Амос 4
4
4-тӥ ЛЮКЕТ
1Кылзэ та верам кылэз, Васанысь ветылъёс, Самария гурезьёсын улӥсьёс, тӥ, куанеръёсты ултӥяса возисьёс, асьтэлэн кузёостылы тазьы шуисьёс: «Сёт милемлы, ми юомы!» 2Аслаз дун-сьӧлыктэм луэменыз Инмар Кузё-Инмар кыл сётӥз: «Тани, тӥ доры сыӵе нуналъёс вуозы, куке тӥледыз конгро бодыосын потталозы, тӥлесьтыд кылемъёссэ визнанъёсын шедьытъяса потталозы. 3Борддоръёслэн пасьёссы пыр потоды, ваньды юртъёсысьтыды-четлыкъёсысьтыды вань чеберъянъёссэ куштоды», – шуэ Кузё-Инмар. 4Вефиле мыныса сьӧлыкалэ, мынэлэ Галгалэ – йыружъёстэс йылэтэ; котькуд ӵукна курбонъёстэс вае, дасэтӥ люкет курбондэс коть куиньмоймысь вае. 5Тау карон курбонлы чырсатыса пыжем няньдэс вае, ас мылкыд каремдыя ваем курбонъёсты сярысь ялэ, ивортэ, уго тӥ, израиль нылпиос, тае яратӥськоды, – шуэ Инмар Кузё-Инмар. 6Со понна ик Мон тӥлесьтыд пиньёстэс вань городъёсады чылкыт кельтӥ, вань гуртъёсады няньлы ёрмыса улон вуиз; нош тӥ Мон пала ӧд берытске, – шуэ Кузё-Инмар. 7Аран вуытозь куинь толэзь ӵоже тӥ доры медаз зоры шуыса, зорез кутыса вози; одӥгаз город вылэ зор кисьтӥ, нош мукетыз вылэ ӧй кисьты; одӥгаз ана вылэ лулскытозяз зор кисьтӥ, нош мукетыз, зорлы ӟудыса, куасьмиз. 8Одӥг городэ кык, куинь городъёсысь ву юыны люкасько вал, но сюзэс юзматыны ӧз быгатэ; но соку но тӥ Мон пала ӧд берытске, – шуэ Кузё-Инмар. 9Ю-няньды вылэ мӧль уськытыса, ӵужектытыса тӥледыз вӧсь карылӥ; трос садъёстэс, виноградпудъёстэс, смоквапуостэс, вӧйпуостэс гоно нумыр сиылӥз, – озьы ке но тӥ Мон пала ӧд берытске, – шуэ Кузё-Инмар. 10Тӥ вылэ Мон Египетысезлы укшась урод черъёс лэзьылӥ, тӥрен-пуртэн егит пиостэс виылӥ, валъёстэс пленэ нуылӥ, озьы тӥляд сылон интыысьтыды кӧш зын ӝутскылӥз, нырпасяды пырылӥз, – озьы ке но Мон пала ӧд берытске, – шуэ Кузё-Инмар. 11Тӥлесьтыд юртъёстэс куашкатъяй, кызьы Инмар Содомен Гоморраез куашкатӥз, тыл пушкысь ӝуась сэрегпумез кадь тӥледыз поттӥ, – озьы ке но тӥ Мон пала ӧд берытске, – шуэ Кузё-Инмар. 12Соин ик Мон тыныд тазьы лэсьто, Израиль; озьы Мон тыныд лэсьто бере, дасяськы, Израиль, аслэсьтыд Инмардэ пумитаны. 13Уго, тани, – Со, Кудӥз гурезьёсты кылдытэ, тӧлэз пельтытэ, адямилы солэсь мылкыдзэ вера, ӵукна югытэз тём пеймытлы пӧрмытэ, музъемлэн йылтӥз вамышъя. Солэн нимыз Саваоф Инмар Кузё-Инмар.
Atualmente selecionado:
Амос 4: УДМБИБ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) Библияез берыктонъя Институт, Хельсинки, 2013; 2016