Lv. 16
16
Beta môse ya njaman abé
(Hé 9:1-12; 10:1-22)
1Nti a nga kobô Môze e mvus awu bone b'Aron bebaé mbe be nga tebe asu Nti avale bebien be nga kômbô, ane fe be nga wu. 2Nde a nga jô Môze na: Kobô'ô monyoñ Arone na a bo te nyiin e vôme wom a n'étyi éyoñ ése, a dañedañe na a bo te tulan éyé é tyele e zañe *nda éndelé, a tebe ôsu ébuta'a é n'éwolo y'élate yôp: éyoñe te a ye bo te wu, amu ma suan ébuta'a te yôp me too e nsume *nkut été.
3Avale di nde Aron a ye nyiin e vôme wom a n'étyi: a bili étoñe nnôme nyak asu mveane ya sili *njaman abé, a nnôme ntômba asu mvean wo di'iban. 4A ye jaé éwomane ndombo é n'étyi a jaé mekuba me ndombo e nyôle jé; a ye tiñeti asese ndombo angeteñ a jaé fe ôzomezome ntôme ndombo e nlô: mengômesan me n'étyi a ye jaé mme le, éyoñ émien a tatéya mane wobane mendim. 5Wôna a ye nyoñe beyôme bikela bebaé e be bôte bese y'Israél asu mveane ya nyoñe *njaman abé, a nnôme ntômba asu mveane wo di'ibane ngumba. 6Aron a ye ve nnôme nyak mfa'a wé asu *njaman abé, éyoñe te a ye bulu nsem asu dé émien a asu *nda bôte jé. 7A ye nyoñe beyôm bikela bebaé a zuu be asu be Nti, anyiine *nda éndelé bendôba'ane. 8Eyoñe te a ye bo bikela bite bibaé *asimba, *asimba da asu Nti a di avok asu azazél. 9Aron a ye nyoñ ékela *asimba da ye liti asu Nti a ve je mveane ya *njaman abé. #16:9 Azazél a ne bo jôé asu *nkôte si nge jôé mimbia minsisim mi too *nkôte si, nge na ékela ja be'e abé ese ya bôt. 10Wôna ji *asimba da liti asu azazél a ye zuu je vevee asu be Nti, nnôm ékela ate a ye volô asu mbulane minsem éyoñe ba lôme nye Azazél e *nkôte si. 11Aron a ye ve nnôme nya'a wé asu *njaman abé, éyoñe te a ye bulu nsem asu dé émien a asu *nda bôte jé. A ye tyik e nnôme nya'a wé a ne asu *njaman abé *tyiñ. 12A ye nyoñ ési'i é bili abui metye'e me nduan a te vaa ata'a metuna'a asu be Nti a asube da nyume mvaé, njalane mo mebaé, éyoñe te a ye kee bie ôyab a éyé é tyele e zañe *nda éndelé. 13Eyoñe te a kut asub e nduan asu be Nti, nalé ôtita wo ye yian ébuta'a éwolo y'élat, a a ye bo te wu. 14A ye nyoñe metyi me nnôme nyak a miame me a ônyu ôsu ébuta'a éwolo y'élat mfa'a jôp da tôô, a ye miame metyi mete a ônyu ôsu ébuta'a éwolo y'élat tañe biyoñe zamgbwal. 15A ye tyi'i nnôm ékela *njaman abé ya bôte *tyiñ a kee metyi y'été ôyab a éyé ya e zañe *nda éndelé, a ye belane metyi mete avale fe a nga belane ma me nnôme nyak; a ye miame me e yôp a ôsu ébuta'a éwolo y'élat.
16Avale te nde a ye bulu nseme ya vôme wom a n'étyi amu mvine ya bone b'Israél, amu mimboon mi njete miab a amu minseme miabe mise. Avale te fe a ye bo asu *nda éndelé bendôba'an é ne be be, ézezañe ya mvine jap. 17Teke môt a ye tabe e *nda éndelé bendôba'an été éyoñ Aron a ye nyiine na a bulu nsem e vôme wom a n'étyi akekui a kuiya atan. A ye bulu nsem asu dé, émien, asu *nda bôte jé a asu ngum nsamba bôt ôse y'Israél.
