Isaías 47
47
Babilon bukna
1“Lakwah, Babilonia sirauni,#Is 13:1—14:23; Jr 50:1—51:64. baisa al disman kidika,
sau yahamni minit yakat yalahta;
trunma kaupak lakwa Caldea sirauni,
dawak yalahda sau yakat,
kat baisa mayuyulwas karangki
batahnbin man dawak bik yudutniman.
2Kiwatak tiknin dini kidika duta
plawar kidika tikta,
dawak muhma kau asna baini kidika yakpamta, dawak prakma kidika bik murilta,
dawak barahmamak kidika lāih kalahwang,
kaput bik kalpas kau was balna kidika daklawah;
3muihma kidika asna as bik diskawang,
agha, asalma kidika bik lāih kalahwang.
Biritik mayamki,
dawak bukta limbabahta yulma kidika bik laih sip laihwatwas karangki.”
4Mailaihyakyang kidika laih,
Israel Papangni maisihni dis kidika ki,
witing ayangni kidika laih Dawan parasni nuhni duwi, bahang yulwi:
5“Ap data yalahda
Caldea sirauni,
puksani yakat awah,
kat watwi mayuyulwas karangki
‘muih balna minitna yakat king yalni’.
6Yang tawanki karak kulnik daukalnayang mani dai yakat,
yang muihki balna kidika risninapik dis yamnayang dai,
dawak parasnina kidika kaupak dating bukna dai.
Man witingna yakat miniknakun talasman dai,
dawak muih bararak balna minitna yakat di tikini kidika ilnaman dai.
7Yulnaman: ‘King yalni yang kidika ban awaki’;
adika dini laih man kulta talasman dai,
dawak bik kultasman dai adika dini amput dahnkalwarang kidika.
8Kidika bahang, waralaih adika dakah,
yal as di yaksasihn kidika manah waltaman kidika,
dawak trunma yakat ismanglak alahtaman kidika,
dawak kulnam dinit yakat manah kultaman kidika:
‘Yang manah yang, ūk diski; yang tingmak kaltas awakiki,
dawak bik walakibis balna bik dis-awas awakiki.’
9Sirihni palni, sihm mani yakat
di dudutni bupak man yakat kaina karang;#Rib 18:7-8.
tingmak kalma dawak walambis balna bik dis awama, sukyah lani kapat manas dutaman
dawak yultang di kalwa balna tanka manas amanglataman karang bik.
10Man dutni yamtaman yakat parasma rahm yamni dutaman kaldakanaman,
dawak kulnaman: ‘Muih as bik yatalswaski.’
Man kulnam tuhni lani kidika yaklauwi alas mayulna.
Man kulnam yakat kulnaman:
‘Yang manah ki, ūk diski.’
11Kaunah di dutni kidika man mamat yakat kaiwarang ki,
dawak di yultang kalwa balna kidika kau sip laihwattas awama,
man mamat yakat di dutni as kaiwarang ki
kaunah kidika kaupak lawas awama ki;
di dis kalwarang kidika tahatasman
kaunah sirihni man yakat kaiwarang ki.
12Sukmayah lani kidika ban yamta,
wahma man kaupak manas palni lan alahwanaman kidika,
taldarang ilp duma pa kidika kaupak,
taldarang kidika kau yamtang muih balna kidika yamamaduduwarang pa.
13Yul masumamalwa muihni balna kidika manas dunaman,
kaput bik laih masuhna.
¡Makau yala balna tanka walyang balna kidika aiwang,
yala yakat talwi dawi di yuyulwa balna kidika,
waiku balna kaiwarang yakat di kalwarang balna kidika baisa kau yakwi mayuyulwa kidika,
dawak witingna yaklauwi malaihwi yayakwang!
14Kaunah talah, kidika balna laih sihm dibasta kusuni kapat ki:
kuh yaklauwi buswi,
kuh dahlwa kidika kaupak sip yaklalawas ki.
Kat kuh tuturni kapat-awas
bahang yalahwi kalpuihna atnin.
15Kidika yakat sukmayah balna#47.15 Sukmayah balna: kaput ulna kidika yamni kapat ki. Hibru kau laih yulwi man dima wauhwi bakanyang balna. kidika uiwi yaklalauna,
sangmaka bitik yakat witingna karak pramis yamnaman dai kidika.
Witingna bitik laih tanina dauh kidika yakat laihwi uina,
bahang muih as diski malaihwi yakna atnin.
Atualmente Selecionado:
Isaías 47: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
