ISAÍAS 36
36
Senakeribpa Judá suyuta qhawapayasqan
(2 Rey 18.13-37; 2 Crón 32.1-19)
1Chunka kinsayoq wata kurakña Ezekías rey kashaqtinmi, Asiria suyu rey Senakeribqa Judá suyupi llapan allin perqasqa llaqtakunata phawaykuspa kaqnichakurqan. 2Lakismantapachan Senakeribqa Jerusalenpi kashaq rey Ezekiasman kachamurqan huk qollana oficialninta askha soldadokunatawan. Hinan Jerusalenpi huñukurqanku Hanaq P'uytu nisqamanta lloqsiq yarqha qayllapi, T'aqsaqkunaq Hallp'an nisqaman rina ñan patapi. 3Chaymanmi reypa mayordomon Hilkiaspa churin Eliakim, qelqaqnin Sebna, qelqa waqaychaq Asafpa churin Joapiwan tariparqanku. 4Hinan Asiria suyu oficialqa paykunata nirqan: —Rey Ezekiasman willamuychis:
Asiria suyu ancha hatun reymi nin: ¿Imamantaq qanqa hap'ipakushanki? 5Qanqa ninkin: Maqanakuypaq allin wakichisqan kashani, kanmi askha soldadoypas tupapakunaypaq, nispayki. Chayqa yanqa rimayllan, ¿pimantaq qanri hap'ipakushanki, ñoqa contra sayarispayki? 6Egipto suyumanmi hap'ipakushanki, riki. Qhawariy, chay hap'ipakusqayki suyuqa ch'eqtasqa soqos hinan, pipas chayman tawnaykukuqtaqa makintan t'urpuspa patamanraq lloqsin. Chay hinan Egipto rey Faraonqa llapan payman hap'ipakuqkunapaq.
7Icha niwankichispaschá: Ñoqaykuqa Apu Señor Diosniykumanmi hap'ipakuyku, nispaykichis. Qhawariychis, ¿manachu Ezekiasqa Diosniykichis yupaychana cheqaskunatapas altarkunatapas thunipurqan? ¿Manachu Judá runakunata Jerusalén runakunatapas kamachirqan: Jerusalén llaqta altarllapin yupaychankichis, nispa? nispan.
8Chay hinaqa Asiria suyu rey wiraqochaymi Ezekiasta nin: Iskay waranqa caballokunata qoykiman chaypas, ¿akis mana iskay waranqa sillakuqkunata churawaqchu? 9Chayri, ¿imaynataq qanqa atipawaq huk oficialniyta mana kasuyllaña kashaqtinpas? ¡Qanqa Egiptomanta carretakunata caballería soldadokunallatan qhawarayashanki! 10Señor Dios kachamuwaqtinmi kay suyu thuniqqa hamuni, mana chayqa manachá hamuymanchu. Paymi kamachiwarqan phawaykamunaypaqpas thuninaypaqpas, nispan, nispa.
11Hinan Eliakimqa, Sebnapiwan Joapiwan Asiria suyu oficialta nirqanku: —Valekuykikun Arameo rimaypi niwanaykikupaq, yachaykun chay rimaytaqa. Ama Hebreo rimaypichu niwayku, perqa patapi kashaq runakunan uyarimushanku, nispa.
12Chaymi Asiria suyu oficialqa nirqan: —Wiraqochayqa manan kachamuwarqan reyniykichisman qankunamanwan willanallaypaqchu, aswanpas llaqta muyuriq perqa patapi runakunamanwanmi. Qankunapas paykunapas llapaykichismi hatun hisp'ayniykichista mikhunaykichispaq, unu hisp'ayniykichista ukyanaykichispaqwan nisqaña kashankichis, nispa.
13Hinaspan sayaykuspa oficialqa kunkayoqta Hebreo rimaypi qaparirqan: —Uyariychis Asiria suyuq hatu-hatun reyninpa nisqanta: 14Ama Ezekiaswanqa q'otuchikuychischu, payqa manan qespichisunkichismanchu. 15Ezekiaschus Señor Diosman hap'ipakunaykichista munaspa nisunkichisman: Señor Diosmi qespichiwasunchis. Payqa manan munanqachu kay llaqtaq Asiria suyu reypa makinman urmaykunanta, nispa chayqa, ama q'otuchikuychischu, nispa.
16Chay hinaqa aman kasunkichischu. Asiria suyu reymi nin: Ñoqawan sumaqta rimanakuychis, hinaspa llaqtamanta lloqsimuychis. Sapankaykichistaq uvasniykichista higosniykichista mikhunkichis, p'uytuykichis unutapas ukyankichis. 17Chaymantataq kay hallp'aykichisman rikch'akuq wak suyuman apasqaykichis, chaypiqa kanmi trigopas, uvaspas, vinopas, t'antapas.
18Ezekiaschus: Señor Diosmi qespichiwasun, nisunkichis chayqa, ama paywan q'otuchikuychischu. ¿Mayqen suyuq diosnintaq Asiria suyu reymanta llaqtanta qespichiyta atirqan? 19¿Maytaqyá Hamatpa diosninkuna, Arfadpa diosninkunapas? ¿Maytaqyá Sefarvaimpa diosninkunapas? Samariatapas manan qespichiyta atirqanchu atiyniymantaqa. 20¿Mayqen dioskunataq suyunta makiymanta qespichiyta atirqanku? ¿Imaraykun qankunaqa yuyankichis Jerusalenta Señor Diospa qespichinanta? nispan, nispa.
21Chaymi paykunaqa ch'inlla kakurqanku, mana imata rimarispa, reypa: Aman imaninkichispaschu, nispa kamachisqanrayku. 22Chaymantataq reypa mayordomon Eliakimpas, qelqaq Sebnapas, qelqa waqaychaq Joapas llakikuymanta p'achankuta llik'ikuspa Ezekiasman rirqanku, hinaspan Asiria suyu oficialpa nisqanta payman willarqanku.
Atualmente Selecionado:
ISAÍAS 36: QC88
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia en Quechua de Cuzco © Sociedades Bíblicas Unidas, 1988.
