IBERANI 9
9
Temameʹ layen usun tanaʹ, ngan temameʹ layen surga
1Neng penyalet tuket iaʹ ading un kudaʹ naʹan adet temameʹ, ngan ca ukoʹ kelunan uyan man lemameʹ pe. 2Tahaʹ awang ida medeng ca luncung palan iaʹ ida kuma Ukoʹ iaʹ Buheʹ. Tahaʹ dalem me un padung titiu, un pe bijaʹ ngan ruti pencai palaʹ Allah. 3Tahaʹ likut nting apeʹ iaʹ kedua, un luncung palan iaʹ ida kuma Ukoʹ iaʹ Pengekuʹo Buheʹ. 4Tahaʹ dalem me un padung pencai mat, iaʹ ukoʹ de nutung kemanyan, ngan buhan penyalet tuket iaʹ tipo kuʹun mat. Dalem buhan ina un tajau mat iaʹ ukoʹ ruti manaʹ. Un pe sekut Harun iaʹ ngelentung are. Un pe dua ledap btu diaʹ ukoʹ ukum katuk un senurat neng idi. 5Kempau buhan ina un beran melikat Kerubin diaʹ puboʹ pengaren Allah. Ida ngelibung kukoʹ dahaʹ petutung. Un sepuʹo naʹkini abeʹ le un biʹen ke nemek badaʹ katuk ini pa ketai kuʹo ho.
6Pekini layen tuk puyan ini. Singket tau ne detaʹu tai kedalem luncung palan iaʹ tahaʹ awang ke menco gayeng nte. 7Un sepuʹo neng luncung iaʹ tahaʹ dalem ina, bang laki Pengebioʹ Detaʹu tengen iaʹ senteng tai kidi, bang ca liwai ca uman le. Kun ne ngkin dahaʹ iaʹ ia ke mencai palaʹ Allah tuman usa ha tengen, ngan tuman penyalaʹ iaʹ kelunan kadoʹ lepa ti neng penuran nte. 8Cen layen tuk puyan ini, luhaʹ lan katuk Berua Buheʹ neng ilu. Ia pekatuk ilu uban janan, iaʹ ketai kedalem neng kukoʹ iaʹ pengekuʹo buheʹ ina, abeʹ melai nai pesik buk ke luncung palan tahaʹ awang peging adet te petem un. 9Puyan ini are, iaʹ nuyan ca kata milu naʹkini. Un dau sen ne uban mung pencai ngan liwa pun, diaʹ kelunan mencai palaʹ Allah, abeʹ senteng ke pedaʹam kimet kelunan diaʹ lemameʹ palaʹ ia ngan iaʹ pekina puyan. 10Puyan ina bang sihoʹ penguman, tisep, ngan naʹan naʹan adet puheʹ. Mung puyan ini nuyan ukum adet tahaʹ awang tuaʹ. Tekep le kanan ne pabeʹ tegoʹ Allah ke ngemading nge.
11Un sepuʹo lepa abeʹ ne Keristus, Laki Pengebioʹ Detaʹu iaʹ ngkang puyan iaʹ pelapa tiga, iaʹ un neng ilu naʹkini. Luncung palan, iaʹ ukoʹ o menco gayeng nge, un pelapa bioʹ ngan daʹam. Abeʹ e nuyan kuʹun kelunan, iaʹ ina abeʹ e kahum neng puyan iaʹ nuyan kusun tanaʹ ini. 12Tegoʹ Keristus tai kaʹ dalem luncung palan are, penco tai ie kaʹ dalem neng kukoʹ iaʹ Pengekuʹo Buheʹ bang ca liwai tuaʹ le. Abeʹ e ngkin dahaʹ kading ngan dahaʹ anak sapi nuyan pencai liwa ha. Un sepuʹo ia ngkin dahaʹ a tengen, man ne alaʹ milu puyan iaʹ pudip ilu neng udip saheʹ kelineʹ iaʹ ngeriman. 13Neng adet cen naʹaʹ, dulu migai dahaʹ kading, ngan dahaʹ sapi manai, peging ngan ayu anak sapi iaʹ lepa tutung, neng kelunan diaʹ jameng kuʹun kesa. Un puyan pekina apan nte ke muheʹ kelunan cen pengejameng adet de. 14Uban lan te pekina, atek bioʹ kuʹo ne puyan iaʹ nalan kuʹun dahaʹ Keristus. Moʹ man Berua iaʹ lemuto un pa majan, Keristus mencai usa ha tengen ca liwa iaʹ daʹam lan palaʹ Allah. Dahaʹ a ke muheʹ tekaʹ kimet dalem penawai le cen pemuyan iaʹ abeʹ un tuman, apan le senteng menco gayeng Allah iaʹ mudip.
