1 Korinti 2
2
1A nu-bia bam, a déem na tu abam tei to, amo wo bere a tete se a pa a ni taane de a swa taa gare abam, de a na tɔɔle Wɛ taane dem a bere abam tei to. 2A wo ke a boboŋa ne se a bere abam kolokolo, ko ná dae Yezu Krista de o toone dem dagara kam yuu ne to taane yerane.#Galatia 6:14 3A na wo abam tei ne to, a déem tiini a bwona de abam, ye foone tiini de jege-ne, ye a yera sae. 4A ŋɔŋa kam de a na tɔɔle Wɛ kwora kam tei to dae swa mo a kea se a pa á sɛ taane dem. Ko ye Wɛ Sin-laao kom de o dam mo pɛ se á lɔre we, taane dem ye chega. 5Konto to, á na ke á wo-dedoa de Yezu to, ko tɔge Wɛ dam dem ŋwaane mo, se ko dae nabiina swa ŋwaane.
6Dé nam yeini dé bere balo boboŋa na kweere to mo swa, ye ko dae nabiina swa, naa logo baŋa dedɛɛra bam swa. Banto wó ba ba ti de ba dam dem maama. 7Debam na bere swa yalo to ye Wɛ swa mo. Nabiina nam yeiri ya ni ne, Wɛ na seigi-ya ba yiga ne to ŋwaane. Faŋa faŋa ye logo baŋa ta tera to, Wɛ déem maŋe o ke o boboŋa ne se dé da swa yam konto ŋwaane mo dé na paare o tei ne. 8Logo baŋa dedɛɛra bam wolowolo nam wo lɔre ya kuri. Ba ya ná yei, ba ya bá ja Wɛ telaao paare tu Yezu ba pa dagara yuu ne ba go. 9Wɛ tɔnɔ kom nam bere o swa yam taane we:
“Wɛ fɔge o ke wo-laaro o tiŋi,
se o pa balo na swoi‑o to.
Nabiina yi wo nɛ wonnu tem konto dwoŋi,
ye ba zwa wo nigi te ŋwa.
Ba maa ba jege te boboŋa de.”#Izaya 64:4
10De ko de, Wɛ dɛ o Sin-laao kom ŋwaane mo o ma pa dé lɔre wonnu tem konto. Wɛ Sin-laao kom yeini ko da woŋo maama naga mo. Ko maa yei Wɛ wo de o boboŋa de. 11Wɔ mo wó wane o lɔre nɔɔno wodwoŋi boboŋa, ye ko dae o tete jworo? Ko nam na ye konto to, nɔɔn-nɔɔno yeiri Wɛ boboŋa, ko ná dae o tete Jworo kom yerane. 12Jworo kolo Wɛ na ke debam bochara ne to dae logo baŋa nyem. Ko nam nwoŋi Wɛ tei mo se ko pa dé lɔre wo-laaro telo o na pɛ debam zɛɛra to.
13Dé yeini dé bere nɔɔna chega kam konto, ye botare selo dé na ŋɔɔne to dae nabiina swa botare. Ko ye Wɛ Sin-laao kom mo bere debam botare selo na maŋe se dé taa ŋɔɔne to. Dé tɛ chega kalo na ye Wɛ nyem to dé bere balo o Jworo kom na wo ba bochara ne to mo. 14Wɛ Jworo kom na tere wolo bochare ne to ba sɛ se o jwoŋi ko wo-laaro tem. Te maama ye wo-jworru mo o tei ne. O bá wane o lɔre te kuri, kolo ŋwaane ko ye Wɛ Sin-laao kom mo bere te kuri chekke. 15Wolo maama Wɛ Jworo kom na wo o bochare ne to mo wae o yei woŋo maama kuri chekke. Nɔɔn-nɔɔno nam bá wane o mage banto puga o nii. 16Ko ye chega mo, de Wɛ tɔnɔ kom na bere tei we:
“Nɔɔn-nɔɔno bá wane o lɔre Baŋa Wɛ boboŋa,
se o bere‑o o na wó ke tei to.”#Izaya 40:13
Dé Teiru Yezu Krista boboŋa dedaane debam boboŋa nam ye bedwe mo.
Atualmente Selecionado:
1 Korinti 2: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
