IBERANI 8
8
Yesus iaʹ Pengebioʹ Detaʹu le
1Ini ne umpung isiu le: ilu un ca Laki Pengebioʹ Detaʹu le iaʹ madung tahaʹ taʹu padung pengaren Allah iaʹ Atek Bioʹ kaʹ surga. 2Ia ngkang gayeng Pengebioʹ Detaʹu kukoʹ iaʹ kuʹo buheʹ, iaʹ ina dalem luncung palan iaʹ lan, iaʹ nedeng kuʹun Tuhan, abeʹ e nedeng kuʹun kelunan.
3Singket usa Pengebioʹ Detaʹu, dulu nyalet neng gayeng nte ke mencai pengencai ngan liwa pun palaʹ Allah. Uban ne pekina, tekep lete Pengebioʹ Detaʹu le ke un ca inu iaʹ ia ke mencai. 4Buk ke un neng usun tanaʹ ini, peletoʹ o abeʹ senteng nuyan ca detaʹu, uban un detaʹu diaʹ mencai pengencai bayaʹ puyan Adet Yahudi. 5Pemuyan nte detaʹu are, bang puyan ca kata ngan lingai neng iaʹ ke nuyan lan kaʹ surga. Kuaʹ baʹan puyan Musa cen naʹaʹ are. Kena ha ke medeng luncung palan, un dau Allah neng ia kuma ha: “Nawai tiga ne, uyan mung nge kuaʹ layen kata iaʹ ikoʹ taʹan kaʹ mudung are.” 6Un sepuʹo iaʹ lan ne Yesus un gayeng detaʹu iaʹ pelapa bioʹ cen anun nte, koʹ baʹan penyalet tuket, iaʹ ia lepa uyan kahang Allah ngan kelunan, un pelapa tiga uban, moʹ o pebesun neng tuket iaʹ petuket puyan iaʹ pelapa tiga.
7Buk ke abeʹ un iaʹ salaʹ neng penyalet tuket iaʹ ading are, abeʹ titin un penyalet tuket iaʹ kedua ha. 8Un sepuʹo Allah iaʹ peluhaʹ salaʹ kelunan diaʹ anun ne tegoʹ o kuma:
“Un dau Tuhan: Un te tau iaʹ kenai,
tegoʹ keʹ ke uyan ca penyalet tuket iaʹ
mading neng lepoʹ Israil ngan lepoʹ Yahudi.
9Abeʹ e koʹ baʹan penyalet tuket iaʹ akeʹ uyan
ngan tepun nte are,
dalau heʹ ajak ngkin ida kawang cen tanaʹ Masir.
Abeʹ de semamet bayaʹ tuket iaʹ akeʹ lepa uyan
ngan nte, ina ukoʹ keʹ abeʹ un nyingo ida.
Pekina dau Tuhan.
10Un sepuʹo naʹkini, ini ne penyalet tuket
iaʹ akeʹ ke uyan ngan lepoʹ Israil uʹo:
Un dau Tuhan: Akeʹ ke miget katuk adet ceʹ
neng kimet de ngan nyurat te neng penawai re.
Akeʹ ke nuyan Allah re,
ngan ida ke nuyan kelunan diaʹ anun nceʹ.
11Ca usa mida abeʹ titin ke pekatuk diaʹ kuaʹ
lepoʹ o, pekina pe pisiu diaʹ kuaʹ panak ke kuma:
‘Tekep koʹ ke ngetisen Tuhan.’
Uban mung nte ke tisen akeʹ,
cen diaʹ dumit pabeʹ diaʹ lataʹ.
12Akeʹ ke un pengelesau neng salaʹ de,
ngan abeʹ keʹ ke nawai penyalaʹ de laʹa.”
13Luhaʹ uban tuket iaʹ ading are lepa mubo kuʹun Allah, uban Allah iaʹ pisiu neng puyan tuket mading ini. Moʹ inu iaʹ ketai mubo, ngan abeʹ un bang laʹa, laho ketai salai.
Atualmente Selecionado:
IBERANI 8: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.