Rom 10
10
Isarele dwi tiina boboŋa muri Wɛ tei ne
1A nu-bia bam, amo tiini a jege teena a bochare ne we Isarele dwi tiina wó na verem, ye a yeini a lwoori Wɛ a pa-ba ko ŋwaane. 2Amo nam wó zege ba kwaga ne we, ba tiini ba lage se ba tɔge Wɛ boboŋa ye ba yeiri chwoŋa kalo ba na jege se ba tɔge to. 3Ba maa yeiri chwoŋa kalo Wɛ na tɔge o maa pae se nabiina na chega o tei ne to. Ba maa boŋe se ba tiŋi ba tete chwoŋa se ba maa na chega Wɛ tei ne, ye ba ba sɛ se ba taa tɔge chwoŋa kalo Wɛ na tiŋi to. 4Yezu Krista mo pɛ se Wɛ nia yam tɔgem chwoŋa kam laam ba ka kweeli, pa se balo maama na ke ba wo-dedoa de Wɛ to laam na chega o tei ne.
5Moses déem popone ko na ye tei ye nɔɔna wae ba na chega Wɛ tei ne o nia yam tɔgem ŋwaane. Moses popone we, “Wolo kikia na tɔge Wɛ nia yam to wó na ŋwea ya baŋa ne.”#Chullu 18:5 6Ko nam ná ye nɔɔna na ke tei ba jege chega Wɛ tei ne ba wo-dedoa kam ŋwaane to, ko bá taa dana. Ko popone we, “Yé bwei n tete ne nenɛɛne, wɔ mo wó wane o di telaao?” Dé ba jege se dé vo dáane dé pa Yezu Krista tu o ba se o zeini debam. 7“Daa‑n yé bwei nenɛɛne, wɔ mo wó wane o zo tega kuri ne?” Dé ba jege se dé vo dáane dé pa Yezu bi toone wone o ba. 8Ko nam popone we, “Ko ba dana se n wane n lɔre Wɛ kwora kam. Ka maŋe ka wo nmo tei ne, de nmo ni ne, de nmo bochare ne.” Kwora kam konto zege wo-dedoa yera ne mo, ye kanto mo dé jege dé bere nɔɔna.#Nia Gulim 30:11-14 9Ka maa we, nmo ná tɛ jaja we Yezu mo ye Teiru wom, ye nmo ná sɛ de n bochare maama we Wɛ seene o bi‑o toone wone, Wɛ wó jwoŋi nmo ŋwea. 10Kolo ŋwaane ko ye nmo bochare ne mo nmo wó sɛ de n wo-dedoa ye n na chega Wɛ tei ne. Ko daare ko ye nmo ni ne mo nmo wó ta jaja we, n sɛ Yezu pa n na verem. 11Ko popone Wɛ tɔnɔ kom ne we, “Wolo maama ná ke o wo-dedoa de Wɛ Dam Tu wom, chaveera bá ja kotu.”#Izaya 28:16 12Ko ye bedwe mo nɔɔna maama tei ne, Juu tiina bam de dwi-gɛ tiina bam de. Ba maama Teiru ye dedoa mo, ye o yeini o swɛ balo maama na lwoori zeinim o tei ne to swolim. 13Kolo ŋwaane, “Wolo maama ná bwoŋi dé Teiru wom yere o ma lwoori zeinim, kotu wó na verem.”#Joweli 2:32
14Ko nam na ye konto to, nɔɔna ná wo ke ba wo-dedoa de Yezu Krista, ba wó ke tɛ mo ba lwoori zeinim o tei ne? Ba ta wó wane ba ke ba wo-dedoa ded‑o ye ba wo nigi o kwora na? Ba nam wó wane ba ni o kwora ye nɔɔn-nɔɔno wo tɔɔle-ka o bere-ba na? 15Nɔɔno nam wó ke tɛ mo o vo o tɔɔle Wɛ kwora kam o bere-ba ye Wɛ wo toŋe‑o? Ko nam popone we, “Balo na jege kwor-ywoŋa ba beeri ba bwooli to veiŋa jege ywoni mo.”#Izaya 52:7
16Ko nam dae we nɔɔna maama mo sɛ Wɛ kwor-ywoŋa kam. Izaya déem tage o we, “Dé Teiru Wɛ, debam na tɔɔle kwora kalo to, wɔ mo sɛ we ka ye chega?”#Izaya 53:1 17Ko maama bere we nɔɔna zwa na ni kolo to mo pa-ba chwoŋa se ba ke ba wo-dedoa de Wɛ. Kwora kalo ba na jege se ba ni to mo ye Yezu Krista yera taane.
18Amo lage a bwei a nii, Isarele tiina bam wo nigi Wɛ ni taane dem mo na? Ba seene ba ni-de. Ko ye chega mo Wɛ tontoŋena bam seeni we:
“Ba kwora kam yi logo baŋa jei maama mo.
Ba ni taane jage de yi dɔŋɔ ni maama.”#Lei 19:4
19Amo ta lage a bwei a nii, Isarele tiina bam wo lɔre taane dem kuri na? Ba nam lɔre. Da-yiga to, Wɛ déem tɔge Moses ŋwaane o ta de-ba o we,
“Amo wó tɔge dwi-gɛ tiina balo na ye nɔn-yɔɔro to baŋa ne
a ma pa se abam taa jege kazwe á zwe de-ba,
ye á bane zaŋe ba ŋwaane.”#Nia Gulim 32:21
20Ko woli da, Izaya de déem jege baare ye o ta Wɛ taane o we:
“Ko ná ye balo na wo beeri a jei se ba lɔre-ne to,
banto mo tu ba lɔre amo.
A ta ma le a tete
a bere balo na wo bwei amo bwia to.”#Izaya 65:1
21Ko nam ná ye Isarele tiina bam, Wɛ maa we,
“Dɛ wone maama amo tei a jeŋa se a zaane a nɔɔna bam,
de ba na maŋe ba ye zwabani-nyena tei to de.”#Izaya 65:2
Atualmente Selecionado:
Rom 10: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
