MGA HULUBATON 31
31
Mga Laygay sa Hari
1Ang mga polong ni Hari Lemuel, ang oraculo nga gintudlo sa iya sang iya iloy:
2Ano bala, anak ko? Ano bala, O anak sang akon taguangkan?
Ano bala, O anak sang akon mga saad?
3Dili pag-ihatag ang imo kusug sa mga babayi,
ukon ang imo mga dalanon sa mga nagalaglag sa mga hari.
4Indi nagakaigo sa mga hari, O Lemuel,
indi nagakaigo sa mga hari ang pag-inum sing alak,
ukon sa mga principe ang paghandum sing ilimnon nga masingkal;
5basi nga mag-inum sila kag malipat sang kasogoan,
kag magpatiko sang katarungan nga naigo sa bisan kay sin-o nga napiotan.
6Ihatag ang ilimnon nga masingkal sa handa sa pagkawala,
kag ang alak sa may kapaitan sa kalag;
7paimna sia kag malipat sa iya kaimolan,
kag indi na makadumdum sang iya pagkamakalolooy.
8Bukaa ang imo baba tungud sa apa,
sa katarungan sang tanan nga ginabayaan nga mamingaw.
9Bukaa ang imo baba, maghukom sing matarung,
maghikot sing katarungan sa imol kag nawad-an.
Pagdayaw sa Babayi nga Takus
10Ang babayi nga takus sin-o bala ang makakita?
Kay ang iya bili labaw pa gid sa mga rubi.
11Ang tagiposoon sang iya bana nagasalig sa iya,
kag indi sia makulangan sing daug.
12Sia nagahimo sa iya sing maayo, kag indi malaut,
sa tanan nga adlaw sang iya kabuhi.
13Nagapangita sia sing bulbul sang carnero kag lino,
kag nagapangabudlay sing kinabubut-on sa iya mga kamut.
14Kaangay sia sang mga sakayan sa pamaligya,
nagadala sia sang iya kalan-on gikan sa malayo.
15Nagabangon man sia sing gab-i pa
kag nagahatag sing kalan-on sa iya panimalay
kag sang ila buluhaton sa iya mga dalaga.
16Ginabinagbinag niya ang ulumhan kag ginabakal ini;
sa bunga sang iya mga kamut nagatanum sia sing ulubasan.
17Nagawagkus sia nga may kabakud sang iya mga balikawang
kag nagapabakud sang iya mga butkon.
18Nahantupan niya nga ang iya inugbaligya mapuslanon.
Ang iya suga wala nagakapalong sa kagab-ihon.
19Ginabutang niya ang iya mga kamut sa bolongan,
kag ang iya mga kamut nagakaput sang polondan.
20Nagauntay sia sang iya kamut sa imol,
kag nagatunghol sia sang iya mga kamut sa nawad-an.
21Wala sia mahadluk sang nieve sa iya panimalay,
kay ang bug-os niya nga panimalay napanaptan sing escarlata.
22Sia nagahimo sa iya kaugalingon sing mga hamil nga binordahan;
ang iya panapton lino nga manipis kag purpura.
23Ang iya bana kilala sa mga gawang,
kon maglingkod sia sa tunga sang mga tigulang sang duta.
24Nagahimo sia sing mga panapton nga lino kag ginabaligya sila;
nagapadala sia sing mga wagkus sa mga manugbaligya.
25Kusug kag pagkahalangdon amo ang iya panapton,
kag nagakadlaw sia sa tion nga palaabuton.
26Nagabuka sia sang iya baba sa kaalam,
kag ang kasogoan sang kalolo yara sa iya dila.
27Nagatatap sia sing maayo sa mga pagginawi sang iya panimalay,
kag wala nagakaon sang kalan-on sang katamad.
28Ang iya mga anak nagabangon kag nagatawag sa iya bulahan;
ang iya bana man, kag sia nagadayaw sa iya:
29“Madamu nga mga anak nga babayi ang nakahimo sing takus,
apang ikaw nagalabaw sa ila tanan.”
30Ang kaalikaya malimbongon, kag ang katahum kadayawan,
apang ang babayi nga nagakahadluk sa Ginoo dayawon sia.
31Hatagi sia sang bunga sang iya mga kamut,
kag ang iya mga binuhatan magdayaw sa iya sa mga gawang.
Selectat acum:
MGA HULUBATON 31: ABHIL82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Ang Biblia ©1982 Philippine Bible Society