MGA SALMO 143
143
Pangamuyo nga Luwason kag Tuytuyan
Salmo ni David.
1Pamatii ang akon pangamuyo, O Ginoo; lingga ang akon mga pag-ampo!
Sabta ako sa imo pagkatutum, sa imo pagkamatarung!
2Dili ka magsulud sa paghukom upud sa imo alagad;
kay walay tawo nga nagakabuhi nga matarung sa imo itololok.#Roma 3:20; Gal. 2:16.
3Kay ginhingabut sang kaaway ang akon kalag;
ginpukan niya sa duta ang akon kabuhi;
ginpapuyo niya ako sa madulum nga mga duug subong sang mga dugay na napatay.
4Busa ang akon espiritu ginapunaw sa sulud nakon;
mamingaw ang tagiposoon sa sulud nakon.
5Nakadumdum ako sang mga adlaw nga dumaan,
nagapamalandong ako sang tanan mong hinimoan;
nagapanghunahuna ako sang binuhatan sang imo mga kamut.
6Ginauntay ko ang akon mga kamut sa imo;
ang akon kalag ginauhaw sa imo subong sang duta nga kigas. Sela
7Dalidali sa pagsabat sa akon, O Ginoo!
Nagakalipong ang akon espiritu!
Dili pagtagoa sa akon ang imo nawung,
basi manginkaangay ako sang mga nagapanaug sa Boho.
8Papamatia ako sa kaagahon sang imo malig-on nga paghigugma,
kay sa imo nagasalig ako.
Pakilalaha ako sang dalan nga akon dapat laktan,
kay ginabayaw ko ang akon kalag sa imo.
9Luwasa ako, O Ginoo, sa akon mga kaaway!
Nagadangup ako sa imo nga tagoon ako!
10Tudloi ako sa paghimo sang imo kabubut-on,
kay ikaw amo ang akon Dios!
Ang imo maayong Espiritu magtuytuy sa akon
sa duta sang pagkatadlong!
11Buhia ako, O Ginoo, tungud sa imo ngalan!
Sa imo pagkamatarung kuhaa ako sa kalisdanan!
12Kag sa imo malig-on nga paghigugma utda ang akon mga kaaway,
kag laglaga tanan sila nga nagapapiot sang akon kalag,
kay ako imo alagad.
Selectat acum:
MGA SALMO 143: ABHIL82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Ang Biblia ©1982 Philippine Bible Society