Rom 14
14
Dé yé taa yaale dé dwonna
1Nɔɔno wolo ná jege wo-dedoa de Wɛ, ye o boboŋa ta ná ba dana Wɛ yiga ne, se á jwoŋi konto tu lanyerane. Á nam yé mage ni-kantɔgɔ ded‑o de o na boŋe tei to. 2Nɔɔno wó taa wora o boboŋa na dana o wo-dedoa kam ŋwaane pa se o ba chuli kolokolo dim. Ko daare nɔɔno wodwoŋi boboŋa na ba dana de o wo-dedoa kam to wó taa chuli nɔna. 3Wɛ nam jwoŋi ba maama. Wolo wom na ba kuri o di to yé zaŋe o gwooni wolo wom na ba di woŋo maama to. Wolo nam na ba di woŋo maama to yé zaŋe o yaale wolo na ba chuli o di to, kotu na ye Wɛ nyem to ŋwaane.#Kolosia 2:16-17 4Nmo ye wɔ mo se n yaale nɔɔno wodwoŋi tontoŋeno kikia? Ko ye o tu wom mo jege se o nii, o ke chega naa o wo ke. Wolo na ye dé Teiru wom nyem to ke lanyerane, dé Teiru wom na wae o pa o zege de chega to ŋwaane.
5Nɔɔno wó taa wora o na pɔɔre dɛ o pa de dwoi da yadwonna. Ko daare nɔɔno wodwoŋi maa wora o na ba kuri da yam daane. Nɔɔno maama nam na boŋe tei de tei to, o jege se o taa zege ko baŋa ne mo. 6Nɔɔno wolo na kuri dɛ se de taa ye dɛ-kamunu to yeini o ke konto dé Teiru wom ŋwaane mo. Wolo na di woŋo maama to ke konto o ma zuli dé Teiru wom, o na yeini o ke Wɛ lei wodiu kom baŋa ne to ŋwaane. Wolo nam na ba di woŋo maama to de ke konto o ma zuli dé Teiru wom ye o ke Wɛ lei. 7Debam wolowolo ba ŋwe o tete yerane ŋwaane. Wolo ná tega, ko bá taa ye o tete yerane ŋwaane. 8Dé ze ná ŋwe, dé ŋwe dé Teiru wom ŋwaane mo. Dé nam ná tega, ko ta ye dé Teiru wom ŋwaane. Mo kokuri, dé ná ŋwe naa dé ná tega, dé ta ye dé Teiru wom nyem mo. 9Yezu Krista déem na tega ye o jwoori o bi o na ŋwea to, ko ye se o na chwoŋa se o taa ye balo na tege to Teiru, de nɔn-ŋwena de Teiru wom mo.
10Ko na ye konto to, bɛ mo ye n yaale n nu-bu? Ko daare nmo, bɛ mo ye n gwooni n nu-bu? Debam maama nam wó ba dé zege Wɛ yiga ne se o di debam taane. 11Ko popone Wɛ tɔnɔ kom ne we:
“Amo Baŋa Wɛ na ye ŋwea tu to,
ko seene ko ye chega mo we,
nabiina maama wó ba ba kuni nadwoona amo yiga ne,
ye ba puri ba ni ba sɛ ba pa amo.”#Izaya 45:23; Filipi 2:10
12Ko bere we debam maama wó ba dé zege Wɛ yiga ne se dé tole dé kwora dé bere‑o.
13Konto ŋwaane, dé daa yé taa yaale dé dwonna yuu. Nam pa se á boboŋa ja se á yé ke kolo na wó pa á nu-bu wo chɔge naa ko pa o tusi to. 14Amo na me de dé Teiru Yezu to, amo yei lanyerane we wodiu tera ko tete na jege digiru Wɛ tei ne. Nɔɔno nam ná pɛ se woŋo kolo ye wo-digiru, ko seene ko ye wo-digiru ko pa nɔɔno wom konto mo. 15Nmo nam ná pɛ se n nu-bu wo chɔge de nmo na di wodiu kolo to, ko bere we n daa‑n ba tɔge swono chwoŋa ded‑o. Yé pa se nmo na di wodiu kolo to chɔge nɔɔno Wɛ yiga ne, ye kotu ye wolo Yezu Krista na tege o ŋwaane to. 16Yé pa se nɔɔna na chwoŋa se ba yaale woŋo kolo na lana nmo tei ne to. 17Debam na ye Wɛ paare dem nɔɔna tei to ba tɔge wodiiru dim ŋwaane. Ko nam tɔge keim-laaro ŋwaane mo, de bochare-zuru de wopwolo ŋwaane, ne Wɛ Sin-laao kom na pae debam tei to. 18Wolo maama nam ná sɛ o tɔge Yezu Krista konto dwoŋi, konto tu wó pwoli Wɛ wo ye nɔɔna de wó pa‑o chega.
19Konto ŋwaane pa-na dé kwaane dé taa ke kolo maama na pae nɔɔna jege ywoni daane ye ko fɔge-ba Wɛ chwoŋa ne to. 20Yé pa se wodiiru dim chɔge totoŋa yalo Wɛ na ke de nɔɔna to. Wodiiru dwi maama maŋe de dim mo. Nmo nam ná di kolo na wó pa se n dwoŋi wo chɔge ko ŋwaane to, se n yage wodiu kom konto dim. 21Ko lana se n yé ke kolo maama na wó pa se n nu-bu tusi Wɛ chwoŋa ne to, ko ná ye nɔm dim, naa sana nyɔɔm, naa kolo maama.
22Nmo boboŋa ná jaane tei n wo-dedoa kam ŋwaane, se n pa ko taa ye nmo de Wɛ laŋa ne. Nɔɔno wolo ná yei kolo na lana se o ke to ye o ba jege boboŋa yalei ko ŋwaane, konto tu yuu ywomma. 23Ko daare nɔɔno wolo ná jege bobwea de o na di wodiu kolo to, konto tu bá na bora Wɛ tei ne. Ko bere we o ba jege wo-dedoa o dim dem wone. Kikia yalo maama na ba tɔge wo-dedoa keim to ye wɛleera mo.
Atualmente Selecionado:
Rom 14: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
