1 Kɔ̀rintìyà 1
1
1Ìmba Pàwolò ndi nà e omelì inì ìtìta ema nà ma hwɛ̀lɛ̀hwɛ̀ na lemeyà la ama Lohwɛ̀ o lì hwɛ àpɔ̀rzìtòlò ya ama Yerzù Krirztò ŋmèmba na ŋmanyàŋgò wa àrzu, Rzɔ̀rztenìrzì. 2Nà tìleya ndi ŋmèmba mò hwatò hwa Lohwɛ̀ ema mò hwèlì ò mbowà ndɛnɛ̀ yà Kɔ̀rintò. Inyɔ ema è hwɛ̀lɛ̀hwɛ̀yi nà Lohwɛ̀ ò lì hwɛ hwatò hwa eni hwa wòtani. À è gbèyi wòrzaŋgi èhwanja e ahviyànɛ nà Yerzù Krirztò. Nànù mɛnɛ hvɛ ndi à hvɔ̀rzì hwatò hwa arzɛ o èki ya arzɛ ema hwa kanɛ̀ o lìna la ama Rzàŋgo Yerzù Krirztò. È Rzàŋgo ya awu nà è yà arzù. 3Inyɛ̀ è ndèli nà ɛ̀yɔ̀lɛ̀ yà ama Lohwɛ̀ Tatɛ̀ wà arzu nà Rzàŋgo Yerzù Krirztò, è hwɛ nà inyɔ.
Pàwolò à èki Lohwɛ̀ ò ŋmèmba mò Kɔ̀rìnto
4Hvonda tɛ, imba nà ŋgbaà Lohwɛ̀ jèka, lì è hvomɛ̀nɛ̀ inyɔ ò nyòla è ndèli ema à è ŋgbelì lì akeyà nà Yerzù Krirztò. 5Linì lì ahvìyànɛ̀ nà Krirztò, lì è gbèyi Lohwɛ̀ à è ŋgbelì hweyà hwe arzɛ. À è gbèyi ema è ohwe Ŋmɛ̀ndì mò Gbamù, nɛ̀ mò hwɛnì lì ohwàhwà. Nà lì è gbeyà hvɛ nanù ema è rzɔ̀ŋgìtɛ̀nɛ̀ hweyà ema hwe mò hvomɛ̀nɛ̀. 6Ène eyà è uŋmɛ̀lɛ̀ nanù ema ŋmɛ̀ndì mò ama Yerzù Krirztò mò mà è kakùmɛ̀nɛ̀ kɛ̀lɛ̀tɛ̀tɛ̀ ò tenì yà mèèmà mè anyu. 7Ène ŋgàna ò eŋgànɛ̀lɛ̀, è rzi hvondi lì lùwa tɔ̀ mònàmɛ̀ tɔ̀ mɔ̀kɔ nà omà è ambɛ̀lɛ̀lɛ̀ nanù ema, Rzàŋgo wà arzu Yerzù Krirztò à awùlùhwɛ mɔ̀ ŋmìti. 8Rzàŋgo Yerzù mɔ̀hvɛ à hwɛnì lì è etìrzɛ̀ màlòkɛ̀ mà anyu, natɛ̀ɛ nà ò lìrzukù là ene rze. Ò lì arza nanù ema è rza hwɛnɛ lùùrzè ò wùnyà wà ama Rzàŋgo Yerzù Krirztò a o jà o lì kàyìrzɛ̀ hwatò hwa arzɛ. 9Lohwɛ̀ à hwèlì à gbeyà mamɛ yà arzɛ ema à mà ohwe nanù ema à gbeyà. Mɔ̀ à è hvɔ̀rzì ò lì hwɛ mɔ̀kɔ nà è ŋmanà wà mùnyanà wà eni Yerzù Krirztò, è Rzàŋgo yà arzù.
