Isaías 43
43
Dawan witing manahki laihwi yakyang kidika
1Kaunah waralaih Israel, Jacob tawanni kidika,
Dawan yaklauwi mayamna kidika mayulwi:
“Yamaduwinih, yang lawik malaihtik yaknayang;
man ayangma kau yaktik mayulnayang, man laih yang diki man.
2Waspa munah bayaknam karang kat, yang sak-awaki mankarak,
was daklawanam karang kat, was dautas awama;
kuh pas munah bayaknam karang kat, mabuswas karang;
dahlwi kilwa balna kidika man yakat madahlwas karang.
3Yang laih man Damawan yang, dawak malaihwi yakyang,
Israel Papangni holi kidika.
Yang malaihtik madunayang;
malaihtik yaknin yulni minit launayang
Egipto yakat, Etiopía yakat, dawak Sabá yakat bik,
4kat yamni matalayang bahang,
man laih mamat nuhni ki kidika bahang dalani matalayang.
Madutik, dawakat sangmaka laihtik yaknik muih balna pasyakat.
5Yamaduwinih, mankarakyang.
Makilwa kaupak makawa kat
wanaihma balna kidika diating kat aiwi kalududuhwarang.
6Tingpal nining yakat kalyulki: ‘Nawatta sihtang aiwang’,
wadah nining yakat bik yulki: ‘Witingna kidika man laihwatwi duwinih.
Pa naikaupak duaitah walakibis ahal dawak yayal balna kidika bik,
sau sutni nakaskaupak,
7yang ayangki duduwa balna bitik kidika,
yang lawik yamnayang balna kidika,
yang yamnayang ayangki nuhni yamnin yulni.’
8“Kalatanangkat yang tawanki kidika kaiwang,
witing minikpa duwi kaunah di talwaski,
tapanisuma bik yamni duwi kaunah di dakawas ki.
9Muih balna bitik kaluduhtanauh.
¿Kidika balna pasyakat wais yaklauwi yulna dai adika dini kalahwarang dai kidika,
kidika awaskat di balna kalahwi bayakna kidika kaiwi kalahwas kau yulna daih?
Tatalna muihni balna kidika duwi aiwang kaput laih rahm karang,
dakana atnin dawak bik yuyulwang di rahm kaput kalahna dai kidika.”
10Dawan yaklauwi kaput karangti:
“Manna laih talnama di balna yamtingkat,
kaput bik diki yamyangmana, yang lawik manawaltik manayaknayang
amangkilanamna dawak yang akat yakulnamna,
dawak amanglanamna yang waisyang kidika.
Yang takitkauh dawan ūk disdai,
kaput bik yang uskitkauh ūk diskarang ki.
11Yang manahki Dawan yang kidika;
yangkaupak ūk diski laihwi yakyang.”#Dt 4:35.
12Dawan aput karangti:
“Yang lawik yultik isningpaknayang karang: yang lawik diyulnayang;
taldas daniwan as yaklauwi yamwas ki,
manna kuduh talyangmana.
13Papang yang kidika ban kaput yang.
Yang paraski kaupak sip muih as bik yaklawas ki.
Yang yamtayang kidika sip muih as bik dauh yamwas ki.”
14Dawan, Israel Papangni holi kidika,
dawak witing yaklauwi laihwi yakna kidika yulwi:
“Manna manalaihtik yaknik yulni Babilonia yakat muih sihki,
dawak witingna dūr balna bitik apapahna karang,
Caldeo muihni balna alasnina kidika dalani wauhnin yakat wiryaklana karang.#43.14 Dawak witingna dūr...wiryaklana karang: kaput ulna kidika yamni kapat ki. Hibru kau laih amangladas ki.
15Yang kuduh Dawan, Israel yamnayang kidika,
Papang holi kidika, dawak manna kingmana.”
16Dawan yaklauwi kuma pasmunah ta as yamna dai,
ta as yakna dai was parasni murwa#Ex 14:13-31. munah;
17yamwakat kalbauyang balna mahni parasnina nuhni kalahna dai,
kalbaunin kārni kau, aras kau kilwi uina dai daukalmukna atnin yulni.
Bauwi lakmukna dai dawak witingna sip yaklalauwas dadana;
dawak sihm awas piwa kapat dadana.
18Waralaih Dawan witing tawanni yakat yulwi:
“Damai di balna kalahna kidika kulnam yakat duwinih,
baisa kulwinih di bayakwi kiuna balna kidika.
19Yang di wisam as yamki,
talma warminitni kalahwarang ki.
Kauhmak wanilang yakat ta as yamkiki
kaput bik sau di dahdak kalahwas yakat kalating was murwarang ki.
20Asangpas kau didauh balna kidika ayangki nuhni yayamwarang,
sul wail balna dawak uhu nunuhni balna bik,
kat kauhmak wanilang kaupak kalatingkat was burhwi kalahwa bahang,
kaput bik sau di dahdak kalahwas pāni yakat bik,
yang tawanki yaktik dunayang yakat was bayahna atnin yulni,#Ex 17:1-7; Is 35:6-8; 41:18; 44:3-4.
21tawan yamnayang kidika laih
yang ayangki nuhni yamnin yulni.#Jr 16:14-15; 23:7-8.
22“Kaunah man Israel, Jacob tawanni,
ayangki yakta yultas danaman, yang adika masuhna kaldakaman.
23Sīp kau yang akat sakripais karauni kauna yamtasman dai, kaput bik sakripais busta ayangki nuhni yamtasman dai. Minitdis dini kidika man yakat wat wat mayultik maustasyang dai, kaput bik walapni busnin kidika bik mayultasyang dai.
24Tisnak walalapni kidika bakannamna awas dai,
yang akat minitdis dini yanamna.
Kaput bik didauh balna salanina kau sakripais busta yanam-awas dai.
Nawatnikauh laih,
dutni yamnaman balna kidika yasuhna dai,
dawak bik kulnik daukalna dai.
25“Kaunah yang adika man Papangma yang bahang dutma ustik yaktayang,
dawakat baisa bik isingkatwas karang dutma kidika.
26Yang nikingkauh di as dutaman kat, la mahawang.
Rahmma dunam yulni balna kidika duaitah, rahm di as bik dutni dis awama pa.
27Man papangma dutni yamna,
masumamalwa muihni balna kidika nikingkauh yaklalauna,
28kabamint muihni balna yaklauwi, yang ūki kidika yakat dutni yayamna;#43.28 Kabamint...dutni yayamna: tanitmani kau ulna kidika kaput ulna. Hibru kau laih yulwi yang lawik dutni diyamnayang, makatyulnin uni tunan muihni balna yakat.
kidika bahang Jacob tawanni Israel kidika danayang
daukalpamna atnin dawak bik dutni kalyulna atnin yulni.
Atualmente Selecionado:
Isaías 43: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
