Isaya 44
44
Tek són Dwata yóm hol gónó mogot
1Yó udél Dwata, monen, “Hol ye
hmungol, kem tau Israél, kem tau tóbóng lówóhu.
Yu se kem tau deng néléku, kem tau semfu gu bè tehe Jakub.
2Ou se yóm Dwata tehe mifil kuy.
Tódô lemwót bè ksut ye yóm tendo któbóngu kuy.
Hol bê ye abay hlikò, yakà yu du yóm tóbóng lówóhu.
Yu se kem tau deng tehe néléku, kem tau kenbong nawahu.
3Angat nmou él gu lem yóm benwu balù udì ke tehe wen élen.
Ne wen él hlelu bè yóm tonok alì sidek kékéngen.
Ne tódô suu bè yó kem ngà ye yóm dou Tulus ne tey któbóngu yó kem sfu ye.
4Bè yóm angat klowil le, hol le mkél bè yó kem bnes eles héfê tonoken ne mkél le bè yó kem koyu tmowok tmubé él.
5Ne yó kem tólóng tau, angat sotu kun mon du, ‘Tauhe Dwata dou.’
Ne yó kem tau mon du yóm yó, angat le mung bè yó kem tau Israél.
Sket kul tmugéng du bè sigel le yóm boluy Dwata.
Gel mon le, ‘Ou se sotu tau Dwata.’ ”
6Yó bud udél yóm Dwata mogot yó kem tau Israél, yóm tendo gel mofin kul yóm Dwata laen dù là gbeken du, monen,
“Ou se hol buten ne hol sónen, yóm tek sotu Dwata.
Laen dù dumu Dwata, són ou.
7Wen kô gembek mò du yó kem deng tehe nmou bélê ye?
Wen kô gembek eles tmulón du kuy yóm angat sut lemwót bè kbuten efet kól bè hol sónen?
8Hol bê ye abay hlikò, kem dou tau.
Lemwót bè hol gnan kdaw efet yóm kmoen ni, eles gel tulónu kuy yóm angat sut.
Deng hónô tngón ye se yóm monu ni ne yu se fen gemtanud du.
Wen kô dumu dwata?
Wen kô dumu dwata mfasang, yóm là deng tngónu du?”
Kekbê Dwata yóm hemtahu bè dwata kéng
9Yó kem tau gel mò dwata lennged laen kô mu le. Ne yó kem lennged nmò le laen kô dù muhen, balù yóm tey sidek kebtesen bè yó kem tau mò kul. Lómón ke butô le yó kem tau hemtahu du yó kem dwata lennged yó, laen kô dù tngón le. Angat sidek kyak le. 10Laen kô dù muhen yó kem dwata tenwél gel nmò le mò gónó le e tmaba. 11Ket tau hemtahu du yóm dwata kéng yó, angat tey sidek kyaken. Yó kem gel mò kul, hono kem tau tonok. Nit ye lu bè gónô skukum dé, nénég ye ke là sidek klikò le ne sidek kyak le.
12Yó nmò yóm tau msól wen bala tók nwahen, ominen lemubón du lem ofi ne nsólen ne tey kekgis yóm sigelen msól du. Bè yóm ksólen du gnómen kbitilen, lelen meeng ne miteg. 13Wen se tau hulung mò du bè koyu. Nahen yóm koyu ne bentesen, ominen mò ilóen mò loloen ne nsafen. Lómón tô tau kmoen du ne tey kehtiloben du, ominen hemsù du bè gónóen. 14Déke wen koyu sidar nwahen duhen ke ok, duhen ke siprus, hono kem koyu mtétél lemwót lem dlag. Sotuhen, déke wen koyu lorél huluhen, nangaten kkulónen anì mowil. 15Wen nwa yóm tau bè yóm koyu néléken mò snuken. Bong yóm sfuhen mò dwatahen. Wen se nahen du mò snuken ofi mò gónóhen mnalang ne mò gónóhen tmógó kenen. Lemwót sfuhen nmoen dwatahen mò gónóhen gel e tmaba. 16Wen se nwahen du mò gónón tmétê utónen. Bè kkenen du tey kegsengel nawahen. Igoen mnalang, yó monen, “Tey hyu ni, là tnaw te. Tey tilob bala ofi nii.” 17Bede yó muhen du yóm sfu yóm koyuhen, nmoen dwata mò gónón gel tmaba. Tuden bukolen bè soluhen ominen tmaba ebéléen, monen, “Uu se yóm dou dwata, hol lenwaem ou.”
