Rom 15
15
Dé na wó fɔge daane tei to
1Debam balo boboŋa na dana Wɛ yiga ne to jege se dé taa woli balo boboŋa ta na ba dana to mo, de ba boboŋa na daane-ba tei to. Dé yé taa tɔge dé tete boboŋa keim. 2Debam maama nam jege se dé taa ke kolo na tɔge dé dwoŋi boboŋa na lage tei to mo, ye dé ke‑o lanyerane se ko pa o fɔge o tɔge Wɛ chwoŋa. 3Yezu Krista tete nam wo lage lanyerane o pa o tete. Ko nam na ye tei to, Wɛ tɔnɔ kom bere Yezu taane de ko na we, “Nɔɔna na jege nmo ba twea tei to mo jwoori ko tui amo baŋa.”#Lei 69:9 4Kolo maama déem na popone Wɛ tɔnɔ kom wone to ye se ko bere debam Wɛ chega kam mo. Kolo na popone da to yeini ko pa dé na pu-dɛa de baare, pa se dé jege teena Wɛ tei ne.
5Wɛ mo ye wolo na pae nɔɔna pu-dɛa de baare to, ye wonto wó pa abam taa jege boboŋe dedwe daane, ne Yezu Krista na lage tei to. 6Ko laam wó pa se abam maama sɛ daane ye á jege ni dedwe á ma‑á zuli Wɛ wom na ye dé Teiru Yezu Krista Kwo to.
7Jwoŋi-na daane lanyerane, ne Yezu Krista na jwoŋi abam tei to. Konto wó pa se Wɛ na zula. 8Amo nam tɛ abam we, Yezu Krista déem tu se o toŋe o pa Juu tiina bam mo Wɛ chega kam ŋwaane, se ko pa Wɛ na pwooli de ba nabaara bam tei to taa jege chega. 9Konto ma kwori ko pa dwi-gɛ tiina bam de ba ba zuli Wɛ, o na jege ba ŋwaŋa to ŋwaane, ne Wɛ tɔnɔ kom na bere tei ko we:
“Amo wó tei nmo,
se dwi-gɛ tiina taa yei n ni ne.
A ta wó leeni a zeiŋi nmo yere.”#2 Samuwel 22:50; Lei 18:49
10Ko ta popone we:
“Abam dwi-gɛ tiina bam, tɔge-na de Wɛ nɔɔna bam maama
se á ta‑á chaka de wopwolo.”#Nia Gulim 32:43
11Ko ta we:
“Logo baŋa dwi tiina maama,
ba-na á tei Baŋa Wɛ.
Pa-na se nabiina na nwoŋi teene delo maama wone to taa zuli‑o.”#Lei 117:1
12Izaya de déem we:
“Jesse dwi dem tu dedoa wó zaŋe o ba
se o taa tei logo baŋa teene dem,
ye banto wó taa jege teena o tei ne.”#Izaya 11:10
13Wɛ nam ye teena tu, ye wonto wó pa abam taa jege wopwolo de bochare-zuru, á na jege wo-dedoa ded‑o to ŋwaane. Wɛ Sin-laao kom dam laam wó pa se á na jege teena de Wɛ tei to fɔge ko puli ko ja gaale.
Pɔɔl kwaane o toŋe o pa dwi-gɛ tiina
14A nu-bia bam, amo tei ne a yei lanyerane we abam tɔge keim-laaro yerane mo ye á tiini á jege yeino dwi maama pa se á wae á bere daane Wɛ chega kam. 15Amo nam na popone se a bere abam taana yadwonna tei to, a ke de a wo maama mo se a pa á guli-ya. Amo ke konto de Wɛ na pɛ-ne zaane se a taa toŋe totoŋe delo to. 16O ta ma pa-ne chwoŋa se a taa ye Yezu Krista tontoŋeno dwi-gɛ tiina bam wone. Amo na toŋe a pa Wɛ tei to mo ye a yeini a tɔɔle o kwor-ywoŋa kam se a wane a jwoŋi dwi-gɛ tiina a ke-ba Wɛ jeŋa ne, se ba pa o wo pwoli, o Sin-laao kom na fɔge ko kwɛ ba bochara to ŋwaane.
