Rom 9
9
Wɛ na kuri nɔɔna balo se ba taa ye o nyem to
1Amo na ye Yezu Krista nyem to, a ŋɔɔne chega mo ye ko dae vwa. Wɛ Sin-laao kom na wo a bochare ne to mo pae a yɔɔre a yei we, 2a wo mo tiini ko chɔge amo tete dwi tiina bam ŋwaane de ba na wo sɛ Yezu Krista to. Lwia maa tiini ya jege-ne ba ŋwaane. 3Amo ya wó taa lage se a le a tete Wɛ yiga ne a yage se ko pa amo pwɛ Yezu Krista tei ne, nenɛɛne ko ya ná wó wane ko woli amo nu-bia bam. Banto ye amo tete dwi tiina. 4Ba ye Isarele dwi tiina mo. Ko ye banto mo Wɛ déem pɛ ba ji o bia, ye o bere-ba o nenɔŋ-fɔrɔ kom. O ma gwoni ni o pa-ba, ye o daare o ke o nia yam ba jeŋa ne. O ma bere-ba ba na jege se ba taa zuli‑o tei to. O ma pwooli se o taa nii ba baŋa ne. 5Ba kuri nwoŋi debam nabaaro Isarele bia fuga-balei bam wone mo. Ba na loge Yezu Krista logo baŋa ne to, ko ye banto dwi tiina wone mo o nwoŋi. Wonto mo ye wonnu maama Tu Wɛ wom na maŋe se o taa jwoŋi teem taa wuu to. Ameena.
6Isarele dwi tiina bam na ve Wɛ to nam ba bere we Wɛ na gwoni o ni se o ke kolo to jigi kafɛ. Kokuri to, ko dae we Isarele dwi tiina bam maama mo seene ba ye Isarele tiina chekke Wɛ yiga ne. 7Abaraham dwi tiina bam maama nam dae o bia chekke Wɛ yiga ne. Wɛ déem tage de Abaraham o we, “Amo tei ne, n bu Izaak dwi dem yerane mo wó taa ye n dwi tiina chekke.”#Pulim 21:8-21 8Ko bere we, ko dae bia balo maama ba na loge to mo ye Wɛ bia chekke. Ko nam ye bia balo Wɛ na pwooli kampwola kam ba ŋwaane ye ba laam lo-ba to mo seene ba ye Abaraham dwi tiina chekke. 9Kolo ŋwaane Wɛ déem pwooli we, “Maŋa kam ná yia, amo wó jwoori a ba, dedaane Sara laam jege bakeira o jeŋa ne.”#Pulim 18:10
10Kolo na woli da to mo ye Izaak kaane Rabɛka déem loge bia balei ye ba ye kwo dedoa. Wonto maa ye debam nabaaro Izaak. 11-12Maŋa kam Rabɛka ta na wo loge o bia balei bam, ye ba daa ta wo maŋe se ba ke keim-laaro naa keim-balwaaro to, Wɛ déem tage ded‑o o we, “Zembaaro wom mo wó taa toŋe o pa o nyaane wom.”#Pulim 25:23 Ko ke konto se Wɛ na kuri-ba daane tei to mo tɔge o boboŋa na maŋe ya ja tei to. Ko bere we Wɛ kurim dem tɔge o na bwoŋi wolo wom se o taa ye o nyem to mo, ye ko dae nɔɔno wom kikia ŋwaane. 13Wɛ na tage kolo to popone o tɔnɔ kom ne we, “Amo jege Jakob swono, ye a chuli Esawu ni taane.”#Zekaria 1:2-3
14Dé nam wó ta bɛ mo? Dé bá wane dé ta we Wɛ ba jege chega de o na pɔɔre nɔɔna daane tei to. Kɔtaa! 15Ko nam na ye tei to, Wɛ déem tage de Moses o we:
“Amo wó duri wolo maama a na kuri to yibwona,
ye a ke zaane kotu yuu ne.”#Nwoŋim 33:19
16Ko bere we ko maama tɔge Wɛ na jege nɔɔna ŋwaŋa tei to mo, ye ko dae nabiina boboŋa na lage kolo to, naa ba kikia na ye tei to. 17Wɛ déem na tage kolo de Ejipti Pa-faro wom to popone o tɔnɔ kom ne we, “Woŋo kolo ŋwaane amo na pɛ chwoŋa se n yere zaŋe to mo ye se a wane a tɔge nmo ŋwaane a bere nɔɔna amo dam dem na mae tei to, ye a daare a jwoŋi yere logo baŋa jei maama ne.”#Nwoŋim 9:16 18Ko bere we Wɛ duri balo ŋwaŋa nenɛɛne o na boŋe tei to mo, ye o daare o pa badwonna taa jege yi-dɛɛre nenɛɛne o na boŋe tei to.
