Софония 1
1
1-тӥ ЛЮКЕТ
1Иудеяын Амонлэн Иосия пиез эксэйын пукон нуналъёсы, Езекиялэн Амория пиезлэн Годолия пиезлэн Хусий пиезлэн Софония пиезлы Кузё-Инмар дорысь таӵе кылъёс верамын вал:
2Музъем вылысь ваньзэ быдто, – шуэ Кузё-Инмар: 3адямиосты но пудоосты, ин тылобурдоосты но зарезь чорыгъёсты, визь туганъёсты сьӧлыклэсь кышкасьтэмъёсын валче быдто; музъем вылысь адямиосты быдто, – шуэ Кузё-Инмар. 4Иудея вылэ, Иерусалимын вань улӥсьёс вылэ киме вӧлъяло: Вааллы йыбыртъян интылэсь вань кылем тодметъёссэ быдто, вӧсясьёслэсь, священникъёслэсь нимзэс ӵушо, 5липетъёс йылын ин кужымъёслы йыбыртъясьёсты, Кузё-Инмарлэн нимыныз но асьсэлэн эксэйзылэн нимыныз кыл сётыса йыбыртъясьёсты быдто; 6соосты но быдто, кинъёс Кузё-Инмарлэсь куштӥськизы, Кузё-Инмарез ӧз утчалэ, Солэсь визь-кенешсэ ӧз юалэ. 7Инмарлэн Кузё-Инмарлэн азяз чус кариськы! Кузё-Инмарлэн нуналыз матэ вуиз: Кузё-Инмар курбонлы вандон дасяз, бырйиз, кинэ ӧтёно. 8Кузё-Инмарлэн курбонэз вандон нуналаз тазьы луоз: вӧсь каро кузёйыръёсты, эксэй пиосты, ваньзэс, кинъёс дӥсяло мурт калыкъёслэсь дӥськутсэс. 9Ӧс кусып вамен тэтчасьёсты, Кузё-Инмарлэсь корказэ эриктэм, ӧрекчаськон ужъёсын тырмытӥсьёсты со нуналэ ваньзэс вӧсь каро. 10Со нуналэ, – шуэ Кузё-Инмар, – озьы луоз: Чорыгкапка дорын вузон, мукет капкаос дорын викышъян кылӥськоз, вырйылъёсын туж бадӟым куашкан луоз. 11Карлэн улӥ люкетаз улӥсьёс, викышъяса бӧрдэ, уго вузкарись калык быдэсак ышоз-быроз, секыт азвесь тӥрлыкен ветлӥсьёс быдтэмын луозы. 12Со дыре тазьы луоз: югдытӥсь арбериен Иерусалимез учкыса пото но вӧсь каро соосты, кинъёс маял-шӧм вылазы пуко но сюлмынызы шуо: «Кузё-Инмар ӟеч но уг лэсьты, урод но уг лэсьты», – 13соослэн узырлыксы лушкан-таланлы пӧрмоз, коркаоссы – куштӥськем юртъёслы: соос корка пуктозы, но отын уз улэ; виноградпуд мерттозы, но отысь вина уз юэ.
14Матын Кузё-Инмарлэн быдӟым нуналыз, матын – но туж дыртэ: Кузё-Инмарлэн нуналызлэн куараез кылӥське ини; соку самой кышкасьтэм мурт но шуш куараен черектӥськоз. 15Вожпотонэн, кӧтӝожен, ӝикаса улон нунал та, куашкатон, тырттэм кельтон нунал та, – тём-тём пеймыт, пилемо, бусо нунал, 16гумы пеллян нунал, юнматэм каръёслы, ӝужытэсь каланчаослы пумит ожмаськыны ӧтись куаралэн нуналыз та. 17Мон ӝикато адямиосты – соос синтэм мурт кадь ветлозы, малы ке шуоно соос Кузё-Инмарлы пумит сьӧлыказы; сюй-тузон кадь соослэн вирзы киськамын луоз, лулмугорзы кыед кадь пазямын луоз. 18Кузё-Инмарлэн вожпотон нуналаз азвесьсы но, зарнизы но соосты утьыны уз быгаты, Солэн вожпотонэзлэн тылыныз быдэс музъем ньылэмын луоз, музъем вылын вань улӥсьёсты Со шӧдтэк шорысь быдтоз.
Atualmente selecionado:
Софония 1: УДМБИБ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) Библияез берыктонъя Институт, Хельсинки, 2013; 2016