17Konto ŋwaane, amo na me de Yezu Krista to, a jege chwoŋa se a bere a tete de a na toŋe a pa Wɛ tei to. 18Amo nam kɔre chaveera se a ŋɔɔne kolokolo ye ko dae Yezu Krista na tɔge amo baŋa ne o ke kolo to. Ko ye Yezu mo pɛ se dwi-gɛ tiina bam da amo ŋwaane ba sɛ Wɛ, de amo ni taane de a kikia yam na bere-ba tei to. 19O ma pa se ba ba ba sɛ Wɛ, de o na dɛ o Sin-laao kom dam ŋwaane o pa se ba na wo-kenkagela de maana yalo na bere o dam to. Konto dwoŋi mo a zege Jerusalem ne a tole jei maama a vo a yi Ilirikum, ye a tiini a tɔɔle Wɛ kwor-ywoŋa kalo na bere Yezu Krista chega kam to. 20Amo boboŋa déem ya maŋe ya ja se a kwaane a taa tɔɔle Wɛ kwor-ywoŋa kam jei selo ne ba ta na wo lɔre Yezu Krista taane dem to mo. Amo ba lage se a taa toŋe a gwaane de totoŋe delo nɔɔno wodwoŋi na maŋe o ke to. 21Ko nam ye ko na maŋe ko popone Wɛ tɔnɔ kom ne tei to we:
“Ba ta na wo tage o taane ba bere balo to
laam wó ba ba lɔre-de.
Balo ta na wo nigi o ŋwa to
laam wó ba ba ni o chega kam kuri.”#Izaya 52:15
22Ko ye konto ŋwaane mo amo gɛ laŋa kuni dedɛ se a ba abam tei. 23Ko daare leile konto amo daa ba jege chwoŋa se a taa toŋe jei sem konto ne. Amo na jege abam fera bena dedɛ se a ba a na abam to, 24amo laam boŋe se a ba maŋa kalo a na wó zaŋe a vo Sapeeni to. Amo lage se a tɔge abam tei, se a wane a di wopwolo de abam da fenfee. Abam laam wó wane á woli-ne se a kwei chwoŋa a kɛ. 25Leile konto amo lage a vo Jerusalem se a toŋe a woli Yezu nɔɔna bam dáane.#Kikia 24:17-18 26Yezu kɔgɔ kom nɔɔna balo na wo Makedonia ne de Akaya ne to mo mɛ ba boboŋa se ba la sabu ba ma woli Yezu nɔɔna balo na wo Jerusalem ne ye yiniga jege-ba to. 27Ko ye ba tete boboŋa mo ba mɛ ba ke konto. Ko nam maŋe se ba woli-ba konto dwoŋi, kolo ŋwaane Juu tiina bam ya maŋe ba kwei Wɛ wo-laaro mo ba chɛ de dwi-gɛ tiina bam. Konto ŋwaane dwi-gɛ tiina bam jege se ba de daa woli Juu tiina bam de wonnu telo na wó fɔge ba yera to.
28Amo ná ti totoŋe dento ye a kwei sabu kom maama a ke nɔɔna bam jeŋa ne, amo laam wó tɔge abam tei se a daare a vo Sapeeni. 29Amo nam yei we, a ná tu abam tei, amo wó taa jege Yezu Krista dam se o swɛ abam swolim ko ja gaale.
30A nu-bia bam, amo lage a kwoori abam dé Teiru Yezu Krista ŋwaane, de swono kolo Wɛ Sin-laao kom na pɛ debam to ŋwaane, se á ta‑á woli-ne a totoŋ-chɛɛra wone de á na lwoori Wɛ á pa-ne tei to. 31Lwoori-na Wɛ se o jwoŋi-ne balo na wo Judea ne ye ba ve Yezu to jeŋa ne, se o daare o pa se Yezu nɔɔna balo na wo Jerusalem ne to sɛ totoŋa yalo amo na wó ke a pa-ba Wɛ ŋwaane to. 32Wɛ ná sɛ, amo laam wó wane a ba abam tei de wopwolo, se a daare a na ywoni abam tei ne. 33Bochare-zuru Tu Baŋa Wɛ wó taa wo abam tei ne. Ameena.
Atualmente Selecionado:
Rom 15: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
