Wúlúfè 2
2
Wúlúfè e yɛɓo kɛ Bóà píé nyɛ́nɛ̀ĩ̀
1Kɛ́ a ɓoá, Nìómì dɛ̃ Ìlímílɛ̀ ɓɛ́ɛ ye mì dò e kɛ gɔ̃ kpã̀nazɛ̀ ká wáà sì Bóà. 2Lɛ́ Wúlúfè lɛ́ e kɛ Móà lenɛ̀ káa a gèe Nìómì lɛ̀ɛ, “Gó ḿ ló nyɛ́nɛ̀ĩ̀ dò mɔ̀ ḿ bálè gbã̀ã̀ lɛ́ è lo tóò yɛɓo kɛ mìàa ko mɔ̀ɔ pá e kíe mɔ̀, yé m wɔ̃̀ yí áà kã́ o lɛ̀ɛ ká.” Nìómì a gèe à lɛ̀ɛ, “Ì ló i líé, m lú.”
3Yé e kɛ̀ kília, Wúlúfè e wɛ̀lɛ̀ gbaa e ló nyɛ́nɛ̀ĩa mɔ̀, áà tò míá o kɛ bálè kã́ pìàa ko mɔ̀, áà bálè gbã̀ã ò die à làa sì áà pà e kíe mɔ̀. Lɛ̀ e kɛɛ, á yí dɔ gbaa kélɛ̀ gɔ̃́ ò si Bóà lɛ́ e kɛ Ìlímílɛ̀ ɓɛ́ɛ ye mì káa píé nyɛ́nɛ̀ĩ̀ lɛ.
4Lɛ̀ e kɛ kília, Bóà e gó Bɛ́féléhɛ̃́ɛ̃̀ pɛlɛi e ló e píé nyɛ́nɛ̀ĩ̀ áà gèe yɛɓo kɛ mìà lɛ̀ɛ, “Ka túóó. Yàwɛ é lúà kpɔ́ ka mɔ̀!”
Lɛ́ wa zɛ nɔ wèa kélɛ̀, “Yàwɛ é lúà kpɔ́ i mɔ̀ kíli.”
5Bóà e wɛ̃́ĩ́lɔ̀ɔ kɛ yɛɓo kɛ mìà wũ là mìa kɛ̀lɛ̀ kélɛ̀, “Lenɛ̀ kpɛɛ̀ lɛ́ e yí ɓɛ?”
6Gɔ̃́ɔ̃ a zɛ nɔ wèa kélɛ̀, “Lenɛ̀ lɛ́ è gó Móà lɛ́ wà Nìómì o nua lɛ. 7E m wɛ̃́ĩ́lɔ̀ɔ kɛ a gèe ḿ à tó é là bálè pá e kíe mɔ̀ m̀ yɛɓo kɛ mìàa mɛ̀ĩ́ píé. E gbɛ̃̀ kɛ̀ yɛɓo kɛɛ̀ɛ ká gó làa píé mɔ̀, dɛɛ ká lɛ́ nɔ́ e nu e fĩ́ĩ́ dɔɔ̀ ɓéĩ́ ká lɛ́ e yà bĩ̀ĩ́ĩ yia.”
8Lɛ̀ e kɛ kília, yelɛ́ Bóà a gèe Wúlúfè lɛ̀ɛ, “I toò dɔ, m lú, yé kɛ í zò kɛ nyɛ́nɛ̀ĩ̀ gbɛɛ dò nɔɔ̀ fé mɔ̀. Ì yɛɓo kɛ loà o zèea píé. 9I nyìɛ̃ kɛ o mɔ̀ lɛ̀ ì lo o gɛ̃̀ wáà bálè kã̀ yia, í ló o píé yi. Maà wɔ̃́ gèe gɔ̃ã̀ nì o lɛ̀ɛ mɔ̀ɔ o lɛ̀ɛ yékɛ̀ mi dò gbɛɛ é pá i ka. À yé yíí mi lɔ̀ aà i kɛɛ, ì ló í yíí sí sɛ́lɛ́ gbɔ lɛ́ ò yíí si à yía yí ɓá mi.”
10Wúlúfé e gbini Bóà lɛ̀ɛ tã́ã̀ à pelà e pá tã́ã̀ ká, lɛ́ a gèe Bóà lɛ̀ɛ, “Mɛ́ e kɛ lɛ́ m wɔ̃̀ yí è kã i lɛ̀ɛ ke? Mɛ́ e kɛ lɛ́ ì sɛ́lɛ́ gbɛɛ yí mi ɓɛ̀lɛ yà kɛ̀ké zɛ̀ ɓɛ?”
11Bóà a zɛ nɔ à lɛ̀ɛ wéa kélɛ̀, “Wɔ̃́ séĩ́ lɛ́ ɓá kɛ̀ í dɛ̃ lèe ká lɛ̀ i dɛ̃ e gaa káa maà à ma. Ɛ̃́ɛ̃́ maà zí i gó à ká i dàa wà i lèe o mɔ̀ ɛ̃́ɛ̃́ lɛ́ i gó à ká i dìè pà sɛ̀lɛ̀ yí, lɛ́ i nu à ká sɛ́lɛ́ lɛ́ ɓàá yí mìà gbɛɛ dɔɔ o píé, kɛ í kɛá o bàa maà à gɛ̃̀. 12Gó Yàwɛ é i fɔ́nɔ́ nɔ wɔ̃́ ɓa kɛɛ wɛ̃́ĩ̀. Gó Yàwɛ lɛ́ e Éézɛ̀lɛ̀ à Wálà káa é i fɔ́nɔ́ lé paàa zɛ̀ nɔ a wɛ̃́ĩ̀. Wálà e kília, lɛ́ i nu à gbã wì kɛ í i bĩ̀ĩ̀ ɓɛ.”
