Софония 2
2
2-тӥ ЛЮКЕТ
1Асьтэдыз сак эскере-чаклалэ, эскеры-чакла, кутыса возьыны луонтэм калык, 2ужез быдэстыны пуктэм дыр вуытозь – нунал тӧлбер кадь лобӟоз – тӥ доры Кузё-Инмарлэн вожпотонэз вуытозь, тӥ понна Кузё-Инмарлэн ӝуась йыркурен нуналыз вуытозь. 3Музъем вылысь ваньды зӥбыт-востэм улӥсьёс, Солэсь законъёссэ быдэсъяса улӥсьёс, утчалэ Кузё-Инмарез; утчалэ шонерлыкез, утчалэ зӥбыт-востэм улонэз; оло нош Кузё-Инмарлэн вожпотон нуналаз ватӥськыны быгатоды. 4Уго Газаысь улӥсьёс кошкозы, Аскалон тырттэм кылёз, Азотын улӥсьёсыз нуназе шорын улляса поттозы, Екрон выжытэм быроз. 5Куректон-кайгу зарезь дур шаерын улӥсьёслы, Крит калыклы! Хананей калык, Филистим музъем, Кузё-Инмар тӥледлы пумит вера! Мон быдто тонэ, тон доры улӥсьёс уз кыле, – 6зарезь дурысь шаер ыж кӧлатон гидлы пӧрмоз, пудо ворсан инты луоз. 7Та шаер Иуда юртлэн кылем люкетэзлы сюроз, отын пудо возьмалозы, Аскалонысь коркаосын ӝытъёсы шутэтскылозы, уго Инмар Кузё-Инмарзы соос доры вуылоз, пленэ сюремъёссэс берыктоз. 8Мон кылӥ Моавлэсь сантэман кылъёссэ, Аммон пиослэсь тышкаськемзэс, кызьы соос ултӥяса возизы Мынэсьтым калыкме, вылтӥяськыса-быдӟымъяськыса улӥзы солэн ёросаз. 9Соин ик, Мон улӥсько! – шуэ Саваоф Кузё-Инмар, Израильлэн Инмарез, – Моав Содом кадь луоз, Аммон пиос Гоморра кадь луозы, улон интыязы пушнер ӝужалоз, сылал гулы пӧрмоз, пумтэм вапумъёс ӵожелы со кыр дуннелы пӧрмоз; Мынам калыкелэн кылем люкетэз соосты киултоз, Мынам калыке пӧлысь улэп кылемъёс соосты люкетлы басьтозы. 10Та соослэн адӟон люкетсы вылӥ мылкыдо луэмзы понна, Саваоф Кузё-Инмарлэсь калыксэ ултӥяса, вылтӥяськыса воземзы понна. 11Соослы Кузё-Инмар кышкыт луоз; музъем выллэсь вань инмаръёссэ быдтоз, котькудӥз аслаз интыысеныз Солы гинэ йыбыртъялоз – шормуӵъёсын улӥсьёс но. 12Тӥледыз но, эфиоп калык, меченым жуго. 13Вӧлъялоз Со Аслэсьтыз кизэ уйпала, соку Со Ассурез быдтоз, Ниневияез куашкам юртлы пӧрмытоз, луоё кыр кадь кӧс интылы пӧрмоз. 14Отын пудо уллёос, пӧртэм пӧйшуръёс шутэтскозы; пеликанъёс, ӵушъялъёс кӧлалозы чеберъяса лэсьтэм юртъёсаз; укноосысь соослэн куараоссы кылӥськозы, ӧс янакъёс куашкамын шуыса адӟиськозы, уго соослэн вылысьтызы кедырпулэсь шобретсы усёз. 15Шулдыръяськыса, сюлэмшугъяськонъёстэк улӥсь, ас сюлмыныз «мон, мон сяна, нокин но мукетыз ӧвӧл» шуись город, тӥни, марлы пӧрмоз. Кызьы со куашкам юртлы пӧрмиз, пӧйшуръёслы гу лэсьтон интылы пӧрмиз! Котькин но солэн вӧзтӥз ортчись мурт шултоз но киыныз шонтоз.
Atualmente selecionado:
Софония 2: УДМБИБ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) Библияез берыктонъя Институт, Хельсинки, 2013; 2016