Isaías 48
48
Dawan yaklauwi yul wisam isningpakwi
1“Jacob sulani, adika yulni dakah,
Israel ayangni dutaman kidika,
dawak bik Judá sulani man kidika;
Dawan ayangni kau yakta pramis yamtaman kidika;
Israel Papangni yakat yultaman kidika,
barangni dawak alas lani dis bik awasman kidika;
2tawan nuhni maisihni dis kidika kaupakyang timan kidika,
dawak Israel Papangni yakat iriktaman kidika,
witing ayangni palni kidika laih Dawan parasni nuhni duwi:
3Tatuna kaupak di balna bayayakna kidika ismangpaknayang dai;
yang lawik namangkanayang dai.
Sirihni palni yamnayang, dawak dini balna kidika rahm kakalna.
4Yang uman amanglatayang dai man kidika dutni man bahang,
dawak bik dadasni man sihm ayan kapat,
kaput bik laih yudutni awasman sihm bras kapat,
5man yakat ismangpaknayang dai ma mahni bayakwi,
baisa kalahwas kau ismangpaknayang dai.
Kaput laih sip awasman dai yulnam:
‘Yang dakiwan dauh kidika yaklauwi yamna,
di wayani as yamnayang dai kidika yaklauwi kaput yamna atnam.’
6Man adika dini balna bitik dakanaman,
bahang yamni talah kidika yakat,
bahang man yulnam ki, kidika laih rahmki.
Waralaih di wisam ismangpakki,
di as talasman dini dai kidika,
7waradika yamna dini kidika, ma balna bayakna dai yakat yamna awaski,
kidika laih yuyulwak dakasman dai warmani kat.
Kaput laih man sip yultas awama: ‘Uman amanglatayang dai.’
8Man kidika yulni yuyulwak baisa dakasman dai,
dawak bik talasman dai,
kat man niningh tapama kidika pukni dutaman bahang.
Yang amanglatayang dai man laih barangni-awas man dai,
kulnam dutni ki matwi batanh danaman kaupak.
9“Kaunah kulnik laihwatna yang, yang muihki yulni,
yang ayangki nuhni yulni madaukalpamtas danayang.#Ez 20:22; 36:22-23.
10Yang maisihni dis mayamnayang,
kaunah lalah yakat maisihni dis yamwa kaput laih awaski,
kaunah malaihtik talnayang dalani wauhni tanka yakat.
11Yang ayangki nuhni yulni, yang ayangki nuhni yulni yamnayang,
kat yang ayangki laih sip daukalna atnin sip-awaski.
Yang datas awaki, alaskina kidika ūk yakat kalana atnin.#Is 42:8.
Dawan, witing tawanni kidika laihwi yakwarang ki
12“Yadakah, Israel, Jacob tawanni,
wais yakat yulnayang kidika:
Yang manah Papang yang ūk diski,
yang kuduh tatuna dawak witni bik.#Is 41:4; 44:6; Rib 1:17; 22:13.
13Yang tingki kau sau kidika yamnayang,
kaput laih makau kisang bik tingki kau yamnayang;
yang ayangnina kau yulting kat kakalna.
14Manna bitik kaluduhta dakanauh:
¿Manna pasyakat wais yulna daih adika dini kalwarang kidika:
yang lawik muih al as yaktik dunayang kidika,
yaklauwi yamwarang Babilonia yakat ais kalyamnin kulnayang kidika,
Caldeo ninisan#48.14 Ninisan: grik kau laih kaput yulwi. Hibru kau laih yulwi witing tingni. yakat?
15Yang kuduh yulnayang kidika, dawak yang lawik kalyulnayang kaina atnin,
bahang kalyamting kaina,
angkat kiwarang kidika bitik yakat yamni manah karang.
16Yang yaihkit akat aiwa adika yulni dakanauh:
Tatuna kaupak, yang yul malnikau yulbautasyang;
adika dini balna bitik kalahwa mani balna yakat yang sakyang dai kidika pāni yakat.
Waradika laih yang Dawan yang adika lawik paraski kalanayang,
dawak sihting kiuna.”
17Dawan aput yulwi, malaihwi yakyang,
Israel Papangni maisihni dis kidika:
“Yang kuduh man Papangma Dawan;
man yamni atnam kidika yulni namangkatayang,
yawanam tāni kidika munah madutik yawayang.
18¡Yamni karang dai yang yulki kidika dakanaman kat!
Man yamni atnam kidika bahngwi kilwitdai sihm was pauwak bangilwa kapat,
dima balna barakwa kidika laih sihm kuma lalamwa kapat kitdai,#Dt 29:5; Sal 23:3; 27:11.
19man sulama balna kidika mahni-kitdai,#Gn 22:17.
kuldi yakdas sihm kuma kauhnimak balna kapat;
yang imuktas awitikdai,
kaput bik yang mikpa kaupak latas awitikdai.”
20Babilon kaupak alahwanauh,#Jr 50:8; 51:6,45; Rib 18:4. Caldeo balna kaupak iranauh.
Adika yulni parasni yulta sarahtanauh,
alasna karuk, dawak sau sutni kat diatanang dakakawang.
Yultanauh: “¡Dawan yaklauwi, witing diniyamyang Jacob yakat laihwi yakna!”
21Kauhmak wanilang munah diawak bayayakna karang bik,
was dikih diawas dai;
witing yaklauwi kipala kidika sahna dai,
dawak was parasni murwi kalahna dai.#Ex 17:1-7.
22Muih dudutni balna niningna yakat laih, di yamni diski.#Is 57:21.
Dawan yaklauwi yulna.
Atualmente Selecionado:
Isaías 48: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