13Wúlúfè a zɛ nɔ a gèe, “Ƃaà zò yiè gbùò kɛ m ká, m dàa mì. Ƃaà kɛ m zò aà yà wè lɔ́ɔ́ lɔ̀ɔ̀ ɓa gèe m lɛ̀ɛ wɛ̃́ĩ̀, lɛ̀ bɛ̃̀ lɛ́ ma wá kpã̀nazɛ̀ ḿ dieá ɓà yɛɓo kɛ mìà o zèea dò làa ká.”
14Lɛ̀ lɛ́ léɓèlè ɓèlè lùò e ɓɔɔ, Bóà a gèe Wúlúfè lɛ̀ɛ, “Nu zèe í belèa dò kṹ ɓá wàà ɓòoa bà.” E ló e yà gbaa gɔ̃ã̀ lɛ́ o kɛ bálè kã́ pìàa sɔ́nɔ́, ye lɛ́ bálè yìɛɛ̀zɛ̀ lɛ́ o kɛ a ɓèlè pìàa, Bóà a dò sí a nɔ Wúlúfè lɛ̀ɛ lɛ́ a ɓèlè à zò e dà, lɛ́ à gbú e tóa. 15Lɛ̀ Wúlúfè e wɛ̀lɛ̀ e ló e mɛ̀ĩ́ là yɛɓo pìàa, Bóà a gèe à yɛɓo kɛ mìàa lɛ̀ɛ, “Lɛ́ɛ̀ wɛ̀lɛ̀a bɛ̃̀ɛ̃ é ló là bálè kpɛ̃̀ĩ́ là naa pìàa, lɛ́ɛ̀ ɓɔ̀á lɛ̀ lɛ́ bálè bè yèlèe zɛ̀ kpɔ́ɔ̀ɔ lɛ yía mɔ̀ɔ, yé kɛ̀ mi gbɛɛ á dɔ tã́ã̀. 16Gó zénií yia, kà bálè bèa gbã̀ã̀ dò gã́ã́ a yí ká káa kà píé yí lɛ́ɛ̀ ɓɔ̀á mɔ̀ɔ a wɔ́ɔ̀, yé kɛ̀ ká fɔ̃̀ã̀-fɔ̃́ã́ kɛ.”
17Lɛ̀ e kɛ kília, Wúlúfè e ló e líé là bálè kpɛ̃̀ĩ́ là naàa ká nyɛ́nɛ̀ĩa mɔ̀, e tóá kíli nyɛ́ŋɛ́ĩ píé e kɛa. Wúlúfè e bálèa séĩ́ zìi à sii kɛ̀ gbíni kɔ̀ e kɛ lèĩ pã́ũ vũ̀ pèèlɛ wɛ́lɛ́ sɔ́ɔ́li ká. 18Ye lɛ́ Wúlúfè e bálè siia sí e ló à ká pɛlɛi e dɛ̃ lèe lɛ̀ɛ. Ɛ̃́ɛ̃́ zéniía ɓèlè pɛ̀ gòo a tóá a sí a nɔ à lɛ̀ɛ nɔ́ kíli. 19Lɛ́ à dɛ̃ lèe a wɛ̃́ĩ́lɔ̀ɔ kɛ kélɛ̀, “Mɛ́ɛ zàá lɛ́ i zòkɛ yí pɛ̃́nɛ̀ɛ ɓɛ? Ɛ̃́ɛ̃́ deĩ̀ píé nyɛ́nɛ̀ĩ̀ lɛ́ i yɛɓo kɛ yí ɓe? Gó Wálà é lúà kpɔ́ gɔ̃́ e zò yiè kɛ i káa mɔ̀.”
Lɛ́ Wúlúfè a gèe Nìómì lɛ̀ɛ, “Gɔ̃́ ò si Bóàa píé nyɛ́nɛ̀ĩ̀ lɛ́ m yɛɓo kɛ yía.”
20Nìómì a gèe a gbe na lɛ̀ɛ, “Go Yàwɛ é lúà kpɔ́ à mɔ̀. Yàwɛ lɛ̀ɛ́ go nɛ́ à zò yiè kɛ̀ mia lɛ́ o ɓéèea wà o yé waà gaa o ká pìà.” Nìómì a gèe zeĩ́ kélɛ̀, “Gɔ̃́ e yía lɛ kɔa ɓɛɛ ye mì dìè ká. Míá ò bɛ̀i à mɔ̀ kɔa wɔ̃̀ é kɛ o gbã làa doó mì lɛ.”
21Lɛ́ Wúlúfè a gèe, “À ye kpó-kpó a gèea lɛ́ e kélɛ̀, ‘Ì ɓà zò kɛ zèe teele é tóá kíli ó nyɛ bálè kã́ã̀ã mɔ̀.’”
22Nìómì a gèe Wúlúfè lɛ̀ɛ, “Èè le m lú, lɛ́ɛ̀ ló kɛɛ sɛ̀ í yɛɓo kɛ loà vɔ̀ lɛ́ o Bóà píé nyɛ́nɛ̀ĩa o píé. Lɛ̀ɛ́ ló kɛɛ̀ sɛ̀ kɛ i yɛɓo kɛ mi gbɛɛ píé nyɛ́nɛ̀ĩ̀ yékɛ̀ ó wɔ̃́ gáàa kɛ i ka.” 23Lɛ̀ e kɛ kília, Wúlúfè e tó Bóà à yɛɓo kɛ mìà o píé e tóá kíli bálè wà wítì o kã́ pɛ̃́ e nyɛ à ka. Yelɛ́ Wúlúfè e tó e dɛ̃ lèe píé teelea.
Atualmente selecionado:
Wúlúfè 2: MHB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão