Matius 6
6
Inioꞌkei mampokokodeꞌ alaꞌ pepaꞌanimi
1Hi Yesu mampololiu lolitaNa, Notiꞌi, “Moromiꞌ-romiꞌkei hingkeꞌna inioꞌkei mowali lala poꞌagama i hinarora toaꞌ to woriꞌ hingkeꞌna niꞌokiꞌlukei. Alaꞌ ane iwalikei hatoꞌo hawaꞌkei hingkiꞌ pahua hapo-hapo ka Umoꞌmi to uwaꞌ i suruga. 2Mewaliꞌ, ane mosulungikei toaꞌ to merima-rima, inioꞌ nobahaꞌi toaꞌ to woriꞌ, hibali to rowali toaꞌ to mampetomoromiꞌluhi i howali, alaꞌ iohi mampetidoꞌkiluhi komoromiꞌna waliara i lali tambi-tambi penombaha hei i lala ngkodeꞌ hingkeꞌna noperenakiluhi toaꞌ. Tuꞌu mpololeke to Kutiꞌikikei: toaꞌ to hatoꞌo waliara, hawaꞌhi hingkiꞌ pahua hapo-hapo ka Pueꞌ Ala, alaꞌ rohuamo pamperenaki ka toaꞌ. 3Angkana, ane mempaꞌanikei hapolu pe toaꞌ, hangangaa mepaꞌanikei ngkawowuni, 4hampoliꞌmo paralu robahaꞌ toaꞌ ntaniꞌna. Alaꞌ Umoꞌmi to i suruga pobahaꞌ komoromiꞌna waliami to tewuni tiꞌo hei Io hingkiꞌ mampaꞌanikei howonina.”
Inioꞌkei mampetoꞌele-ele ane mekokaekei
(Luk. 11:2-4)
5“Ane mekokaekei, inioꞌ hibali toaꞌ to mampetoromiꞌ-romiꞌ i howalilu. Rolei metotiꞌi mekokae i lali tambi penombaha hei ikohidupaꞌana lala hingkeꞌna niꞌokiꞌhi hei noperenakihi toaꞌ ntaniꞌna. Tuꞌu mpololeke to Kutiꞌi hieꞌe: toaꞌ to hatoꞌo waliara, hawaꞌi hingkiꞌ pahua hapo-hapo ka Pueꞌ Ala, alaꞌ pahuamohi pamperenaki ka toaꞌ. 6Angkana ane mekokaekei, mekahikei pe lali kamaraꞌmi hei iwitikei wambaꞌmi, honiꞌkei mekokae pe Umoꞌmi to hawaꞌi iꞌokiꞌkei. Alaꞌ Io pangkiꞌ waliami to tewuni tiꞌo hei Io hingkiꞌ mampaꞌanikei howonina.
7Ane mekokaekei, inioꞌ niwuliori-oriꞌi hibali toaꞌ to hawaꞌhi pobahaꞌ Pueꞌ Ala. Rotiꞌireaꞌ hingkiꞌ nitorimomo perapiꞌre nokomi kokurauꞌna pekokaera. 8Inioꞌkei mampetuntui waliara, alaꞌ Umoꞌmi i suruga umbiꞌ Nobahaꞌmo hapo to iparaluikei kehapoꞌi handoaꞌi tene iperapiꞌkei. 9Mewaliꞌ, ane mekokaekei itiꞌikei waheꞌe:
Umoꞌki to i suruga,
kipokodeꞌ konaꞌMa to mangkolehi.
10Kiperapiꞌ hingkeꞌna Ipotongawa poparentaMa,
hinamo lekiꞌ-lekiꞌna toaꞌ mampetuntui peleihaMu i duniaꞌ
hibali i suruga.
11Ipaꞌanika kopongkonangki i ando hieꞌe hante maganaꞌ,
12hei Iꞌampunika ka komasalaꞌki,
hibali ingka woꞌo moꞌampuni toaꞌ to masalaꞌ pe ingka.
13Hei inioꞌka Ipotedehi nikeloi mowali dosa
angkana Ipodaꞌka ka to kodake.
[Alaꞌ Ingkomo Datu to moparenta,
to makuasaꞌ
hei to masipatoꞌ nipokodeꞌ
wute nantolou-louna. Amin.]#6:13 Koꞌukoana lalana hieꞌe hawaꞌi teꞌukiꞌ i lekiꞌ-lekiꞌna suraꞌna hi Matius to noꞌukiꞌ huliꞌ to hohai mpololeke.
14 #
Mat. 18:21-35; Eps. 4:32 Ane Iꞌampunikei toaꞌ to masalaꞌ pe ingkei, Umoꞌmi to i suruga hingkiꞌ moꞌampuni woꞌo salaꞌmi. 15Angkana ane hawaꞌkei moꞌampuni toaꞌ to masalaꞌ pe ingkei, Umoꞌmi to i suruga hawaꞌi woꞌo hingkiꞌ moꞌampuni salaꞌmi.”
Ane mabokikei inioꞌ nipomombahaꞌi
16“Ane mabokikei, inioꞌkei mampetomasusa lali, hibali toaꞌ to mampetoromiꞌlu i howali. Ane mabokihi, rotungkai hawaꞌi memporouꞌ ba mekarabiꞌ, hingkeꞌna robahaꞌ toaꞌ kopabokire. Tuꞌu to Kutiꞌikikei: toaꞌ to hatoꞌo waliara, hawaꞌi hingkiꞌ pahua hapo-hapo ka Pueꞌ Ala, alaꞌ rohuamo pamperenaki ka toaꞌ. 17Angkana ingkei, ane mabokikei, memporouꞌkei hei mekarabiꞌkei, 18hingkeꞌna hawaꞌi robahaꞌ toaꞌ kopabokimi. Bateꞌnalu Umoꞌmi i suruga to hawaꞌi iꞌokiꞌkei to pobahaꞌ kopabokimi. Io pangkiꞌ waliami kehapoꞌi hawaꞌi mombaha i toaꞌ, hei hingkiꞌ ihuakei howonine.”
