Galatia 6
6
Mensén-sémbongano mangé
1Poo-poow, sa si esa tou an uner iow kinakailekan méma' ing kaséaan, kamu sé menonou pakaakinen i Roh Le'nas, musti akinen iow si tou itu an lalan wutul ang karapi ing ko'kos en até. Wo téirano en owak iow in esa wosama' ra'ica katawéran im pangepé'an kaputé i tou méma' ing kaséaan itu. 2Sa awéan an uner iow meta'up ing kawenduan, mensén-sémbongano mangé kamu tumanggong im pamuléngen itu! Wo in taniitu kamu icumiito in ukum i Kristus andumoro' i meupu-upusan. 3Ampa'paan sa awéan tou mawerot en owakna in esa penting, taan en ulitna sia itu tou ra'ica penting, eng kaangéanna sia itumowoo an owakna in esa. 4Aweso taré si esa wo si esa tou numilai im paémaanna loor kuma'pa ra'ica. Sa em paémaanna loor, sia ro'na tumirayo asé sapa sé niéma'na itu. Wo sé pinengaéma'na ra'io sangali ipeputéna wo im pinengaéma' é tou walina. 5Ampa'paan si esa wo si esa tou tumanggong oka im pinengaéma'na.
6Si tou tumerima in sususuien andumoro' in Taar i Amang Kasuruan, pakasa sé loor musti iwéténg a si tou si iméé in sususuien itu en tumawang ing kaperluan éra.
7Tioo suméa' mawerot! Kailekanta sapaoka sapa si ayusew i esa tou siitu en upu'enna oka. Si Amang Kasuruan ka'i taniitu. Sia ra'ica toro pawera-weraan, ampa'paan suliin-Na oka sé tou kumiit im pinengaéma' éra in esa. 8Si séi si menonou asalo mengaéma' ing kasalé'an in owakna sé ra'ica loor, em buéna papaté asi kasalé'an in owakna si ra'ica loor. Taan si séi si menonou asalo makiit ing kasalé'an i Roh Le'nas, em bué ing katouanna akar ing kauré-uré. 9Anaé, tioo kita mengasuut mengéma-ngéma' sé loor. Sa imayo en témpona, kéréanta oka em buéna sa kita ra'ica mengasuut mengaéma' sé loor. 10Ampa'paan in itu, ang karoro'anta winéané' témpo, mayoo émaanta sé loor a sé pakasa in tou, kataré-taré a sé poo-poowta an esa paémanen.
En tata'néi wo en siri'
11Séréno sumama-sama' en uru-urup sela anio'. Yakuo si matic im bagéan anio' maké ing kamaku in esa. 12Sé tou Yahudi sé masalé' mengapaturu-turu' in owak andumoro' sé kaséréan, séra rumaméji lumesé' icamu in sunaten kumiit in ukum Torat. Émaan éra in tanu siitu wosama' ra'ica okoien. Ampa'paan séra okoien oka é kakélé tou Yahudi sa séra asalo masusui andumoro' im papaté i Kristus ang kayu salip taan ra'ica masusui andumoro' in atoran sunat. 13Séra sé makiit in atoran sunat, ra'ica ka'i paémaan éra waya sé an ukum Torat. Taan icasalé' éra kamu sunaten wosama' séra ro'na tumirayo in owak ampa'paan kamu makiit in atoran sunat. 14Taan aku wutu-wutul ra'ica masalé' rumayo in sapa-sapake', si casalé'ku irayo asalo papaté i Apo'ta Yesus Kristus ang kayu salip. Ampa'paan tutuw i Yesus imaté ang kayu salip, pakasa sé kasalé'an in owakku sé léwo' imatéo ang kayu salip-Na, wo aku tanu imatéo asé kasalé'anku in léwo'. 15Ampa'paan sinunat kuma'pa ra'ica sinunat, en itu ra'ica penting. Em penting ang katouanta, wineru i Amang Kasuruan. 16Wo si séike' sé menonou mengakiit sapa sé ipakuaku itu, isombayangku sa woo ro'na si Amang Kasuruan méé mai ing kaeluran wo tumuru' ing kaupusan-Na ai séra. Sé tou menonou tanu siitu sérao sé wutu-wutul tou i Amang Kasuruan#6:16 “Tou i Amang Kasuruan”: Téks aseli icumua “Israel anu i Amang Kasuruan”, eng kaangéan in itu, tou sé sinisir i Amang Kasuruan. mandé ka'i séra tou Yahudi kuma'pa tou ra'ica Yahudi.
17Tumo'tol intarépé' ra'io toro ka'i awéan esa tou en sumusa yaku, ampa'paan an owakku awéané' eng kala-kalat im péla' tanu tuus sapaoka aku anio' anu i Yesus.
18Poo-poow, pekiupusenku sa woo ro'na en upus aitambér i Apo'ta Yesus Kristus mewali-wali wo i roh miow! Ulit.
Atualmente Selecionado:
Galatia 6: TNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
En Taar Weru a nunuwu' é Tontemboan @ LAI 2018