18Yó kem tau mò du yóm yó, laen kô tngón le. Hol lómón ke snefeng le mata le, là móyô le hemdem du yóm ktahuhen. 19Yóm tau mò du yóm dwata lennged yó, là kô dog getnefen du yóm nmoen. Là kô gbeken mon du, “Wen se bè yóm koyu ni mò snuku gónóhu tmógó ken ne gónóhu tmétê utón anì gemkene. Bong yóm sfuhen nmou dwatahu. Ngem ni, mtude bukol bè yóm sfu koyu snuku.” 20Yóm nmoen yóm tau yó, lómón ke mken kohù laen dù gónón mowil du. Ungel nmoen yóm yó, olon tmondo knóen. Laen dù lanem tmóbóng du yóm tau yó. Là kô dilóen du yóm koyu lennged nogoten, sundu tahu dwata du.
Dwata dmimun yóm kdéen ne du se lemwà tekuy
21Yó mon Dwata, “Yu kem tau Israél, hol bê ye abay klifót nim monu ni, yu se yó kem dou tau tóbóng lówó.
Deng nmou yu mò tóbóng lówóhu, là kô naw e klifót kuy.
22Yóm kkóhu du bélê ye yó kem salà ye hol lómón ke muku lobun kmou du.
Bud ye semfulék ebéléu dé, ou se yóm lemwà kuy.
23Hol ye hligal mensag dé, yu kem longit seglafin.
Ne yó kem tonok seglafin etlaan, mensag ye.
Dalang se kuy kem bulul ne kdê yó kem koyu dlag, hol ye hligal mensag.
Deng hegfan Dwata yóm kegetahen bè kehewaen yó kem kun tau Israél.
24Ou se yóm Dwata gónó ye mogot yóm lemwà kuy.
Ou se yóm Dwata deng mò kuy.
Ou yóm hol gónó ye mogot, yóm dmimun yóm kentihen.
Tek són ou tehe hnal yó kem longit seglafin.
Ne bè yóm tehe kedlimunu tonok, laen kô tmóbóng do.
25Yó kem tau gel temngel ulét hólól, gel hegfanu yóm kul ungel.
Yó kem tau gel hen-gawang le kógów blotik, gel hensengu yóm dê gel tulón le.
Yó kem tau alì geta hennagì le, gotu gel hegfanu yóm klaen dù gónón e kól yóm kul ketngón.
26Okóm yóm dou tóbóng lówó, ke wen eles gel tulónen angat hdohou se yó.
Ke wen tau hógówu mò tmulón yóm angat atulu, hol lemwót béléu se yóm tulónen yó ne angat hdohou.
Ni udélu ebè yóm benwu Jirusalim, angat le bud mulék menwu bè yó, yó kem tauhen.
Ne yó bud udélu ebè yó kem syudad bè benwu Juda, angat wen bud hmomi hemdà kul.
Balù yóm deng tey kegbà le, botong bud baling lomi.
27Ngem yó dém mohin bong, olo lemwót bè udélu gónón kti.
28Ne ni, wen udélu ebè yóm sotu tau boluyen Sirus,#44:28 Yóm Sirus monen ni, du se yóm tau hol geta bè yóm sotu benwu boluyen Pérsya, yóm benwu boluyen Iran yóm kmoen ni. monu mò du,
‘Angat wen tey hogotu kóm ne angat gotu nmoem yóm dou kóyô.
Angat uu bud hefdà du yóm Jirusalim ne bud uu mbut hefdà du yóm Gónóu bè yó.’ ”
Atualmente Selecionado:
Isaya 44: tbl
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2007, Wycliffe Bible Translators, Inc. All rights reserved.