15Ina ukoʹ Keristus iaʹ peteneng ca penyalet tuket iaʹ mading, apan mung kelunan, diaʹ Allah lepa mengin, senteng alaʹ peniga iaʹ ke un pa majan, iaʹ Allah lepa petuket ke naʹ milu. Puyan ini senteng nuyan uban lepa un ca patai, iaʹ senteng ke pawang kelunan kelap cen pemuyan salaʹ iaʹ ida ti dalau re mudip neng penyalet tuket iaʹ puʹun are.
16Buk un ca surat mahung isiu kena matai, tekep le nugen ban kelunan iaʹ uyan surat ina lepa matai. 17Uban surat iaʹ mahung isiu abeʹ uyan inu buk ke kelunan iaʹ uyan ne petem mudip. Buk kelunan ina lepa matai, ina le surat ina ketai un bang. 18Ina ukoʹ penyalet tuket iaʹ puʹun tai nuyan lan moʹ kuʹun dahaʹ tuaʹ le. 19Cen naʹaʹ Musa iaʹ badaʹ mung ukum katuk, iaʹ lepa luhaʹ dalem Katuk Adet te, me dulu. Uʹo ina Musa alaʹ dahaʹ anak sapi pemung ngan sungai, man daʹan jelemutin ngan bulu buraʹ iaʹ bala, penco ia migai ie kempau Kitap Adet peging ngan mung kelunan kadoʹ dina. 20Un dau musa: “Dahaʹ ini iaʹ ke ngelisan penyalet tuket, iaʹ Tuhan Allah cuk ikem tunuk ngan bayaʹ dau ue.” 21Pekina lete Musa migai dahaʹ kempau luncung palan peging ngan mung senganan iaʹ man nte lemameʹ palaʹ Allah. 22Iaʹ lan ne, bayaʹ Katuk Adet, nyeng ke ketoʹ inu iaʹ ketai buheʹ kuʹun dahaʹ. Ngan penyalaʹ kelunan ketai pesau bang buk dahaʹ kenai musa le.
Keristus iaʹ liwa iaʹ mesau penyalaʹ
23Puyan dini diaʹ nuyan kata neng puyan iaʹ lan kaʹ surga, ngan abeʹ senteng are puyan dini ketai buheʹ ngan iaʹ pekina puyan. Un sepuʹo tengen puyan diaʹ kaʹ surga, moʹ tekep un pencai liwa iaʹ pelapa tiga. 24Moʹ abeʹ Keristus tai kaʹ dalem kukoʹ iaʹ buheʹ iaʹ nuyan kuʹun kelunan, ca kata neng iaʹ atek lan. Atek tai ie kaʹ dalem surga lan, iaʹ ukoʹ o un naʹkini, ngejuma Allah tuman ilu. 25Laki Pengebioʹ Detaʹu Yahudi malai tai kaʹ dalem Kukoʹ iaʹ Buheʹ singket singket uman, ngkin dahaʹ ca pun. Un sepuʹo abeʹ Keristus liwet liwet tai mencai usa ha tengen. 26Buk ke pekina, abeʹ e are senteng liwet liwet sihoʹ tuyen cen tading udip kusun tanaʹ ini. Di lareʹ Keristus lepa nai luhaʹ ca liwai tuaʹ le, marung neng tegoʹ kajan udip ini ketai kuʹo, apan ne ke mesau penyalaʹ kuʹun liwa usa ha tengen. 27Singket singket usa kelunan abeʹ senteng are ke matai ca liwai, uʹo ina ha ke tisen Allah pebetep ukum neng ia. 28Ngan pekina lete Keristus lepa nuyan pencai liwa ca liwai, apan ne ke mesau penyalaʹ kadoʹ kelunan. Atek kenai ie luhaʹ kedua liwai ʹo, abeʹ e ke ti inu ngan penyalaʹ, un sepuʹo ia ke pudip mung kelunan diaʹ pengaʹ kenai ie.
Atualmente Selecionado:
IBERANI 9: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.