Isaya 45
45
Yóm hmò Dwata ke Sirus
1Deng nélék Dwata Sirus mò tau hol geta.
Deng néléken mò gemwa yó kem dumu benwu mlan bè kgidahen kul.
Hógówen mò mdà kul elaan yó kem tau hol geta bè yó kem benwu yó.
Angat gotu lenkà Dwata béléen yó kem bak tikeb yóm beng hmilol syudad le.
Yó udél Dwata ebè Sirus, monen,
2“Ou he tukô gna kóm.
Tódô sentunalu béléem yó kem bulul geta kkólen bè yó kem bulul lemnek.
Ne angat genbau béléem yó kem tikeb tembaga le ne tenfoku yó kem bala tók tgel le.
3Ne blayu kóm yóm kimu labi bnos le bè gónón kmifu.
Bè yóm nmou béléem yó gónóm temngón du ou se Dwata yóm hol gónó mogot.
Ou se yóm kul Dwata yó kem tau Israél, yóm deng tódô tmaba kóm bè boluyem.
4Deng néléku u mò tmóbóng yó kem tau Israél, yó kem tau deng néléku mò tóbóng lówóhu.
Tey kehegetahu kóm, balù yóm là ketngónem dou.
5Ou se yóm Dwata hol gónó mogot.
Laen kô dù dumu Dwata, són o.
Béléu angat gónón lemwót yóm kgisem, balù yóm là ketngónem do.
6Yó gónóhu mò du yóm ni anì yó, kdéen tau bè klamang benwu angat temngón du ou yóm hol gónó mogot.
Laen kô dù dumu Dwata, són o.
7Ou se tehe dmimun du yóm layag ne bud ou se tehe dmimun du yóm kifu.
Béléu gónón lemwót yóm gel tóbóng ne béléu se gónón lemwót yóm gel gfà.
Ou se mò kul ni kem ni, yóm Dwata hol gónó mogot.
8Angat hewótu bè longit yóm kegmoem, hol lómón ke kulón lemwót bè longit gdek ete tonok ne là se kô gekbê tonok du, ngangen ne tmowok huluhen.
Yó huluhen, duhen yóm tilob kwitem yó kem tau ne yóm ktedeng kogotem kukum lem blóng le.
Ou se Dwata angat dmohò du ni kem ni.”
Yóm Dwata hol geta bè kdéen
9Henkna ye bè yóm tau mifil kuleng tonok, gbek yóm kuleng kô semgil yóm tau mifil du?
Laen kô dù gónón stólóng bè yó kem dumu kuleng.
Gbek yóm kuleng tonok kô smólók yóm tau mifil du ke tedu nmoen?
Duhen ke gbek yóm kuleng kô semlón yóm là khulung yóm tau mifil du?
10Sotuhen, wen kô ngà gembek mon du bè kem tuhahen, “Moen de ke lómón ni kmò ye do?”
11Yóm Dwata laen dù belenen gónó le mogot yó kem tau Israél, du se eles matul yóm mò kmoen elem haya.
Yó udélen, “Laen dù kwalis ye smólók do ke tedu kmou kul yó kem dou ngà, duhen ke yu tô tmulón du dou yóm hyu mò nmou bélê le.
12Ou se deng tehe dmimun du yóm klamangen benwu ne deng nmou yó kem tau nô tahen.
Lemwót bè kfasangu gónóhu hnal yó kem longit seglafin.
Ou se mogot du yóm kdaw ne yóm bulón ne yó kem blotik.
13Bud ou se gónón lemwót yó kem angat nmò Sirus anì dohò yó kem atulu hlanu bè ktedengen.
Ne angat hentedengu he yó kem ket lan loloen.
Mlan béléen yóm bud klomi kdà yóm syudad Jirusalim.
Bud mlan béléen snéen yóm bud kegewà yó kem dou tau tehe negef le.
Yóm angat nmò Sirus yó, là mlanen bè ksukéy tau du duhen ke wen filak bong blay le du.”
Ni se udél yóm Dwata laen dù là gbeken du.
14Yó udél Dwata ebè yó kem tau Israél, monen, “Angat blayu kuy yó kem kendengen yó kem tau Idyip ne yó kem tau Sudan.
Tódô le baling hesek bélê ye yó kem tau lembang tahà bè benwu Siba.
Tódô le huli kuy, igò le kendina.
Ne mtud le bukol bè solu ye, yó mon le, ‘Tahu Dwata yóm nô bélê ye, laen kô dù dumu dwata, són du.
15Yóm Dwata yó kem tau Israél yóm lemwà kul, du se yóm Dwata là ton du.
16Yó kem tau gel mò dwata lennged, tey sidek kyak le yóm kdê le.
17Okóm yó kem tau Israél deng lenwà Dwata lu kul.
Yóm kegmò le bè yó kem hohon le laen kô dù tul sónen.
Laen kô bang gónó le bud myak bè kem dumu le tau.’ ”
18Yóm Dwata gónó tekuy mogot, du se dmimun yó kem longit seglafin.
Tek sónen du yóm hol Dwata.
Bud du se mò yóm tonok ne tey mbegel yóm kmoen du, là kóen mahil sidek.
Yóm benwu nmoen yó, là kô henbalingen du benwu là hyu menwu du, okóm henbalingen benwu alì hyu menwu du.
Du se yóm gel mon du, “Ou se yóm hol gónó mogot.
Laen kô dù dumu dwata, són o.
19Laen deng udélu ke gebnos, duhen ke deng bnosu yóm atulu.
Sundu yó du hmou yó kem tau Israél ke nebel le o bè yóm benwu là hyu menwu du.
Ou se yóm Dwata gónó le mogot hono tahu yóm tulónu, gel hetngónu yóm tedeng.”
Yóm Dwata kmamal du yóm klamangen
20Mon Dwata, “Gotu ye stifun dé, kdéen tau bè klamangen benwu, yó kem dù tau mowil bè yóm kegbà Babilun.
Géhél ye edini nahu knukum yu.
Yó kem tau mógów stodol, kem tau eles gel tayal le eta yó kem dwata koyu le,
lel le gel tmaba ebè yó kem dwata là gbeken lemwà kul, laen kô dù tngón le yó kem tau mò du yóm yó.
21Géhél ye stifun anì snabà ye yóm kkukumu kuy.
Eles ye stulón són yu.
Tau du de deng gna eles tmulón du yóm kegbà Babilun yó?
Kaem ou se yóm eles tmulón du, yóm Dwata gbeken lemwà yó kem tauhen.
Laen kô dù dumu dwata bè klamangen, tek sotuhu.
22Beklil ye ebéléu dé anì lenwau yu, yu kem tau bè klamangen benwu.
Tek són ou yóm Dwata, laen dù dumuhen.
23Sok wen gel fasadu hol dohò se yó, laen kô gembek temles du.
Yóm fasadu kuy yó, là kóen bud mulék elem baku.
Yó fasadu, angat kdéen tau gotu mtud bukol bè soluhu, mung du yóm safà le béléu anì són ou yóm gónó le mogot.
24Ne yó angat mon le, ‘Són uu, Dwata, gónón mlan yóm kegmò me bè kem hohon me, són uu bemlay kum kgis.’
Okóm kdê yó kem kmutó nawa dou, angat tey sidek kehyaku kul.
25Tek són ou angat lemwà yó kem semfu gu bè tehe Jakub ne tey kdóyón le do.”
Atualmente Selecionado:
Isaya 45: tbl
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2007, Wycliffe Bible Translators, Inc. All rights reserved.
