Lv. 15
15
Atiñe da fombô e mvin ja kui e biôm bi fam
(Nlb 5:1-4; Mk 7:20-23; 2 Ko 7:1)
1Nti a nga kobô Môze ba Arone na: 2Koba'ane bone b'Israél a jô be na: Éyoñe fam éziñ é biya ôkon e biôme bi fame bié, mendim me ne kui été, ma bo môt ate te *mfuban, 3to'o na mendim mete ma lôt nge tebe, môt ate a nji bo mfuban; melu mese minsône mié mia kuli mendim nge te kuli mendim, éto te mfubane jé é ne avale da. 4Ajô te énoñ ése môt ate a bômbô a éto ése a tabe é nji fe bo *mfuban. 5Môt a nambe énoñe te a yiane sôbe mengômesane mé, a émiene fe a yiane woban; a ye tabe te *mfuban a kui mamengô'é. 6Môt a tabe éto nkôkone te wo te tabe a yiane sôbe mengômesane mé, a émiene fe a yiane woban: a ye tabe te *mfuban a kui mamengô'é. 7Nyô a nambe e môt a kon, a yiane sôbe mengômesane mé a émiene fe a yiane woban, a ye tabe te *mfuban a kui mamengô'é. 8Nge môt a kon a tui môt a ne *mfuban mendene nyô, môt ate a yiane sôbe mengômesane mé, émiene fe a yiane woban: a ye tabe te *mfuban a kui mamengô'é. 9Eto ése ba beté tite yôb nje nkôkone te wo te tabe éyoñe wo te wulu, éto éte é nji fe bo *mfuban. 10Nyô ase a nnambe jôme nkôkon ô nga tabe yôp a ye bo te *mfuban a kui mamengô'é. Nyô a be'e avale jôme te, a ye sôbe mengômesane mé, émiene fe a ye woban a tabe te *mfuban a kui mamengô'é. 11Nyô nkôkone wo nambe te na nkôkon te wo te sôbe mo a ye sôbe mengômesane mé, émien a wobane fe, a a ye tabe te *mfuban a kui mamengô'é. 12Ba yiane bôé élaba'a tyia ése nkôkon wo te nambe; nge élaba'a te é ne ji bilé, ba yiane sôbe je a abui mendim.
13Eyoñe nkuane mendim wo te bo môt te *mfuban ô tebeya, môt a ye yange ngume sondô éyoñ a ngenan te lañebane mfuban; mvus éte a ye sôbe mengômesane mé, émiene fe a ye wobane mendim y'anjeñ a éyoñe te nje ñhe a ntoo *mfuban. 14E môse muame môt ate a ye nyoñe adu abaé nge zum ébaé a ke kee bie *ntuni, asu Nti, anyiine *nda éndelé bendôba'an. 15Ntuni a ye ve ônone wua asu mvean ya nyoñe *njaman, ônon ovo'o ki asu mvean wo di'ibane ngumba ôsu Nti, a ye su'ulane bo môt ate e jam da fubu nye e mfa'a ya nkuane mendime wé.
16Nge meyôm ma kui fam éziñ atan (éyoñ a ne ôyo a alu), a yiane wobane mendim nyôl ése a tabe te *mfuban a kui mamengô'é. 17Ngômesan ése, nge mfinga ékôb ôse atoé meyôm da te nambe bia yiane sôban a tabe te *mfuban a kui mamengô'é. 18Eyoñe fam ba minga ba te tabe, bebaane ba ye woban a tabe te *mfuban a kui mamengô'é.
Eyoñe minga a nji bo mfuban
(Lv 12:2-8; 20:18; Mk 5:25-34)
19Eyoñe minga a yene ngon a metyi ma kui nye nyôl, a ye tabe te *mfuban tañe ngume sondô. Môt a nambe nye fe a ye tabe te *mfuban a kui mamengô'é. 20Enoñ ése a bômbô a éto ése a tabe éyoñ a yene ngon bi ntoo te *mfuban. 21Môt ase a nambe énoñe jé a ye sôbe mengômesane mé, émien a wobane fe mendim a tabe te *mfuban a kui mamengô'é. 22Môt ase a nambe jôm a nga tabe yôb a ye sôbe mengômesane mé, émien a wobane fe mendim a a tabe te *mfuban a kui mamengô'é.
23Nge jôm éziñ é nga bôô énoñe jé, nge vôm a nga tabe a be nambe jôme te, môt a te nambe jôm éte a ye tabe te *mfuban a kui mamengô'é. 24Nge fam éziñ ja tabe a nye, te mfubane ya be minga a kalaneya be fam: fame fe ja ye tabe te *mfuban tañe ngume sondô, a énoñ ése a bômbô é ntoo te *mfuban.
25Eyoñe metyi ma kui minga nyôl melu melu atane ya biyoñ ya ñyenane ngone wé, nge na ñyenane ngone wé wo lôt abime melu ô wô'ô tabe, minga ate a nji bo *mfuban nté ôse metyi ma kui, avale fe ane melu ya a yene ngon. 26Enoñ ése a bômbô nge na éto ése a tabe, é nji fe bo *mfuban aval'ane biyoñe ya ñyenane ngon. 27Môt ase a nambe énoñ éte nge éto éte, a yiane sôbe mengômesane mé émien, a wobane fe, a a tabe te *mfuban a kui mamengô'é.
28Eyoñe metyi me leneya, minga a ye yange bo *mfuban e mvuse ngume sondô. 29E môse muame, a ye nyoñ adu abaé nge zum ébaé a zule ve bie *ntuni anyiine *nda bendôba'ane. 30Ntuni a ye ve ônone wua asu mimveane ya *njaman abé, a ônon ôvok asu mveane wo di'ibane ngumba. A ye su'ulane bo minga ate jame ya fubu nye asu be Nti amu metyi me nga kui.
31Mia ye bo bone b'Israél na be tebe ôyab a vôme wom a n'étyi éyoñ be nji bo mfuban; a tune be mvine jab be za wu nge ba subu bebé e vôme wom a n'étyi a tele ézezañe jenan éyoñ be nji bo *mfuban. 32Atiñe da fombô fam mendim ma kui zene befam a nyô biôm bi fam bia kui atan (éyoñ a bôô ôyo a alu) a toé nye te *mfuban,
33A minga éyoñe jé ya ñyenane ngon, nalé fe fam ja fulane minga melu minga ate a nji bo *mfuban, nde le.
Atualmente Selecionado:
Lv. 15: BDCB
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Bible en langue Bulu © L'Alliance Biblique du Cameroun, 2007, 2015.