Fakahā 11
11
Ko e Ongo Fakamo‘oni
1Na‘e tuku mai kiate au ha va‘akau na‘e hangē ha lulá, peá ne pehē mai,
“Fua takai e Temipale ‘o e ‘Otuá mo e ‘ōlitá, peá ke lau e tokolahi ‘o e kakai ‘oku lotu aí. 2Ka ko e loto‘ā he tu‘a Temipalé, ‘oua ‘e fua ia. He kuo vahe‘i ia ma‘á e kakai ‘oku ‘ikai ke nau ‘ilo ‘Otuá, pea te nau tā moloki ‘a e kolo tapú ‘o fe‘unga mo ha māhina ‘e fāngofulu mā ua. 3‘E tauanga‘a ‘eku ongo fakamo‘oní, pea te u fakamafai‘i kinaua ke na tu‘uaki e finangalo ‘o e ‘Otuá ke fe‘unga mo ha ‘aho ‘e taha afe uangeau mā onongofulu.
4Ko e ongo fakamo‘oní ‘a e ongo fu‘u ‘ōlive mo e ongo tu‘unga-maama ‘oku tu‘u ‘i he ‘afio‘anga ‘o e ‘Eiki ‘oku pule ‘i māmaní. 5Pea ka ai ha fili ‘e ala kiate kinaua, te ne ‘auha he afi ‘oku ‘alu atu mei hona ngutú. 6‘Okú na ma‘u mafai ke tāpuni e langí ke ‘oua na‘a tō ha ‘uha ‘o kapau ‘okú na lolotonga malanga‘i e finangalo ‘o e ‘Otuá, mo e mafai ke liliu ha vai ke toto, pe fakatupu ha ngaahi faingata‘a fakalilifu kehekehe ‘i māmani.
7Pea ka lava hono malanga‘i ‘e he ongo fakamo‘oní ‘a e finangalo ‘o e ‘Otuá, pea ‘e ‘alu hake leva ‘a e manu fekai ‘oku nofo ‘i he fu‘u luó ‘o tau‘i kinaua, pea te ne ikuna kinaua ‘o tāmate‘i. 8‘E lī hona ‘anga‘angá he ve‘e hala ‘o e fu‘u kolo na‘e tutuki ai ki ha kolosi ‘a hona ‘Eikí. ‘I he faka‘uhinga fakalaumālié ‘oku ui e kolo ko iá ko Sōtoma mo ‘Isipite.
9Pea ‘e fe‘unga mo ha ‘aho ‘e tolu mo e konga e mamata ‘a e kakai mei he ngaahi fonua, mo e matakali, mo e ha‘a mo e lea kotoa pē ki he ‘anga‘anga ‘o e ongo fakamo‘oní mo ta‘ofi hono tanu kinauá. 10‘E fai kātoanga ai mo fakafiefia ‘a e kakai kotoa pē ‘i māmani. Te nau fefoaki‘aki ‘enau me‘a‘ofa, koe‘uhí ko e me‘a kuo hoko ki he ongo palōfita na‘a nau kina aí. 11Ka ‘o ka hili ha ‘aho ‘e tolu mo e konga, ‘e toe hū ha mānava mo‘ui mei he ‘Otuá ki hona ‘anga‘angá, pea te na toe tu‘u hake, pea ‘e manavahē ‘a e kakai kotoa te nau sio kiate kinauá.
12Pea ongo mai ki he ongo fakamo‘oní ha fu‘u le‘o mei langi ‘oku pehē mai, “Mo omi ki ‘olungá ni.” Pea na ō hake ki langi ‘i ha konga ‘ao kae mamata pē hona ngaahi filí — 13kae fakafokifā pē kuo hoko ha fu‘u mofuike fakalilifu pea ‘auha ai e vahe hongofulu ‘e taha ‘o e koló. Na‘e mate ai e toko fitu afe, pea manavahē ai‘a hono toé ‘o nau fakahīkihiki‘i ‘a e ‘Otua ‘oku pule ‘i langí.
14Na‘e pehē ‘a e hoko ‘a e me‘a fakalilifu hono uá. Ka ‘oku vave ke hoko ‘a hono tolú.
Ko e Talupite hono Fitú
15Na‘e ifi ‘e he ‘āngelo hono fitú ‘ene talupité, pea ongo mai ha fu‘u le‘o ‘i langi ‘oku pehē,
“Kuo ma‘u eni ‘e hotau ‘Eikí
mo ‘ene Kalaisí
‘a e ngaahi pule‘anga ‘o māmaní.
Pea te ne pule ‘o ta‘e ngata pea ta‘e ngata!”
16Pea tō tū‘ulutui ai e kau mātu‘a ‘e toko uofulu mā fā na‘e nofo he ngaahi taloni he ‘afio‘anga ‘o e ‘Otuá, ‘o nau fakahīkihiki‘i ia, 17‘o nau pehē,
“‘Eiki ‘Otua Māfimafi,
‘Okú ke ‘i ai, pea na‘á ke ‘i ai.
Pea ‘oku mau fakamālō kiate koe,
koe‘uhí kuó ke ‘ai ho fu‘u mafí
‘o kamata ho‘o pulé.
18Na‘e ‘ita e tukui fonuá
pea houhau ai mo e ‘Afió na.
Pea kuo hoko mai e ‘aho ke fakamāu‘i
mo e kakai kuo maté.
Ko e ‘aho eni ke ke fakapale‘i ai
ho‘o kau sevāniti ko e kau palōfitá,
Mo ho kakai kotoa
na‘a nau fakalāngilangi‘i ho huafá,
‘A e lalahi mo e iiki.
Ko e ‘aho eni ke faka‘auha
‘a kinautolu kotoa na‘a nau faka‘auha ‘a māmaní.”
19Na‘e fakaava e matapā ‘o e Temipale e ‘Otuá ‘i langí, pea hā mai leva e ‘a’ake ‘o e kovinānité. Pea mana mo fatulisi mo ngalulu e fonuá pea tō mo e ‘uha maka lalahi.
Atualmente Selecionado:
Fakahā 11: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
