Efesus 1
1
En siri'
1En surat anio' a yaku owo Paulus, si mamuali ruru'du'an i Kristus Yesus kumiit ing kasalé'an i Amang Kasuruan.
En surat anio' aipaticku ai camu tou le'nas an Efesus, sé le'tek maéman a si Kristus Yesus.
2Upus aitambér wo eng kaeluran asi Amang Kasuruan Amangta wo asi Apo' Yesus Kristus mewali-wali wo icamu.
Eng kama-kamang sé aiwéé i Amang Kasuruan
3Irayoo mangé si Amang Kasuruan, Amang i Apo'ta Yesus Kristus! Si Amang Kasuruan itumambéro mai ai cita pakasa ing kamang sé an sorga owo, ampa'paan kita meesao wo si Kristus. 4Ra'ipé' niéma' i Amang Kasuruan eng kayo'baan anio', sinisir-Nao kita wosama' meesa ang karapi i Kristus wo mamuali anu-Na si ra'ica wana kaséaan sapa-sapa an dior-Na. 5Si Amang Kasuruan mengaupus icita, ampa'paan in ituo tumo'tolke' mai indior aitantu-Nao kita mamuali toya-toyaang-Na ampa'paan i Yesus Kristus. Wo siituo en aitantu-Na kumiit ing kasalé'an-Na. 6Ampa'paan in ituo, irayoo mangé si Amang Kasuruan, ampa'paan tinambéran-Nao mai in upus wangko' ai cita sé meesa wo si Yesus Kristus, Toyaang si paupu-upus-Na keli. 7Ampa'paano in enda' i Yesus Kristus wo ampa'paan kita meesao ang karapi-Na, icita tinu'buso, eng kaangéanna kita niampungano ang kamesé-meséaanta. Wo siituo en upus wangko' si aitambér i Amang Kasuruan ai cita. 8Si Amang Kasuruan itumambéro mai in upus kumeli-keli ai cita ang karapi im pakasa ing kapinteran wo in kakailekan andumoro' im pawasan-Na. 9Intarépé' em pawasa-wasan itu aicua-Nao ai cita kumiit ing kasalé'an-Na, siituo si pawasan indior si pakaenepé' a sé tou. Wo em pawasa-wasan-Na itu pinusé'-Nao lekepen oka i Kristus. 10Em pawasa-wasan-Na itu tana'i: Sa imayo en témpona, si Kristus mamuali oka kapala si mengaesa im pakasa sé an sorga wo sé ang kayo'baan.
11Si Amang Kasuruan en tumu'tul im baya-waya kumiit ing kasalé'an wo im pinusé'-Na in esa. Wo ra'ipé' niéma'-Na eng kayo'baan kita sinisir-Nao, wosama' ro'na terimanta sapa sé aijanji-Nao iwéé ai cita ampa'paan kita imeesao ang karapi i Kristus. 12Anaé, icami sé tou Yahudi eng kataré-taré maarap a si Kristus, ro'na rumayo Sia ampa'paan wangko' eng kawasa-Na. 13Taniitu ka'i camu tou ra'ica Yahudi sé lumingao in sususuien wutul i Amang Kasuruan, siituo en Abar Kaaruien si mengawéé ing kalowiran ai camu. Wo an tutuw iow maémano a si Kristus, tinerimao miow e Roh Le'nas si aijanji-Na tanu tuus kamu imamualio tou-Na. 14E Roh Le'nas ituo e imamuali jaminanta sapaoka ulit terimanta oka waya sé aijanjio i Amang Kasuruan a sé tou-Na. An tutuw itu iwekar-Na oka kita asé pakasa ing kaléwo'an ing kayo'baan anio'. Anaé, mayoo irayota si Amang Kasuruan ampa'paan ing kawangko'-Na.
En sombayang
15Ampa'paano pakasa sé niéma'o i Amang Kasuruan ai camu, an tutuwku luminga in andumoro' im paémanen iow a si Apo' Yesus wo andumoro' in upus iow a sé im pakasa é tou le'nas, 16yaku ra'ica mento' mengua-ngua i makapulu'sama' a si Amang Kasuruan ampa'paan icamu. Wo susurku in sumombayang, kamu pena'né-na'néienku. 17Wo pekiupusenku a si Amang Kasuruan, Amang i Apo'ta Yesus Kristus, si Amang iparayo-rayo wo pasiri-siriin, wosama' iwéé-Na mai e roh kapinteran wo tumuru' in andumoro' Sia wosama' Sia wutu-wutul katuusan iow. 18Isombayangku ka'i wosama' wukaan-Na mai en até miow akar kakailekan iow em paarapen si aiwéé-Na an tutuw iow tinowa-Na, wo akar kakailekan iow taloso wangko' eng kasiyaan im bagéan sé aitu'tul-Nao a sé tou le'nas. 19Wo ipasombayangku ka'i wosama' kakailekan iow eng kawangko' ing kawasa-Na ai cita sé maéman ai Sia. Eng kawasa i Amang Kasuruan itu puté wo ing kawasa wangko', 20#Mzm. 110:1 si itumou sumawel si Kristus an uner é tou imaté wo méé im palukutan pasiri-siriin ang kakan-Na an sorga. 21A mangé mbitu si Kristus merénta ang karapi ing kawasa si rumangka'mai asé im pakasa ing kawasa é maperénta, sé makakawasa, wo eng kakawasaan, eng kakolanoan wo pakasa i ngaran sé ro'na icua asi témpo ya'sa wo ka'i asi témpo maai oka sa. 22#Mzm. 8:7; Kol. 1:18 Pakasa aiweta'o i Amang Kasuruan am palara ing kécéi i Kristus wo niéma'o i Amang Kasuruan Sia mamuali kapala am baya-waya akar Sia imamuali kapala é jamaat. 23Sé jamaat ayandé tanu in owak i Kristus. Siao e méma' sé jamaat makaleke-lekep, meputé Sia en lumekep im baya-waya sé awéan am bisa-wisa.
Atualmente Selecionado:
Efesus 1: TNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
En Taar Weru a nunuwu' é Tontemboan @ LAI 2018