Pàwolò à mà hwatò hwa Lohwɛ̀ hwa rza hwɛnì lì akahwanɛ̀
10Wònyamòwè kòkò, nà è atɛkɛ ò lìnà là ama Rzàŋgo wà arzu Yerzù Krirztò, inyɔ hwa arzɛ, è ohwe ndi eyà yɔ̀kɔ, aŋga nanù ò rza hwɛ tɔ̀ mbùnakɛ̀ tɔ̀ hvɔ̀kɔ ò ìtììtènì jà anyu. È hwɛnɛ lì ahvìyànɛ̀ ema lì ondi nà lì lùtèyà, nà etɔ̀ti yɔ̀kɔ, ò mamɛ yà arzɛ ema yà rza lì gbeyà. 11Wònyamòwè kòkò, nà è ohweyà ene eyà nanù, èhwànja lòŋgo là hwatò hwà èhvèhva ema hwa hwèlì ò lìtumba là ama Klɔ̀rzì hwà mà nò òhweyà ema inyɔ hwiti yà à tɔ̀wɔ̀nɛ̀. 12Nà ohwa ndi nanù èhwanja, lòŋgò là anyù è hwèlì è ohwà naŋgɛ̀ nanù ema, “Nà hwèlì ndi mɔ̀nɔ̀ŋgèlì wà hwèyòkòwèlì hwe amà Pàwolò.” Hwanɛ̀yì wɔ̀ hvɛ̀ hwa hwèlì hwa ohwà nanù ema, “Nà oŋgama ndì hwèyòkòwèlì wà ama Apòlòrzì.” Tɔ̀ “Nà oŋgamà ndi hwèyòkòwèlì hwe ama Pètrò,” tɔ̀ “Nà oŋgamà ndi hwèyòkòwèlì hwe ama Krirztò.” 13Krirztò àkahwàwɛ̀ hwèhvàrzù na hwèhvàrzù e? Ìmba Pàwolò ndì hwà mà wòmeyà ò mbarzà ò nyòla anyu e? Ò hwèlì tɔ̀ mɔ̀kɔ wà anyù ema à mà lùhwìrzɛ̀hwɛ̀ ò lìnà là amà Pàwolò e? Ò lì ohwà è jɔ̀kɛ̀, ò rzà enjè tɔ̀ mɔ̀kɔ. 14Nà ekà Lohwɛ̀ ema nà rzi lùhwìrzɛ̀ tɔ̀ mòtò tɔ̀ mɔ̀kɔ, lì aka tɛ Klìrzìpɔ̀rzì nà Gàyiyùrzì. 15Ò naŋgɛ̀ nanù, tɔ̀ mòtò, tɔ̀ mɔ̀kɔ à rzà tànɛyì ò lì òhwa nanù ema à mà lùhwìrzɛ̀hwɛ̀ ndi ò lìnà là amì. 16“Ɛ̀ɛ̀ nà è jɔ̀kɛ̀ nà mà lùhwìrzɛ̀ hvɛ lìtumba là ama Rztèhvànàrzì, ndi nà rza ɔ̀ŋgɛ̀lɛ̀ nanù ema nà mà lùhwirzɛ̀ òhvɛhvɛ mòtò.” 17Krirztò à rzì nò omè ò lì lùhwìrzɛ̀ hwatò. À mà nò omà ndi ò lì ohwà Ŋmɛ̀ndì mò Gbamù mò ama Lohwɛ̀. Nà rza è ohwane hvɛ nà tɔ̀ mbɔrzi yà gbàŋgò. Nà gbeyànì tɛ è mbɔrzi yà gbaŋgo, èŋge ŋgàna è hwɛ ndi ema, è kpelì yà ama Krirztò ò mbàrza è rze enje tɔ̀ eyà.
Pàwolò ama Krirztò mɔ̀ndi à hwèlì lìhwiyè nà Màyìmbì mà ama Lohwɛ̀
18Ŋmɛ̀ndì mò è kpelì yà ama Krirztò ò mbarza, mò hwèlì ndi èètì nà hwàŋgà hwatò ema hwa hwɛnì lì hvàŋgahwà. Ndì irzɔ̀ ema i hwèlì ò lì rzùŋgàhwà, ì hwi nanù ema mòŋgò ŋmɛ̀ndì mò hwèlì ndi è ŋginyà yà ama Lohwɛ̀. 19Nà oma è tìlahwì ò è kààtì yà Lohwà nanù ema, Lohwɛ̀ à ohwi nanù ema, “Nà wùùlɛ̀ lìhwiyè là hwàŋgà hwatò ema hwà àŋgo, nà rzɔnjɛ̀lɛ̀ hvɛ̀ ŋgbààŋgò wò hwàŋgà ema hwa àŋgo.” 20Ò èŋgànɛ̀lɛ̀ rzɔ̀ è mòtò wà gbàŋgo, à rze enje tɔ̀ eyà. Ndèŋgànɛ̀lɛ̀ è Mòòkòlèlì wà mbenda ò Ìrzàyɛ̀lì à rze enje tɔ̀ eyà. Hwatò ema hwa kòkòwɛ̀lɛ̀ hwatò hweyà nà gbàŋgo ò ene hvonda wɔ̀ hvɛ hwa rze enje tɔ̀ eyà. È jɔ̀kɛ̀ è hwèlì ndi nanù ema Lohwɛ̀ à uŋmɛ̀lɛ̀yi nanù ema lìhwiyè là hwatò ema hwa aŋgo lì hwèlì ndi èètì. 21Kànatɛ̀ Lohwɛ̀, ò lìhwiyè là eni à mà ɛnɛ nanù ema, hwatò hwa ene rze