1 Kɔ̀rintìyà 2
2
Ŋmɛ̀ndì mò lì wòmàwɛlɛhwɛ̀ la ama Yerzù o mbarza
1Wònyamòwè è hvònda ema nà mà e jèeyà, ò lì e ùkirzɛ̀lɛ̀lɛ̀ ŋmɛ̀ndì mò Wòtani mo ama Lohwɛ̀, na rzì e ohwane tɔ̀ mbɔrzi e mà e mà imbama tɔ̀ lìhwìyè hvɛ ema lì mà karzama. 2Nà omà nà mà hwɛ na inyɔ, nà mà àwòhwànɛ̀lɛ̀ na imba mbiti nanù ema na rza gbeyà hvɛ tɔ̀ eyà lì aka tɛ o lì ohwa lì hvomɛ̀nɛ̀ Yerzù Krirztò na e kpelì ema à mà ŋwèeyà o mbarza. 3Nà mà hwɛ̀ nà inyɔ ò e mbowà ya anyu ndɛɛ̀ndɛ nà rzi tanɛ o lì gbeyà ene èwòlò, èhwanja ŋmèmà mà ami mo ma tumeya na wɔ̀ŋgɔ̀. 4Nà oma nà mà hwɛ lì e okolɛ̀, na lì ohweyà Ŋmɛ̀ndì mò Gbamù, ŋmɛ̀ndì nà mà hwɛ lì e ohweyà, mo rzi ohve tɔ̀ mbɔrzi ya lìhwiyè lì ndɛnɛ. Ndi na oma nà mà hwɛ lì e ohweyà Ŋmɛ̀ndì mò Gbamù, hweyà ema nà mà hwɛ lì ohwa, hwe uŋmɛ̀lɛ̀ ema e ŋginyà ya Èlìŋgɛ̀ yà Wòtani ema hwɛ na imba. 5Nà rzi arze ema e lòkɛ̀ Ŋmɛ̀ndì mò Gbamù èhwanja mòtò mɔ̀kɔ a mà gbeyàna lìhwiyè la eni la mòtò wà hwènàmà o lì e ohweyà e mɔ̀. Ndi nà mà arza ema e lòkɛ̀ mòŋgo Ŋmɛ̀ndì mò Gbamù na oma Lohwà Mɔ̀ ŋmìti a gbeyànì e ŋginyà ya eni o lì e gbeyà ema e lòkɛ̀ Ŋmɛ̀ndì mò Gbamù.
Lìhwiye ema lì uwɛ̀lɛ̀lɛ̀yi o ma Lohwɛ̀
6I hwèlì tɛ na hwaŋga ema hwà mà jɛ̀ɛ̀ hwàmbaki o malòkɛ̀ ma awu na Yerzù, e hwèlì tɛ ema i ohwa ndi Ŋmɛ̀ndì mò Gbamù, i mo ohwàna ndi na lìhwiyè. Liŋgi lìhwiyè lì rza enje ndi lìhwiyè ema mòtò wa ene rze a gbeyàna. Tɔ̀ e lɔ ema e wɔ̀ hwa kànèyà ene rze, ema lìkànèyà la awu ŋmanà mbɔ lì kùwa. 7Lìhwiye ema i gbeyàna, lì hwèlì ndi lìhwiyè ema Lohwɛ̀ a jo ŋgbelì. Lìhwiye ema lì ma ùtàhwa natɛ̀ɛ na ò hwèwòtelì, o lìhwiyè la arzu ema Lohwɛ̀ à mà tɛ̀yirzɛ ndèŋgàna hwewòtelì hwe rze. 8Ndi, e wɔ̀ hwà kànèyà ene rze hwà rzi rzɔ̀ŋgìtɛ̀nɛ̀ lìni lìhwiyè lì ndɛnɛ̀ la ama Lohwɛ̀. Hwà mà rzɔ̀ŋgìtɛ̀nɛ̀ tɛ mamɛ ema Lohwɛ̀ ama hwɛ lì gbeyà, oma hwa rzi wòmeyà e Rzàŋgo wa èluhwe o mbàrza. 