Isaías 44
44
Witing manah Dawan, dawak bik barangni kidika
1“Jacob tawanni Israel, waralaih, yang akat yadakah,
diki yamyang mayaktik dunayang kidika.
2Yang kuduh Dawan, yang mayamnayang,
baisa batanh datasman kau mayamnayang dawak ilp matayang.
Jesurún, yamaduwinih,#Dt 32:15; 33:5,26. Jacob tawanni,
diki yamyang yaktik dunayang kidika,
3kat yang kalatingkat kauhmak wanilang yakat was murwarang,
sau buhni yakat was tuhni kalnakarang.
Yang lawik sangnika wisam kalaki sulama balna yakat,
kaput bik laih blisin bik sihting kiwarang.
4Kaput laih dibasta balna kidika was utuhdak bararakwa kapat bararakna karang,
was kungkau pan balna bararakwa kapat.#Is 43:19-21; Jr 31:12; Ez 47:1-12; Jn 4:10-14; 7:37-39; Rib 22:1-2.
5Muih as yulwarang: ‘Yang laih Dawan diniyang’,
ūk laih ayangni pakwarang witing laih Jacob sulani,
dawakat ūk laih tingni yakat ulwarang:
‘Yang laih Dawan diniyang’,
dawak Israel ayangni kidika laih witing ayangni dunakarang.”
6Dawan laih king as Israel laihwi yakyang,
Dawan parasni nuhni duwa kidika aput yulwi:
“Yang kuduh tatuna dawak witni kau kidika bik;#Is 41:4; 48:12; Rib 1:17; 22:13.
yang kaupak dawan dauh ūk diski yang kapat.
7¿Wais kidika yang apatyah?
Yulwang, lāih yakwi yulwang.
¿Wais yaklauwi yulnayah tatuna kaupak, di balna kalahwarang kidika,
dawak kalahnin manah kidika bik yakwi yulwi?#44.7 ¿Wais kidika yang apatyah? ¿...yakwi yulwi?: kaput ulna kidika yamni kapat ki. Hibru kau laih amangladas ki.
8Kaunah, ¡kulnamna dulautanauh, yamaduduwinih!
Yang kaput yulnayang tanit mani balna kaupak,
manna dakanamana.
¿Papang ūk sakkatpah yang kaupak?
Yakmaldinin pāni ūk diski; as bik talasyang.”
Dawan dauh niningkauh
9Dawan dauh#Sal 115:4-8; 135:15-18; Is 40:18-20; 41:6-7; 42:17; 45:16; Jr 10:1-16. yamyang balna kidika laih dauh minitna diski, dawak dawa dauh wayani balna yakat dalani tatalwa kidika ilp as bik diski. Kidika yakat minitna yuyulwa balna kidika laih miniknapa diski dawak sins diski, kidika bahang sarahni niningna kakarana karang. 10Angdika muihni kat di wayani as yamwi kidika yakat minit yulwa kidika laih dauh ma balna kidika dawak bayakwi. 11Kidika yakat minitna yuyulwa balna bitik kidika sarahni niningna kakarana karang. Dawan dauh wayani yamyang balna kidika laih muih dauh balna. Kidika balna bitik kalpakwi la muhni yakat uiwarang kat sau yakat bubukna karang dawak muihsak dadauna karang.
12Taldang ayan kau di yamyang kidika ais yamwarangpa: ayang dakwa dini kidika duwi, dawakat ayan kidika kuh pasyakat āwak daihni kalwak tiswi yamwi amar kau. Witing parasni kau yamwi. Kaunah witing di kaswas karangkat, parasni dis dawarangki, kaput bik laih was diwas dawarangkat kalsuhwarang ki.
13Pan kau muih wayani yamyang yakat taldang: nuhni ampus karang kidika kulwi talwi, wayani yamwi pincil kau, usnit kat mahka tiswi yamwa dini kidika kau duwi yamwi muih wayani as, yamwi yakwa usnit kat makat yulnin uni yakat dukiwi āsakwi.
14Muih as suhun dahwarang, dawak waslauwak barakwi; bahang kaput laih witing suhun daknin panani duwarang. Kidika-awas karang bik pan ūk balna asangpas yakat bangkidika maintalwak nunuhwi. 15Dawak kaput laih muih balna kidika kuh bibiwi; buas duwi uiwi biwi kalpuihnin, ūk balna laih di lahnin duwi uiwi, dawak ūk balna kidika laih duwi uiwi dawan dauh wayani yamna atnin, kaput laih kidika yakat minitna yuyulwi abukwi.