hwa rza ò tànɛ lì gbeyàna lìhwiyè là awu ò lì mò hwiya, Lohwɛ̀ à lòmi lì kàkɛ̀nɛ̀ nanù ema à rzùŋgà mòŋgɛ mà hwatò ema hwa mò lòkɛ̀, nà oma wɔ̀ hwa hweyà ŋmɛ̀ndì ema jò òhwa lì hvomɛ̀nɛ̀ Krirztò. Tɔ̀ nɛ hwatò ema hwa rza hwiyɛ Lohwɛ̀, hwa ohwa ndi ema ŋmɛ̀ndì mò hwatò hwa èètì ɔ̀ndi irzɔ jò òhwa. 22Wonyà Yudà hwa arza ndi lì ɛnɛ embànèlì yà mànyakà, ò lì lòkɛ̀. Ndi hwatò hwa Grìki, wɔ̀ hwa arza ndi lìhwiyè lì ndɛnɛ. 23Ndi irzɔ ì ohwa ndi nanù ema Yerzù à mà wòmàhwɛlɛ ò mbarza. Wonyà Yudà hwa rza arza lì hweyà monò ŋmɛ̀ndì, hwaŋga hvɛ ema hwa rza enje wònyà Yudà, monò ŋmɛ̀ndì mò hwèlì ndi èèti nà wɔ̀. 24Ndi Lohwɛ̀ à hwɛlɛyi hwatò ò lì rzuŋgahwa. Lòŋgò là awu hwa hwèlì ndi wònyà Yudà hwanɛyi hvɛ hwatò hwa Grìki. Ò hwanù hwatò monò ŋmɛ̀ndì ema ì ohwa mò hwèlì ndi Krirztò, Mɔ̀ ndi à hwèlì è ŋginyà yà ama Lohwɛ̀ nà lìhwiyè là ama Lohwɛ̀. 25Mamɛ è ɛneyà nàa èèti yà ama Lohwɛ̀, è akayi lìhwiyè là hwatò, ndèŋgàna mamɛ è ɛneyà nà lìyɔ̀ti là ama Lohwɛ̀ yà akàyi è ŋginyà yà hwatò anù rze. 26Ìi wònyàmowe kòkò, è rzì hvoŋga inyayi jà hwatò ema ì mà hwɛ lìrzako ema Lohwɛ̀ à mè hwɛlɛ. Hwatò hwa ene rze hwa mà è ɛnɛ lòŋgo là anyu nàa hwatò ema hwa ohvi lìhwiyè. Lòŋgò là anyu ema hwɛ ndi hwàkànèlì, lòŋgo là anyu hvɛ, è mà uwɛ̀lɛ̀lɛ̀yi ndi ò mòtendè mò hwàkànèlì. 27Ndi, Lohwɛ̀ à hvɔ̀rzì hweyà ema hwatò hwa anù rze yà mɔ̀nyɛ̀ hwà ɛ̀nɛ nà hweyà hwe ŋgundu, ò lì enyìrzɛ̀ hwatò ema hwa ɔ̀ŋgɛ̀lɛ̀ nanù ema hwa hwɛnì màhwiyè, à hvɔ̀rzì mamɛ ema hwatò hwa anù rze hwà ɛnɛ̀ ema è rza ohvi ŋginyà, ò lì enyìrzɛ hwatò ema hwa ɔ̀ŋgɛ̀lɛ̀ nanù ema wɔ̀ hwa ohvi ŋginyà. 28Lohwɛ̀ à mà hvɔ̀rzɔ̀ ndi mamɛ ema hwatò hwa anù rze yà mɔ̀nyɛ̀ hwa ɛnɛ ema è hwèlì ndi ŋgundu, ndeŋga hwa rzɔnjɛ̀lɛ̀. À mà gbeyà ndi nanù ò lì hvaŋga mamɛ ema hwatò hwa anù rze, hwa ɛnɛ̀ nà eyà yà wòlìtò. 29Ène eyà è mà gbèyɛ̀nɛ̀ ndi nanù ema tɔ̀ mòto tɔ̀ mɔ̀kɔ a rza ayèkirzɛ ò worzò wò ama Lohwɛ̀. 30Lohwɛ̀ ndi à è jani ò lì hwɛ mòtò mɔ̀kɔ nà Yerzù Krirztò. Hweyà ema Yerzù Krirztò à mà gbèye hwe jò gbèyi ò lì hwiya nanù ema mɔ̀ ndi à hwèlì lìhwiyè là ama Lohwɛ̀. Ène ŋgàna è uŋmɛ̀lɛ̀ nanù ema Yerzù Krirztò ndi à jò gbèyi ò lì gbeyà hweyà hwe jɔ̀kɛ̀, ò lì hwɛ hwatò ema hwa hwèlì wòtani, nà lì ulɛ̀hwɛ̀ ò wòhwe. 31Ò èŋgànɛ̀lɛ̀ rzɔ, nà oma è tìlàhwì ò è kààtì yà Lohwà nanù ema, “Tɔ̀ njɛnɛ ema à kùmbi lìya là eni ò kòkò, à aŋgàmɛ̀nɛ̀yi ndi ò lì li kumba ndi ò hweyà ema è Rzàŋgo à mò gbèèlì.”
Atualmente selecionado:
1 Kɔ̀rintìyà 1: bri
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2022, CABTAL