1 Korinti 3
3
Wɛ tontoŋena na toŋe ba pa Wɛ tei to
1A nu-bia bam, amo déem na wo abam tei ne to, a ware a ŋɔɔne Wɛ taane de abam ne Jworo kom na wo balo tei ne to. A déem ŋɔɔne de abam nenɛɛne á ye balo logo baŋa wonnu fera na jege-ba to ye á ta ye bu-balɛ mo Yezu Krista tei ne. 2A déem na bere abam wo-mwaalo telo to nye de a pɛ abam nayela mo se á nyɔ. A déem wo pɛ abam wodiu, kolo ŋwaane á déem wo yi ko dim.#Hiburu 5:12-14 De zem de, á daa ta wo yi wodiu dim, 3kolo ŋwaane á ta ye balo logo baŋa wonnu fera na jege-ba to mo. Abam jege wo-goo ye á mage ni-kantɔgɔ daane. Konto bere we logo baŋa wo-yɔɔro fera mo ta jege abam, ye á tɔge balo ta na yeiri Wɛ to kikia. A fɔ vwa na? 4Abam dedoa ná tɛ o we, o tɔge Pɔɔl mo, ye wodwoŋi de ná we, o tɔge Apolo mo, ko dae balo na yeiri Wɛ to kikia mo konto na?#1 Korinti 1:12
5Wɔ mo ye Apolo? Wɔ mo ye amo Pɔɔl? Debam maama ye Wɛ tontoŋena mo, ye Wɛ dɛ debam ŋwaane mo o pa á sɛ Yezu Krista. Debam maama toŋe kolo dé Teiru wom na pɛ debam se dé ke to mo. 6Amo Pɔɔl mo dugi wonnu abam bochara ne. Apolo ma yage na da, ye te puli.#Kikia 18:5, 24-28 Ko daare ko ye Wɛ mo pɛ te be. 7Mo kokuri, wolo na dugi to, de wolo na yage na da to maama dae kolokolo. Wɛ yerane mo wae o pae o taane dem ke dam nɔɔna bochara ne. 8Wolo na dugi to de wolo na yage na to maama ye bedwe mo. Wɛ wó pa ba maama jwoŋi ba ŋweero ko maŋe de ba na toŋe tei to mo. 9Debam maama toŋe daane mo dé pa Wɛ. Abam nye de Wɛ kara kalo dé na dugi ka wone to mo.
Abam daa ta nye de diga kalo Wɛ na wora o lɔ to mo. 10Wɛ na zeini amo se a toŋe totoŋe delo to ye amo beiri diga kam kuri mo, ne lɔro na yei o totoŋa chekke tei to. Nɔɔno wodwoŋi de maa wora o lɔa o daŋe da. Wolo maama nam na lage se o lɔ o daŋe da to jege se o taa yei o na lɔ tei to mo. 11Nɔɔn-nɔɔno daa bá wane o beiri diga kam kuri, kolo ŋwaane Wɛ maŋe o pa Yezu Krista ji kuri delo yerane na ye chekke to mo o beiri-ka. 12Wolo na wó lɔ o daŋe da to wae o kwei sabu-seŋa, naa lu-nyenno, naa kandwa-nyenno, naa dɛ, naa ga-korro o maa lɔa. 13Nɔɔno maama na toŋe kolo to nam wó ba ko lɔre jaja. Yezu Krista tutuuri dɛ dem ná yia, de wó ba de mini mo. Mini dem mo wó bere nɔɔno maama totoŋa na ye tei. 14Balo na mɛ wo-laaro ba lɔ ye mini dem wo wane de di to wó jwoŋi ba ŋweero. 15Ko daare balo mini dem na wane de di ba lɔɔm dem to wó ga woŋo maama. Nɔɔna bam tete bá te. Ba nam wó taa nye de mini na di nɔɔno ye o wori tei to mo.
16Wɛ Jworo kom na wo abam bochara ne to, á nye de Wɛ tete diga kalo o na zoore ka wone to mo. Á yeiri konto na? 17Wolo nam ná chɔge Wɛ diga kam, Wɛ wó chɔge kotu de. Wɛ diga kam ye wose mo. Abam tete nam mo ye o diga kam konto.
18Nɔɔn-nɔɔno yé zaŋe o gane o tete. Abam wolo ná boŋe we o jege swa, ne zem logo baŋa swa na ye tei to, konto tu jege se o jwoori o ji nɔn-jworo mo, se o laam wane o na swa chekke. 19Kokuri logo baŋa swa yam ye jworim mo Wɛ yiga ne. Ko popone Wɛ tɔnɔ kom ne we, “Wɛ vugimi swa tiina swa yam pa ya jwoori ya ja-ba.”#Job 5:13 20Ko daa ta popone we, “Baŋa Wɛ maŋe o yei swa tiina na boŋe ba ja kolo to. O yei we ba boboŋa yam ye kafɛ mo.”#Lei 94:11 21Konto ŋwaane, nɔɔn-nɔɔno yé zaŋe o mage o nyɔɔne de o na tɔge nabiinu wolo to. Woŋo maama ye abam nyem mo. 22Ko ná ye amo Pɔɔl, de Apolo, de Piita, debam de ye abam nyem mo. Ko nam ná ye logo baŋa, de ŋwea, de toone, de zem, de jwa de, abam mo tei te maama. 23Yezu Krista nam mo tei abam, ye Wɛ tei Yezu Krista tete de.
Atualmente Selecionado:
1 Korinti 3: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)