16Kidika awaskat, panan balna kidika papuswayah kuh payakat āwi bubuswi, bahang dahlwakat dimuihni buswi kaswi isningnalak dawi. Kidika kau kalpuihwi yuyulwi: “¡Kuh yaihnit yakat sak atnin laih yamniyah; mahka yapuihāwi!” 17Panani sutni balna kidika kau dawan dauh wayani yayamwi, dawak kidika yakat abukwi minitna yuyulwi aput yuyulwi: “¡Yalaihta yakta kat man laih papangki man bahang!”
18Kidika muihni balna laih di amanglalawas ki; miniknapa tatalwas ki di as bik tatalwas ki, dawak di amanglanin bik witingna sip amanglalawas ki. 19Yul kulwi tatalwas ki, baisa ki di kidika amanglawi yulnin: “Pan balna dai kidika papuswayah kuh pasyakat āting dahllana, dawak kuh tuturni yakat plawar busnayang, dimuihni bik bustik kasnayang; sutni watna balna dai kidika laih di dutni adika yamnayang, ¡dawak mikityulta sakyang adika laih pas dakni as kat mikityultayang!” 20Di rahm kidika laih wan kasda kapatki. Kulnin lani dauh yakat dādak alas maiyulnin. Kidika muihni balna laih sip laihwi yaknin kidika duduwas karang. Witingna sip-awas ki tingnina yakat duduwa kidika laih alas manah kidika.
Dawan yaklauwi Israel dutni dawak diswak laihwi yakwi
21“Israel, Jacob tawanni,
ismangkatta man laih yang diki yamyang man;
diki yamyang man, kat yang lawik mayamnayang.
Israel, datang kat yang adika damatkahnin-awaski.
22Yang lawik dutni balna yamnaman dai kidika dating disna,
sihm mukus wītkauna diswa kapat.
Yang akat nawatta aiwah, kat yang lawik malaihtik yaknayang bahang.”
23¡Makau kisang sarahta, alasna dutah, Dawan di yamna kidika yulni!
¡Pa kudungni tuhni balna parasni yultanauh!
¡Asang dawak pan balna kidika bitik
alasna duta parasni sarahtanauh,
kat Dawan alasnina nuhni kidika lāih yakna
bahang Israel laihwi yakwi, Jacob tawanni kidika!
24Adika Dawan yulwi, malaihwi yakyang,
baisa batahntasman kau mayamna dai kidika:
“Yang laih Dawan yang, di bitik yamyang yang,
yang lawik makau kisang dawak sau kidika yamnayang
muih as bik tingkisut laihwas kat.
25Prapit dauh balna yulnina kidika
dating kat yulna kaput kalahwas ki;
sukyah balna bik diyamtingkat dauh manah kakalwi.
Sins duyang balna yakat bik diyamtingkat biri biri niningnakauh yuyulwi,
dawak di amanglalawa balna kidika dauh manah kalwi.#1 Kor 1:20.
26Kaunah yang diki yamyang yulni kidika laih kalatingkat yulwa yakat kalahwi,
kaput bik sihnayang balna warknina kidika yamni manah kalahwi.
Yang yultayang Jerusalén kidika watwi muih uiwi panina duduwarang ki,
dawakat Judá tawanni nunuhni balna bik watwi laihwi dulauwi yayamwarangki.
Yang yamtingkat, daukalna balna kidika watwi dulauwarang.
27Yang sipyang paknik kuma nuhni sakkidika buhlakna atnin,
dawak was nunuhni balna murwa kidika bik wasni dis dana atnin.
28Yang Ciro yakat kalyultayang: ‘Man laih yang sīpki maintalyang man,
amput dukihyawa balna kidika bitik yamma’;
# 2 Cr 36:23; Esd 1:2. dawak Jerusalén yakat kalyultayang: ‘Man kidika watwi malaihwi dulauwi yamna karang’;
dawak makatyulnin ūni kidika watwi rahni balna āna karang.”
Atualmente Selecionado:
Isaías 44: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