Inioꞌ morampu luma poduniaꞌ
19“Inioꞌkei morampu hei mamporia luma poduniaꞌ, alaꞌ luma poduniaꞌ noꞌoka bubuꞌ hei totohiꞌa. Tambi pamporideꞌa lumami wadi nirenda hei ohina ninako. 20#Mat. 6:33; 1Tim. 6:18-19Aginamo morampukei lumami i suruga. Alaꞌ luma i suruga hawaꞌi hingkiꞌ moholi, alaꞌ inoꞌo hawaꞌi uwaꞌ to mampototohiꞌa, hawaꞌi uwaꞌ to mampobubuꞌ, hawaꞌi uwaꞌ to morenda hei manako. 21Alaꞌ i imbo koꞌuwaꞌana lumami, itoꞌo nturusi pekirimi.”
22“Matami hibali huluꞌna wotami. Ane mobaroꞌi matami, mobaro woꞌo wotami. 23Angkana ane mokorindiꞌi matami, mokorindi woꞌo wotami. Mewaliꞌ ane huluꞌ to uwaꞌ i wotami mewali mokorindi, makaja mpololeke komokorindine kotuwuꞌmi”.
Inioꞌ morodaꞌa lalimi
24“Hawaꞌi uwaꞌ haduo hawiꞌ to nobiaꞌ majama hampihalao i roduo tuana, alaꞌ haduo nopotanaꞌ, hei haduo nokabiriꞌ. Haduo nopetuntui hawaꞌne, hei haduo hawaꞌi notuntuni. Hatoꞌo woꞌo ingkei, hawaꞌkei ibiaꞌ mampetuntui peleihana Pueꞌ Ala, ane nopohawiꞌlukei doiꞌ.”
Inioꞌkei tepe i lali kotuwuꞌmi
(Luk. 12:22-31)
25“Mewaliꞌ, Kutiꞌikikei: inioꞌ tepe lalimi noniuꞌ i kotuwuꞌmi, hapo to hingkiꞌ iꞌokakei hei to i inukei. Inioꞌ woꞌo tepe lalimi noniuꞌ i peparewami. Kotuwuꞌmi meloliu tene ka pangka, hei wotami meloliu tene ka parewa. 26Ele tinti to meloka i raoha. Hawaꞌhi mantudaꞌ, hawaꞌhi mekina, hei hawaꞌhi woꞌo mamporia kinara i buhoꞌ. Angkana kehapoꞌi hatoꞌo, Umoꞌmi to uwaꞌ i suruga bateꞌna mampopopangkahi. Hapo tene ingkei. I pampeꞌelena Pueꞌ Ala, meloliu tene kotuwuꞌmi ka kotuwuꞌra tinti. 27Hapomo podumbuꞌane woriꞌ ipotepekei? Kehapoꞌi tepe lalimi mampekiri kotuwuꞌmi, angkana hawaꞌkei hohumbo motambai tinuwuꞌmi kehapoꞌi hangkiuꞌlu.
28Mahamporeꞌi hinaꞌ tepe lalimi mampekiri peparewami? Elekei bunga i popada. Hawaꞌhi majama, hawaꞌhi marau. 29#1Dat. 3:12-13; 10:23; 1Taw. 29:25Angkana Kutiꞌikikei: ngkoweꞌ woꞌo Datu Salomo tosugiꞌ mpololeke, baduꞌna hawaꞌi hibali komarangane hante bunga tiꞌo. 30Howeꞌ kora i popada to tuwuꞌ i ando hieꞌe hei nihunu poꞌonina nopomaranga woꞌo Pueꞌ Ala, hapona tene ingkei meliu konorewahimio Pueꞌ Ala. Mewaliꞌ, mahamporeꞌi hinaꞌ hawaꞌi ipohinarukei perewahiNe? 31Inioꞌ tepe lalimi hei itiꞌikei, ‘Hapomo to hingkiꞌ toꞌoka hei toꞌinu? Hapomo to hingkiꞌ topobaduꞌo?’ 32Lekiꞌ-lekiꞌna tiꞌo nopaliꞌ woꞌo toaꞌ to hawaꞌi pobahaꞌ Pueꞌ Ala. Angkana ingkei, inioꞌkei tepe, alaꞌ lekiꞌ-lekiꞌna to iparaluꞌikei, nobahaꞌmo Umoꞌmi i suruga. 33Mewaliꞌ, to hangangaa ipohimpodulukei iomo Pueꞌ Ala meparenta i lali kotuwuꞌmi, hei hangangaa iwalikei nturusi hapo to mononto i pampeꞌeleNa. Ane iwalikei hatoꞌo, lekiꞌ-lekiꞌna to iparaluikei, bateꞌna hingkiꞌ Nopaꞌanikikei.
34Mewaliꞌ, inioꞌ tepe lalimi mampekiri hapo to hingkiꞌ mewali i ando-ando to hingkiꞌ hupaꞌ. Ando hieꞌe ganaꞌmo komaporiꞌne, hampoliꞌmokei mampekiri hapo to hingkiꞌ mewali poꞌonina.”
Atualmente selecionado:
Matius 6: LAILJE
Destaque
Copiar
Comparar
Partilhar
Quer salvar os seus destaques em todos os seus dispositivos? Faça o seu registo ou inicie sessão
2017 Indonesian Bible Society (Lembaga Alkitab Indonesia)