Fakahā 12

Ko e Fefine mo e Fu‘u Talākoni

1Na‘e toki hā mai ha fu‘u faka‘ilonga ‘i he langí, ko ha fefine ‘okú ne teunga ‘aki e la‘aá, pea tu‘u hono va‘é he māhiná, peá ne kalauni ‘aki ha ngaahi fo‘i fetu‘u ‘e hongofulu mā ua. 2Kuo mei fā‘ele ‘a e fefiné, peá ne to‘e he‘ene langaá.

3Pea toe hā mai mo ha faka‘ilonga ‘e taha ‘i he langí, tā ko ha fu‘u talākoni kulokula momoho ‘oku ‘ulu ‘e fitu, mo me‘a tui ‘e hongofulu, pea takitaha e ‘ulu ‘a e kalauni. 4Na‘á ne pae ‘aki hono hikú ‘a e vahe tolu ‘e taha ‘o e ngaahi fetu‘u he vavaá ‘o laku hifo ki māmani. Pea tu‘u atu ‘a e fu‘u talākoni ki he fefiné koe‘uhí ke fanau‘i mai pē ‘ene tamá peá ne folo leva.

5Pea fanau‘i mai ‘e he fefiné ha tamasi‘i tangata, ‘a ia te ne pule‘i ‘a e ngaahi pule‘anga kotoa ‘aki e tokotoko ukamea. Kae fa‘ao e tamasi‘í mei he fefiné ‘o ‘ave ki he ‘Otuá mo hono taloní. 6Kae hola e fefiné ki he toafá, ki ha feitu‘u ne tokateu ma‘ána ‘e he ‘Otuá, ‘o tauhi ai ia ‘o fe‘unga mo ha ‘aho ‘e taha afe uangeau mā onongofulu.

Ko e Tau ‘a Maikeli mo e Fu‘u Talākoní

7Na‘e hoko ha tau ‘i langi, ko Maikeli mo ‘ene kau ‘āngeló pea mo e fu‘u talākoni mo ‘ene kau ‘āngeló. 8Pea ‘ulungia ‘a e fu‘u talākoni, ‘o ‘ikai hanau toe nofo‘anga mo ‘ene kau ‘āngeló ‘i langi, 9pea kapusi ki māmani e fu‘u ngatá, ‘a e fu‘u talākoni tupu‘a ‘oku ui ko e Tēvoló, pe ko Sētane, ‘a ia ‘okú ne kākaa‘i ‘a māmani kātoa. Na‘e tuli hifo ia mo ‘ene kau ‘āngeló ki māmani. 10Pea toe ongo mai ha kalanga le‘o-lahi mei langi na‘e pehē,

“Kuo hoko mai ‘a e fakamo‘ui mo e ivi,

mo e pule‘anga ‘o hotau ‘Otuá,

mo e mafai ‘o ‘ene Kalaisí.

Ko e ‘aho mo e pō

mo hono talatalaaki‘i ‘e Sētane hotau kakaí

‘i he ‘afio‘anga ‘o e ‘Otuá.

Ka ko eni, kuo kapusi ia mei langi.

11Na‘e ikuna ‘e hotau kakaí ‘a Sētane,

koe‘uhi ko e ta‘ata‘a ‘o e Lamí,

pea mo e Folofola na‘a nau tu‘uakí.

Na‘a nau tali fiemālie

ke lī‘aki ‘enau mo‘uí,

‘o a‘u ki he mate.

12Ke fiefia ‘a langi,

mo hono kakaí kotoa.

Kae tangilāulau ‘a e fonuá mo ‘ōseni,

he kuo kapusi ki māmani ‘a e Tēvoló.

Kuo mahino kiate ia ‘oku si‘i hono ngaahi ‘ahó,

pea ‘oku teketekelili ai hono lotó.

13Na‘e mahino ki he fu‘u manu fekaí kuo kapusi ia ki māmani, peá ne fakafaingata‘a‘ia‘i leva ‘a e fefine na‘á ne fā‘ele‘i e tamasi‘í. 14Ka na‘e ‘oange ha ongo kapakau ‘o e fefiné ‘o hangē ha fu‘u ‘īkalé, koe‘uhí ke ne puna ki he toafá ‘o hao mei he talākoní. Pea na‘e tauhi ai ia ‘o fe‘unga mo ha ta‘u ‘e tolu mo e konga.

15Pea toki pu‘aki mai ‘e he fu‘u talākoní ha vai ‘o hangē ha vaitafé koe‘uhí kae ‘auhia ai e fefiné. 16Ka na‘e tokoni ‘a māmani ki he fefiné ‘o ne folo ‘e ia ‘a e vai na‘e mahua mai mei he ngutu e fu‘u talakoní. 17Pea mātu‘aki ‘ita e fu‘u talākoni ‘i he fefiné, peá ne fakalanga tau ai ki he toenga e fānau ‘a e fefiné, ‘a ia ko e kakai ‘oku nau talangofua ki he ‘Otuá mo mateaki‘i ‘a Sīsuú. 18Na‘e tu‘u pē ‘a e fu‘u talākoní ‘i matātahi.

Atualmente Selecionado:

Fakahā 12: TCNT

Destaque

Copiar

Comparar