19Abam dedoa wae o bwei amo we, “Bɛŋwaane mo Wɛ nam yaale nɔɔna de ba kikia? Dé bá wane dé ve keim delo Wɛ na jaane boboŋa se dé ke to.” 20Nmo nam na ye nabiinu to, n ye wɔ mo se n jwoori n bwei Wɛ? Ko ná ye kamɔgɔ, ko bá wane ko bwei ko mɔro wom we, “Bɛ mo ye n ke-ne tento dwoŋi?”#Izaya 45:9 21Kamɔ-mɔro wom nam jege chwoŋa se o kwei dɔgɔ o chɛ o ma mɔ kamwaro telei, ne o boboŋa na jaane se o ke tei to. O wae o mɔɔne dedoa se ka taa ye lonne nyem, ye o daare o mɔ kadwoŋi se ka taa ye woŋo maama nyem.#Jeremia 18:2-7
22Ko ta ye konto mo de Wɛ. O ná lage se o bere nɔɔna o ban-zɔŋɔ kom de o dam dem na mae tei to, o jege chwoŋa se o peene o bane mo de balo na chuchugi o bane ye ba maŋe de chɔgem to. 23O jege chwoŋa se o peene o bane konto dwoŋi se ko wane ko woli balo na daare ye o jege ba ŋwaŋa to, se ba lɔre o paare dem na tiini de jege nenɔŋ-fɔrɔ tei to. Banto maa ye balo o na maŋe o tiŋi se ba zo o paare dem wo to. 24Debam mo konto. Dé maa ye balo o na kuri nabiina dwi maama wone, ye ko dae Juu tiina dwi dem yerane wone to.
25Wɛ maŋe o tɔge Hosea baŋa ne o we:
“Nɔɔna balo ya na dae amo nyem to mo
a laam wó bwoŋi-ba we, amo nɔɔna bam.
Dwi tiina balo amo ya na ba jege ba swono to mo
a laam wó bwoŋi-ba we, amo nɔn-swonnu tem.
26Jeiga kalo Wɛ ya na tage de-ba we,
ba dae o nɔɔna to,
jeiga kam konto ne nɔɔ mo ba laam wó bwoŋi-ba we,
Ŋwea Tu Wɛ wom bia bam.”#Hosea 1:10
27Izaya de déem ŋɔɔne Isarele tiina bam taane o we:
“Isarele tiina bam ná maŋe ba daga,
ne naneo ni kasolo bia na ye tei,
ba fenfee yerane mo wó na verem.
28Kolo ŋwaane Baŋa Wɛ wó ke lela mo
o pa se nabiina maama lɔre o boboŋa na jaane
se o waare-ba tei to ye taane daa tera.”#Izaya 10:22-23
29Ko ta ye nenɛɛne Izaya na maŋe o ta tei o we:
“Paŋwa Tu Baŋa Wɛ ya ná wo daare debam badaara
o yage dé dwi dem ne,
dé dwi dem ya ti mo,
ne ko déem na ke Sodom teo tiina tei to.
Dé ya wó ji ne Gomora teo déem na ye tei to.”#Izaya 1:9
30Dé nam wó ta bɛ mo? Dé lɔre we dwi-gɛ tiina balo ya na ba kwaane ba nii se ba na chega Wɛ tei ne to laam seene ba jege chega Wɛ tei ne. Ko ye ba na ke ba wo-dedoa de Wɛ to ŋwaane mo ba nɛ chega kam konto. 31Ko daare Isarele dwi tiina bam mo tiini ba kwaane se ba na chega Wɛ tei ne de ba na tɔge o nia yam tei to ye ba ga. 32Bɛ mo ye ba nam ga? Kolo ŋwaane banto boŋe se ba na chega mo ba keim-laaro ŋwaane ye ko dae ba na jege wo-dedoa de Wɛ tei to. Ba na ve Wɛ konto to nye de ba mage ba naga de kandwɛ delo na pae nɔɔna chɔɔle ba toe to ye ba seene ba to tega ne. 33Ko maŋe ko popone Wɛ tɔnɔ kom ne we:
“Nii-na! Amo lage a chwi kandwɛ mo Zion ne.
De maa ye pelɔrɔ kolo na cheili
pa nɔɔna gare-ko ba to tega ne to mo.
Ko daare nɔɔno ná ke o wo-dedoa
de wolo na ye kandwɛ dem to,
chaveera bá fɔge ya ja kotu.”#Izaya 8:14; 28:16
Atualmente Selecionado:
Rom 9: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