18A ye kui atan mfa'a ata'a metuna'a e ne ôsu Nti, a bulu nsem asu ata'a metuna'a; a ye nyoñe metyi me nnôme nyak a metyi me nnôm ékela, éyoñe te a futi me mbôma'an a minla'a mi ata'a metuna'a. 19A ye miame metyi ata'a metuna'a yôp tañe biyoñe zamgbwal; a ye fubu de a telé de étyi amu mvine bone b'Israél.
20Eyoñe Aron a maneya fubu vôme wom a n'étyi, a a maneya fe fubu *nda éndelé bendôba'an a ata'a metuna'a, a ye bo na be zuu nnôm ékela vevee. 21A ye beté mo mé mebaé e nlô nnôm ékela a vee, éyoñe te a ye mem minsem mi bone b'Israél mise; melo mab a minkobane miab e nnôm ékela yôp, a beté nye mie nlô, éyoñe te a lôme nye e *nkôte si a wo ya fam é ne nkômesan ya bo jame te. 22Nnôm ékela a ye ke e vôm a ne teke bôt a be'e minseme miabe mise. Eyoñe be maneya lôm ékela e vôm a ne teke bôt, 23Aron a ye bulan e *nda éndelé bendôba'an, a vaa mengômesane me ndombo a nga jaé éyoñ a nga nyiin e vôme wom a n'étyi a li'i me valé. 24A ye wobane mendim e vôme wom a n'étyi éyoñe te a beta jaé mengômesane mé émien. Eyoñe te a ye kui atan a ve mimveane mié mia di'ibane ngumba a mimvean mi bôt mia di'ibane ngumba; a ye bulu nsem asu dé émien a asu bôt. 25A ye di'i avoñ étyi'a ya *njaman abé, ata'a metuna'a yôp.
26Môt a nga kee nnôme ntômba a ne asu Azazél e *nkôte si, a ye sôbe mengômesane mé a wobane mendim, éyoñe te a su'ulane bulan e minkan. 27E nnôme nyak a ne asu *njaman abé a e nnôm ékela a ne asu *njaman abé mbe *ntuni a nga belane metyi e vôm a n'étyi asu ya bulu minsem, ba ye kee be e minkan atan a di'i bikôbe biap, minsône miab a mebi mab e nduan. 28Môt a ye di'i biôme bite a ye sôbe mengômesane mé a wobane fe mendim, wôna a ye su'ulane bulane minkan.
29Mvinda nyô ja ye bo nyô ya éyoñ ése mfa'a wônan: e ngone zamgbwale é too melu awôm nje mia ye liti miabebiene njuk; mia ye bo te bo ésaé éziñ, to'o bialébialé to'o *ntabe ô to ézezañe jenan. #16:29 Nlitane nju'u va wo dañe fombô *ntyiane bidi, nge na mbômbane zaé. 30Amu *môs ôte ba ye bulu nsem asu denan, nalé mia ye bo mfuban; mia ye tuneban mfa'a ya minseme mienan mise asu be Nti. 31Môs ôte wo ye bo mia Sabat, *môs awo'on a mia ye liti miabebiene njuk: mvinda ya melu mese nje le.
32Ntuni ba ye wo'o mbon wo a ve nye nguleya tyendé ésaa ésaé é n'étyi été nye a ye bulu nsem. A ye jaé bifumulu mengômesan, mengômesan me n'étyi; 33A ye bulu nsem asu vôm ya Etyi a né, asu *nda éndelé bendôba'an a asu ata'a metuna'a, a a ye bulu nsem asu betuni a asu nsamba bôt ôse. 34Mvinda ya éyoñ ése mfa'a wônan nje le. Avale te nde ba ye bulu minsem mise mi bone b'Israél, mbu ôse éyoñe jia. Be nga bo e jame Nti a nga bendé Môze.
Atualmente Selecionado:
Lv. 16: BDCB
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Bible en langue Bulu © L'Alliance Biblique du Cameroun, 2007, 2015.