Folafola o laakau e lua mo fale e lua
43E leaise tupu mei se laakau malie ni fua veveli, pe mei se laakau veli ni fua malilie. 44Talie e iloa le laakau i lona fua. E leaise tau ni fuai fiki i ni vao talatala, ti e leaise tau ni fuai vite i ni laakau sukisuki. 45E too e le tagata agamalie le malie mei le koloa malie o lona loto, ti e too e le tagata agaveli le veli mei le koloa veli o lona loto ; talie e masau le gutu mei le mou o le loto.
Tufuga e lua mo fakatafito e lua
46Kolea e kotou fakaigoa ai au : Aliki, Aliki ! Ti e leaise kotou fai le nea leia e kau pati ki ai ? 47E kau fakasa atu loa kia koutou pe fakatatau kiate ai a tagata fuli ala e au kiate au, o logo ki aku folafola, ti mo fai ia latou. 48E tatau a ia mo se tagata leia na fakatuu ia se fale : na kenu e ia o loloto ai, o teki le fakatafito ki le utu. Na to se lomaki, ti na oso makeke le vai ki le fale lena, kae na leaise taugaoi a ia, talie na fakatuu a ia ki le utu. 49Ka ko leia e logo ki aku folafola, kae leaise fai ia latou, e tatau a ia mo se tagata leia na fakatuu ia se fale i le kele kae e leai sona fakatafito. Na oso makeke loa le vai ki le fale lena, ti na solo aifai a ia. Ti na lasi ai lona maumau.
Selectat acum:
Luka 6: FB2000
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© Société Biblique de Genève, 2000-2020