9Èya èŋge ema e tìlahwì o kààtì ya wòtani nanù ema, “Tɔ̀ mòtò a rza ɛni, tɔ̀ mòtò a rzi hweyi, tɔ̀ mòtò a rzi lutelì hwenè hweyà Lohwɛ̀ à rzɛ̀ŋgɛnɛ hwaŋga hwatò ema hwà mò lìŋgàni.” 10Ndi, Lohwɛ̀ à mà gbeyàna Èlìŋgɛ̀ yà Wòtani o lì jò uŋmɛ̀lɛ̀, hwènè hweyà hwe arzɛ. Èlìŋgɛ̀ ya ama Lohwà è arzìrzɛ̀ hweyà hwe arzɛ, ndèŋgàna e hwi hweyà hwe arzɛ, na ìwùndɛ̀ ja ama Lohwɛ̀ ema mòtò a rza tànɛyi lì rzɔ̀ŋgìtɛ̀nɛ̀. 11Tɔ̀ mòtò à rzà tanɛ̀yi lì hwiyà mɔ̀ŋgɛ̀lɛ̀ ma mòtò. Èlìŋgɛ̀ ema e hwèlì o tenì ya mòtò, yɔ ndi e hwi màlùtèyà ma ama òŋgo mòtò. Nànù mɛnɛ ndi tɔ̀ mòtò tɔ̀ mɔ̀kɔ à rza tànɛ lì hwìyà mɔ̀ŋgɛ̀lɛ̀ ma ama Lohwɛ̀, lì aka tɛ èlìŋgɛ̀ ya eni mɛnɛ. 12I rzà ohvì ndi èlìŋgɛ̀ ya ene rze, i ohvi ndi èlìŋgɛ̀ yà wòtani ema Lohwɛ̀ a jo ŋgbèli, oma i ma rzɔ̀ŋgìtɛ̀nɛ̀ hweyà hwe arzɛ ema hwe jo ŋgbààhwì nà Mɔ̀, ò ŋgùndù. 13I rza gbeyàna ndi è mbɔrzi ema e mòtò wà hwènàmà a gbeyàna lìhwiyè là eni o lì okolɛ̀nɛ hwatò. Ndi i gbeyàna ndi mamɛ Èlìŋgɛ̀ yà Wòtani e jo lìyɛlɛ o lì ohwa. I gbeyàna ndi e mbɔrzi ema Èlìŋgɛ̀ yà Wòtani e jo òhweyà lì hvomɛ̀nɛ̀ hwèŋge hweyà. 14È mɔ̀ ema a rza ohvɛɛ Èlìŋgɛ̀ yà Wòtani a rza o lùwa hweyà ema hwe uwɛ̀lɛ̀lɛ̀yi o Èlìŋgɛ̀ ya ama Lohwɛ̀. Mɔ̀ a rza tànɛyi lì rzɔ̀ŋgìtɛ̀nɛ̀ hwèŋge hweyà, hwe hwèlì ndi hweyà hwe mɔ̀lɔ̀kɔ̀rzɔ̀ na mɔ̀. A rza tanɛ lì hwe rzɔŋgìtɛ̀nɛ èhwanja Èlìŋgɛ̀ yà Wòtani yɔ ndi e òŋgòwàna hwatò ò lì rzɔ̀ŋgìtɛ̀nɛ̀ hweyà hwe ama Lohwɛ̀. 15È mɔ̀ ema à ohvi Èlìŋgɛ̀ yà Wòtani a tànɛyi lì rzɔ̀ŋgìtɛ̀nɛ̀ o lì hwiya hweyà hwe arzɛ. Ndi, tɔ̀ mòtò tɔ̀ mɔ̀kɔ a rza tanɛ lì hwiya mɔ̀ŋgɛ̀lɛ̀ ma eni. 16Nà oma è tìlàhwì ò è kààtì yà Lohwà nanù ema, “Njɛnɛ à hwi màlùtèyà mà ama Rzàŋgo e? Njɛnɛ à tànɛ lì mò ŋgba màyòwà e? Ndi irzɔ jo ohvi màlùtèyà mà ama Krirztò.”
Atualmente selecionado:
1 Kɔ̀rintìyà 2: bri
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2022, CABTAL